Elşad Paşasoy: "Azərbaycan–BƏƏ xətti güclənir"

Azərbaycan ilə Birləşmiş Ərəb Əmirlikləri arasında münasibətlər son illər yeni və daha yüksək inkişaf mərhələsinə qədəm qoyub. Hələ 1991-ci ilin sonlarından əsası qoyulan bu əlaqələr bu gün qarşılıqlı etimada, siyasi iradəyə və liderlər səviyyəsində formalaşan səmimi münasibətlərə söykənir. Məhz bu amillər ikitərəfli əməkdaşlığı təkcə regional deyil, eyni zamanda beynəlxalq müstəvidə nümunəvi modelə çevirib.

Mövzu ilə bağlı Citypost.az-a açıqlama verən politoloq Elşad Paşasoy bildirib ki, Azərbaycan Prezidenti İlham Əliyevlə Birləşmiş Ərəb Əmirliklərinin Prezidenti Şeyx Məhəmməd bin Zayed Əl Nəhyan arasında formalaşmış münasibətlər bu gün bir sıra dünya liderləri tərəfindən öyrənilən siyasi modelə çevrilib.

Politoloqun sözlərinə görə, bu əlaqələrin əsasını səmimiyyət, qarşılıqlı inam və etibar təşkil edir ki, bu da münasibətlərə əlavə dinamika qazandırır:“Təsadüfi deyil ki, Birləşmiş Ərəb Əmirliklərinin Prezidenti Azərbaycana bir neçə dəfə səfər edib. Onun Qarabağa, Şuşaya səfəri, Cıdır düzündə Azərbaycan prezidentləri ilə birgə Qarabağ atlarının şousunu izləməsi bu münasibətlərin nə qədər dərin və səmimi olduğunu açıq şəkildə nümayiş etdirir”.

Elşad Paşasoy xatırladıb ki, Qarabağ işğal altında olduğu dövrdə BƏƏ Azərbaycanın ərazi bütövlüyünü tanıyıb və bu məsələdə hər zaman həssas mövqe sərgiləyib. Torpaqların azad olunmasından sonra isə münasibətlər daha da intensivləşib:“Bu gün Azərbaycana investisiya qoyan ölkələr arasında BƏƏ şirkətləri xüsusi çəkiyə malikdir. Enerji və bərpa olunan enerji sahəsində həyata keçirilən iri layihələrin məhz Əmirliklərə məxsus şirkətlər tərəfindən icra olunması bunun bariz nümunəsidir”.

Politoloq qeyd edib ki, Prezident İlham Əliyevin BƏƏ-yə son səfəri zamanı nümayiş etdirilən yüksək səviyyəli qarşılanma və mükafatlandırma mərasimi də bu uzunmüddətli səmimi münasibətlərin məntiqi nəticəsidir.

Elşad Paşasoyun sözlərinə görə, Azərbaycan və Ermənistan liderlərinin 2026-cı ildə “Zayed İnsan Qardaşlığı” mükafatına layiq görülməsi də xüsusi rəmzi məna daşıyır:“Məhz ötən il sülh danışıqları vasitəçilərsiz şəkildə Əbu-Dabidə keçirildi. Həmin görüşdən təqribən bir ay sonra Vaşinqton razılaşmasının əldə olunması göstərdi ki, sülh prosesi rəsmi Bakının prinsipial və ardıcıl yol xəritəsi əsasında aparılır. Bu prosesdə Birləşmiş Ərəb Əmirliklərinin də özünəməxsus və müsbət mövqeyi olub”.

Politoloq əlavə edib ki, Prezident İlham Əliyevin mükafatlandırma mərasimində vurğuladığı kimi, bu mükafat həm də sülh prosesinin simvolik təsdiqidir.

Elşad Paşasoy Azərbaycanın BƏƏ ilə hərbi sahədə əməkdaşlığına da toxunaraq bildirib ki, Türkiyədən sonra Azərbaycan məhz BƏƏ ilə birgə hərbi təlimlər keçirib:“Səfər çərçivəsində keçirilən ‘Sülh Qalxanı–2026’ adlı birgə hərbi təlimlər qlobal məkana sülh mesajı vermək məqsədi daşıyır. Müdafiə nazirləri arasında imzalanan niyyət məktubu isə təhlükəsizlik və gələcək əməkdaşlıq baxımından mühüm əhəmiyyətə malikdir”.

Politoloqun fikrincə, səfər zamanı müxtəlif qurumlar arasında imzalanan sazişlər gələcək strateji hədəflərin müəyyənləşdirilməsi baxımından da önəmli addımlar idi.

Həmçinin oxuyun

Milli Məclisin növbəti iclasının vaxtı və gündəliyi açıqlanıb 

"Təhsilin bərbad vəziyyətə salınması insanın ürəyini sızladır"  - Fazil Mustafa

İcra başçısının köməkçisi işdən çıxarıldı - Sərxoş halda... 

Deputat ixtisarlardan narahatdır - VİDEO

O, həmçinin Azərbaycanın regionda sülhün təmin olunmasında oynadığı rolu xüsusi vurğulayıb:“BMT Təhlükəsizlik Şurasının qətnamələrini təkbaşına icra etmiş, işğalçını sülh masasına gətirmiş bir liderin sülh çağırışları beynəlxalq aləmdə ciddi rezonans doğurur. Vasitəçilər olmadan sülhün mümkünsüzlüyü ilə bağlı iddialar bu nümunə ilə alt-üst edildi”.

Elşad Paşasoy qeyd edib ki, Vaşinqton razılaşmasından sonra Azərbaycanla Ermənistan arasında ticarət əlaqələrinin başlanması, yükdaşımalarına qoyulan məhdudiyyətlərin aradan qaldırılması qlobal sülhə verilən real töhfələrdəndir.

Politoloq sonda Qarabağda separatizmin başında duran şəxslərin Bakı Ədalət Məhkəməsində mühakimə olunmasını da ədalətin növbəti təcəssümü kimi qiymətləndirib:“Bu proseslər bir daha göstərir ki, Azərbaycan dövləti güclüdür, Prezident İlham Əliyev milli və dövlət maraqları naminə müəyyən etdiyi hədəflərdən bir addım da geri çəkilmir. Ədalətli sülhün mümkünlüyü artıq bütün dünya üçün açıq şəkildə ortadadır”.

Turan Etibaroğlu