Tural İrfan: “Xalqın dərdini yaşamayan kasıblığı anlaya bilməz” 

Milli Cəbhə Partiyası sədrinin müavini, siyasi şərhçi Tural İrfan sosial şəbəkə hesabında paylaşdığı açıqlamada bəzi ictimai şəxslərin xalqa münasibətini sərt tənqid edib.

Citypost.az xəbər verir ki, siyasətçi bildirib ki, xalq yazıçısı, jurnalist və əməkdar artistlərin xalqa, yaxud xalqın bir hissəsinə qarşı istifadə etdiyi aşağılayıcı ifadələr siniflərarası məsafənin nə qədər dərinləşdiyini göstərir. Müəllifin fikrincə, həmin şəxslərin püskürdüyü hiddət və daxili nifrətə qarşı cəmiyyətin verdiyi gərgin reaksiyalar ölkədəki sosial-psixoloji vəziyyətin nə qədər ağır olduğunu açıq şəkildə ortaya qoyur.

Tural İrfan qeyd edib ki, bir müddət əvvəl də siyasi təşkilat sədrlərindən biri jurnalisti açıq şəkildə söyüşlə təhqir etmişdi. O hesab edir ki, bəzi məmurların və “məmurlaşmış” ictimaiyyət nümayəndələrinin bu cür qeyri-təbii və təxribat xarakterli çıxışlarına insanların dərhal mənfi reaksiya verməsi onların xalqın içində olmadığını göstərir.

“Onlar ictimai nəqliyyatdan istifadə etmirlər, nisyə çörək alan dörduşaqlı ailələri tanımırlar, pensiyası dərmanına çatmayan qocaların ümidsiz gözlərinə baxmayıblar”, – deyə müəllif vurğulayıb.

Yazıda kasıblığın yalnız yaşayanların anlaya biləcəyi bir hiss olduğu qeyd edilir. Müəllif qaz sayğacında pulun bitməsi, uşağa məktəbə gedərkən kökə pulu verə bilməmək, borcla toy məclisinə qatılmaq, qazancsız günün axşamı uşaqların yanına əliboş qayıtmaq kimi nümunələrlə sosial çətinliklərin insan həyatında yaratdığı ağrıları təsvir edib.

Həmçinin oxuyun

Azərbaycanda Türkiyə ilə bağlı nə DÜŞÜNÜRLƏR? -SİYASİ ŞƏRH  

Kamran Əliyev Misir Mərdanovun kürəkənini prokuror təyin etdi

"Falcom" MMC-də fəhləninin ölümünün açılmasına KİM MANE OLUR? -ŞOK VİDEO

SEVGİ VƏ HƏYATIN MÜQƏDDƏSLİYİ  

Tural İrfan xəstəxanalarda uzun növbələrdə ac gözləyənləri, son manatını dərmana verib evə piyada qayıdanları, uşağının meyvə istəyini qarşılamayan anaları, gecələr zibil qablarından yararlı nəsə axtaran qadınları və körpü altında dilənən insanları misal çəkərək bildirib ki, bu ağrıları yaşamayan kasıbın dərdini anlaya bilməz.

Siyasətçi hesab edir ki, xalqı duymaq üçün sadəcə onun arasında olmaq kifayət deyil, xalqın dərdini, ağrısını və kasıblığını yaşamaq lazımdır.

“Sosial problemlər və ehtiyaclar içində yaşayan insanları üstəlik təhqir etmək, aşağılamaq siniflərarası sosial məsafənin nə qədər uzun olduğunu göstərir. Hətta bu məsafə o qədər böyüyüb ki, biri dediyini o biri eşitmir, anlamır”, – deyə açıqlamada bildirilir.

Yeganə