TƏBİB-də yarpaq tökümü - Növbə Şahin Qurbanova çatır

İmişli rayon Mərkəzi Xəstəxanasının direktoru Şahin Qurbanovun yarıtmaz fəaliyyətinə dair yerli mətbuatda zaman-zaman xəbərlər yer almaqdadır. TƏBİB-in sabiq icraçı direktoru Vüqar Qurbanov vəzifəsindən azad edilən kimi bir vaxtlar “ağsaqqalım” dediyi, onu vəzifəyə gətirən adamı Şahin Qurbanov “əyyaş”, “içki düşkünü” adlandırdı. Ona içki məclisləri təşkil etdiyi halda “indiyədək onunla bir stəkan çay da içməmişəm” deyərək dostluq münasibətlərini inkar etdi.

Anar Bayramov TƏBİB-ə yeni icraçı direktor təyin edilən kimi Şahin Qurbanov utanmadan onunla Əmək və Əhalinin Sosial Müdafiəsi Nazirliyinin tabeliyindəki Dövlət Tibbi-Sosial Ekspertiza və Reabilitasiya Agentliyində bir yerdə çalışdığını əsas gətirib “Anar müəllim öz adamımızdır” ifadəsini işlətdi. Böyük filosof Diogen yazırdı ki,kiçik yerlərə gəlmiş böyük insanlardan çəkinməyin.Birdən-birə kiminsə hesabına böyük mətləblərə nail olmuş kiçik adamlardan qorxun.

Ən ağrılısı isə odur ki, gözdən uzaq, könüldən iraq İmişlidə səhiyyə artıq yerlə sürünür. Burada səhiyyə taqətini itirib yerə yıxılan, sanki son günlərini yaşayan insana bənzəyir. İmişlidə səhiyyəni belə duruma salan isə TƏBİB-in sabiq icraçı direktorunun yaxın dostu olmuş Şahin Qurbanovdur. Rayonda səhiyyə işçiləri arasında dolaşan söz-söhbətə görə Şahin Qurbanov 2 diş həkimindən ştatda saxlamaq üçün ayrı-ayrılıqda xeyli miqdarda  pul alıb. Burada mühafizəçidən tutmuş tibb bacısına qədər işə düzəlmək üçün hər vəzifəyə görə qiymətlər dəyişir. Məhz, bunun nəticəsidir ki, Şahin Qurbanov bahalı avtomobil idarə edir,dəbdəbəli ömür yaşayır. Xəstəxana direktoru təyin ediləndən sonra Bakıda iki yerdə yeni tikilidə geniş mənzil alıb. İmişlidə “Nərgizim” əyləncə və hotel kompleksində günü 50 manata yaşamaqla lüks həyat keçirir. Yerli sakinlər hesab edirlər ki,onu da keçmiş icra başçısı Vilyam Hacıyevin taleyi gözləyir.

TƏBİB-ə Anar Bayramov yeni icraçı direktor təyin edildikdən sonra burada əsl yarpaq tökümü başlayıb. 15.000 manat əmək haqqı alan 6 müşavirini işdən çıxaran TƏBİB rəhbəri xəstəxana direktorlarına da nəzər salmaqla əncam çəkmək qərarına gəlib deyəsən. Hədəfə ilk tuş gələn direktor isə “Yeni Klinika”nın rəhbəri Barat Yusifov,ardınca isə Klinik Mərkəzin direktoru Könül Ələkbərov,Sabunçu Tibb Mərkəzinin direktoru Nurəngiz Bəşirova oldu. Maraqlıdır İmişli Mərkəzi Xəstəxanasını özəl obyektdə çevirmiş TƏBİB rəhbərini “öz adamı” adlandıran Şahin Qurbanovun növbəsi bəs nə vaxt yetişəcək görəsən? 

Həmçinin oxuyun

Bayram Ali Çelikten  yazır  

Xalq yazıçısı Anar: “Bunu ilk dəfədir açıqlayıram...”

Şükranlıq içində və ya şükranlığa bələnmiş ADAM...  

Prezident ailəsini şantaj edən Fərid Salmanov KİMDİR?

Belə ki, İmişli Mərkəzi Xəstəxanasına sığorta ilə müraciət edən şəxslərə  “sığortanın pulu 3 aya köçür, siz “şapka” verməlisiniz” deyirlər. Hansı ki, o pul da həkimlərə çatır və nəticədə sığortadan gələn bonus həkimlərə verilmir, şifahi razılaşmaya əsasən direktor Şahin Qurbanovun cibinə axır. 

Burada hamilə qadınların qarşılaşdığı mənzərə isə daha qorxunc və acınacaqlıdır. Xəstəxanaya doğuş üçün müraciət edən, ana olmağa hazırlaşanlara əvvəlcə 7-8 nəfərin bir yerdə qaldığı palatanı göstərib vahimə yaradaraq canlarına qorxu salandan sonra lüks otaqları təqdim edirlər. Rahatlığa üstünlük verən bu biçarə doğuş gözləyən  xəstələr 70 manatdan 100 manatadək olan tək adamlıq palataları ödəniş etməklə götürüb ödənişsiz olan dövlət xəstəxanasının xidmətlərindən dolayısı yolla pulla istifadə etmək məcburiyyətində qalırlar. Bir sözlə, İmişli Mərkəzi Xəstəxanasında tibbi sığorta kağız üzərində gözəl görsənir, vətəndaş isə bu xidmətdən yararlanarkən  çətinliklə üzləşir. 

İmişli Mərkəzi Xəstəxanasının direktoru Şahin Qurbanov Citypost.az-a məxsus şəhər və mobil telefon nömrələrini bilərəkdən blokladığı üçün əldə etdiyimiz məlumatları dəqiqləşdirmək cəhdlərimiz uğursuz oldu. Xəstəxananın baş həkimi Rafiq Quliyev isə bizimlə hədsiz dərəcədə kobud rəftar edərək “suallarınıza cavab vermirik, nə istəyirsiniz edin, nə istəyirsiniz gedin yazın” ifadəsini işlətdi. 

Bir daha İmişli Mərkəzi Xəstəxanasının direktoru Şahin Qurbanovun və baş həkim Rafiq Quliyevin nəzərinə çatdırırıq ki, jurnalistin peşə fəaliyyətinə mane olmaq Azərbaycan Respublikası Cinayət Məcəlləsinin 163-cü maddəsinin tələblərinə uyğun olaraq cinayət məsuliyyəti yaradır. 

Müşərrəfxanım