Süni intellektlə “dirilən” ölülər: Din xadimi ilə MÜSAHİBƏ 

Son dövrlər sosial şəbəkələrdə narahatedici və eyni zamanda geniş müzakirələrə səbəb olan bir tendensiya sürətlə yayılmaqdadır. Vəfat etmiş insanların süni intellekt texnologiyaları vasitəsilə hazırlanmış videoları paylaşılır. Bəzi istifadəçilər dünyasını dəyişmiş yaxınlarını guya məzardan çıxırmış kimi, bəziləri isə danışan, hərəkət edən formada təqdim edir. Bu videolar bir tərəfdən texnologiyanın imkanlarını nümayiş etdirsə də, digər tərəfdən ciddi mənəvi, etik və dini suallar doğurur.

Mövzu ilə bağlı dini baxımdan mövqeni öyrənmək üçün Abşeron,Sumqayıt Xızı bölgə qazisi Hacı Rauf Sərdarovdan açıqlama aldıq. O, süni intellektlə vəfat etmiş insanların “canlandırılması”nın İslam dini baxımından qətiyyən qəbul olunmadığını bildirdi.

 Hacı Rauf Sərdarovun sözlərinə görə, İslam dinində bu cür yanaşmalar bəyənilmir və hətta günah hesab olunur:“İslam baxımından bu cür görüntülər qəbul edilən deyil. Ümumiyyətlə, bəyənilmir, hətta günah sayılır. Ölünü diriltmək, ona yenidən həyat vermək yalnız Allaha məxsus bir xüsusiyyətdir. İnsanlar süni intellektlə özlərindən nəsə uydururlar, amma bu, dinimizdə tamamilə qəbuledilməzdir.”

Axund qeyd edir ki, sosial şəbəkələrdə bu cür videolar artıq bir növ “trend”ə çevrilsə də, müasirlik və texnologiya adı altında hər şeyin leqallaşdırılması doğru deyil:“Elm başqadır, müasirlik başqadır, günün tələbi başqadır. Amma bu kimi vasitələrdən istifadə etmək dinimizə görə uyğun deyil. Kim edirsə, bu artıq onun şəxsi düşüncəsidir, lakin bəzi mənbələrdə bu, hətta insanın özünə qarşı hörmətsizlik, həqarət kimi dəyərləndirilir.”

 Hacı Rauf vurğulayır ki, insan dünyasını dəyişdikdən sonra onun ruhu Allaha qovuşur və artıq bərzəx aləmində olur:“İnsan vəfat edəndən sonra onun ruhu Allahına qayıdır və orada öz əməllərinə görə hesaba çəkilir. Sən onun həyatına niyə müdaxilə edirsən? Bu, düzgün deyil.”

O, həmçinin qeyd etdi ki, İslamda hətta başdaşıların həddindən artıq bəzədilməsi, şəkillərin qoyulması belə bəyənilmir. Yalnız vətən, xalq və millət yolunda canından keçmiş şəhidlər istisna təşkil edir.

 Rauf Sərdarov vurğulayır ki, dünyasını dəyişmiş yaxınlarına təsəlli tapmaq istəyənlər üçün dinin tövsiyə etdiyi daha doğru yolları da sadaladı:“Əgər insan valideyni və ya yaxınları üçün nəsə etmək istəyirsə, onun ruhuna dua oxusun, Quran oxutsun, bir yetimi sevindirsin, bir ehtiyaclıya kömək etsin. Onun adından yol çəksin, su çəkdirsin, məktəb, məscid, mədrəsə tiksin, təhsilinə dəstək olsun. Bunlar daha məqsədyönlü və savab əməllərdir.”

Həmçinin oxuyun

Şəxs adını daşıyan ölkələr...  

İlk pensiya harada və nə zaman tətbiq edilib?  

Yazıçılar Birliyindəki Rauf Aslanov kimdir? - O nə üçün yazıçılara qənim kəsilib...  

İcra başçısı iki müdiri işdən çıxardı, baş mühasibə yeni vəzifə verdi 

Axundun fikrincə, süni intellektlə hazırlanmış bu tip videoların mərhuma heç bir faydası yoxdur:“Bu cür görüntülər sadəcə şok xarakteri daşıyır. Nə mərhuma xeyri var, nə də axirət baxımından fayda verir.”

Beləliklə, müasir texnologiyaların yaratdığı imkanlar insanları heyrətləndirsə də, din və mənəviyyat prizmasından baxıldıqda, hər yeniliyin doğru və məqbul olmadığı bir daha ortaya çıxır.

Söhbətləşdi- Turan Etibaroğlu