Saleh Səmədova tezliklə azadlığa qovuşmağı arzulayıram

İmişli Rayon Ağsaqqallar Şurasının sabiq sədri Saleh Səmədovun həbsindən xəbərim yox idi. Amma bəzi məsələlər qulağıma çatmışdı. Sadəcə, məhkəmə qərarı ilə həbs edildiyini bilmirdim.

CityPost.az  xəbər verir ki, bu sözləri Teleqraf-a İmişlini Milli Məclisdə təmsil edən deputatı, Milli Cəbhə Partiyasının sədri Razi Nurullayev deyib.

O, Saleh Səmədovu çox yaxşı tanıdığını bildirib:

“Rayon sakinlərindən biri kimi onu tanımamağım mümkün deyil. Tanımışam, münasibətimiz də olub. Son bir ildə başım qarışıq olduğu üçün çox sıx görüşə bilməmişik. Əvvələr münasibətimiz çox yaxşı olub, gediş-gəlişimiz var idi. Onu rayonda hamı kimi mən də sahibkar olaraq tanımışam”.

Razi Nurullayev Saleh Səmədovun bu şəkildə həbsindən məyus olduğunu ifadə edib:

“İnşallah, araşdırma gedər və haqqında müsbət qərar çıxarılar, o da azadlığına qovuşar. İndi hamı onun faşizm üzərində Qələbə günü – mayın 9-da tədbirdə SSRİ bayrağı altında, sinəsində rus imperiyasının rəmzi olan "Georgi lenti" ilə çıxış etməsini gündəmə gətirir. Sözsüz ki, bu, dövlət orqanlarının araşdıracağı bir işdir. Mən İmişlinin deputatıyam və o da mənim seçicilərimdən biridir. Sözsüz ki, öz seçicim haqqında nəsə başqa söz deməyim doğru olmaz və deyə də bilmərəm”.

Həmçinin oxuyun

İlham Əliyev Azərbaycan xalqını Qurban bayramı münasibətilə təbrik edib 

İrandan Azərbaycana külli miqdarda narkotik keçirilməsinin qarşısı alınıb 

Xaçmazda 2 il əvvəl törədilmiş cinayət hadisəsinin üstü açılıb 

Ədliyyə Nazirliyindən Rasim Həmidova məktub  

Deputat əlavə edib ki, 9 may günü onun bu addımı yaxşı bir hal deyildi. Bu, məlumatsızlıqdan, siyasəti düzgün qiymətləndirməməkdən, geosiyasəti bilməməkdən, Azərbaycanın siyasətini doğru dəyərləndirməmək kimi məsələlərdən irəli gəlir.

"Bunu da mən belə başa düşmüşdüm. Ona görə də hər zaman deyirik ki, siyasətlə, onu bilənlər məşğul olsun. Siyasəti düzgün analiz edib onun üzərində baş sındırmayanlar, cəfa çəkməyənlər, məlumatlı olmağa çalışmayanlar, hər gün onu izləməyənlər mütləq şəkildə hər hansı bir səhfə yol verir. Bu səhvlər də sonra baha başa gəlir. Ona görə də Saleh Səmədova tezliklə azadlığa qovuşmağı arzulayıram, yaxınlarına səbr diləyir. Onun uşaqlarını da tanıyıram. Allah köməkləri olsun”, - deyə R.Nurullayev söyləyib.

Qeyd edək ki,İmişli Rayon Ağsaqqallar Şurasının keçmiş sədri Saleh Səmədov həbs edilib. İmişli Rayon Məhkəməsi Saleh Səmədov barəsində 4 aylıq həbs qətimkan tədbiri seçib. Onun vergidən yayınmada ittiham edildiyi bildirilir.

Xatırladaq ki, mayın 13-də S.Səmədov İmişli Rayon Ağsaqqallar Şurasının sədri vəzifəsindən azad edilib. Ağsaqqallar Şurasının İdarə Heyətinin yaydığı məlumata görə, S.Səmədov Şuranın adına ləkə gətirən hərəkətlərə yol verib, Azərbaycan Ağsaqqallar Şurasının Nizamnamə tələblərini kobud şəkildə pozub. O, həmçinin Azərbaycan Ağsaqqallar Şurasının üzvlüyündən də çıxarılıb.