Şərurlu İsfəndiyar barəsində 40-a yaxın məhkəmə işi var...  

"Şərur MTK"nın sahibi İsfəndiyar Axundova (Şərurlu İsfəndiyar) qarşı “Proqress 2016” MTK-nın həbsdə olan rəhbəri Emil Səməndərov tərəfindən xüsusi ittiham qaydasında şikayət ərizəsi üzrə məhkəmə prosesi keçirilib.

CityPost.az xəbər verir ki, Binəqədi Rayon Məhkəməsində hakim Vüsal Tağıyevin sədrlik etdiyi prosesdə vəkil Asim Abbasov vəsatətlə çıxış edib.

Emil Səməndərovun vəkili Asim Abbasov bildirib ki, baxılan iş üzrə təqsirləndirilən İsfəndiyar Axundov Binəqədi Rayon Məhkəməsində 40-a yaxın iş üzrə cavabdeh şəxs qismində tanınıb. Həmin işlərin arasında iddiaçının xeyrinə qərar qəbul olunub. Eyni zamanda bir iş hazırda aktivdir, proses davam edir. Bu iddialar içərisində təmin olunan və olunmayanlar var. Vəkil məhkəmədən bunu nəzərə almağı və sorğunun nəticəsinin iş materiallarına əlavə edilməsini istəyib.

Məhkəmə sorğunun nəticəsini iş materiallarına əlavə edib.

Daha sonra Emil Səməndərov ifadə verib:

Onun sözlərinə görə, 2018-ci ildə “Proqress 2016” MTK-da 141 zərərçəkənin, 3 milyon 100 min manat maddi zərərin olduğu bildirilib: " Sonra məlum olub ki, 264 zərərçəkən, 7 milyon 900 min manat maddi zərər var. Bu işin mənə heç bir aidiyyəti olmamasına baxmayaraq son göstərilən maddi ziyandan 5 milyon manat ödəmişəm. Ona görə də İsfəndiyar Axundov mənə dələduz deyib”.

Daha sonra İsfəndiyar Axundov Emil Səməndərova sual ünvanlayıb:

"Sənin atan və yoldaşın məni məhkəməyə verərək məndən niyə 5 milyon tələb edir?

Emil Səməndərov bundan məlumatlı olmadığını bildirib.

Emil Səməndərovun vəkili Sumqayıt Ağır Cinayətlər Məhkəməsində Emil Səməndərovun işi üzrə qeyd olunan protokolların məhkəməyə təqdim edilməsi ilə bağlı vəsatət verib.

Onun sözlərinə görə, “Şərur” MTK zərərçəkənlərə 30 min manatlıq ziyana görə 50 min manatlıq qəbzlərə imza çəkdirib:

"Bu da protokollarda öz əksini tapıb".

Həmçinin oxuyun

İlham Əliyev Azərbaycan xalqını Qurban bayramı münasibətilə təbrik edib 

İrandan Azərbaycana külli miqdarda narkotik keçirilməsinin qarşısı alınıb 

Xaçmazda 2 il əvvəl törədilmiş cinayət hadisəsinin üstü açılıb 

Ədliyyə Nazirliyindən Rasim Həmidova məktub  

Məhkəmədən bildirilib ki, protokollar vəkil sorğusu əsasında verilmir, yanlız məhkəmə sorğusu ilə təqdim edilir.

Məhkəmə vəsatəti təmin etməyib.

Daha sonra məhkəmədə İsfəndiyar Axundovun mediadakı müsahibəsi olan videogörüntüyə baxılıb.

Məhkəmə linqvistik ekspertizanın keçirilməsi ilə bağlı hər iki tərəfin fikrini soruşub.

Vəkil Asim Abbasov bunun məhkəmənin uzadılması ilə nəticələnəcəyi deyib, ekspertizaya ehtiyac olmadığını bildirib.

İsfəndiyar Axundovun vəkili Ülvi Nəsibli də qarşı tərəflə eyni fikri səsləndirib. O, sözügedən ekspertizaya ehtiyac olmadığını deyib:

"İsfəndiyar Axundov müsahibəsində Emil Səməndərova qarşı dələduz ifadəsi işlətməyib. Ekspertizanın keçirilməsinə ehtiyac yoxdur. İsfəndiyar Axundov tanınmış şəxsdir. Qarşı tərəf müəyyən təminatlar əldə etmək üçün müvəkkilim barəsində xüsusi ittiham qaydasında şikayət edib".

Məhkəmə videonun linqvistik ekspertizaya verilməsi ilə bağlı qərar qəbul edib.

Məhkəmə qeyri-müəyyən vaxta təxirə salınıb.

Xatırladaq ki, İsfəndiyar Axundovu “Proqress 2016” MTK-nın həbsdə olan rəhbəri Emil Səməndərov məhkəməyə verib. Buna əsas kimi Axundovun onu yekun məhkəmə qərarı olmadan dələduz adlandırmasını göstərib.

Buna görə də İ. Axundov barəsində Cinayət Məcəlləsinin 147.2-ci (böhtan) və 148-ci (təhqir) maddələri üzrə xüsusi ittiham qaydasında şikayət edilib. Xüsusi ittihamçı İsfəndiyar Axundovun qeyd olunan maddələrin sanksiyası həddində azadlıqdan məhrum edilməsini istəyir.