Nadir Azəri: Əbu-Dabi görüşü beynəlxalq ictimaiyyətə mesajdır

“Azərbaycan Prezidenti İlham Əliyevlə Ermənistanın Baş naziri Nikol Paşinyan arasında fevralın 4-də Əbu-Dabidə keçirilən görüş bir çox baxımdan mühüm əhəmiyyət kəsb edir və qlobal miqyasda müsbət nümunənin yeni mərhələsi kimi dəyərləndirilə bilər. O baxımdan müsbət nümunədir ki, bu görüş dünyanın müxtəlif bölgələrində davam edən müharibələr, silahlı qarşıdurmalar və hətta həmin münaqişələrin dayandırılması istiqamətində göstərilən səylərin nəticəsiz qalması fonunda beynəlxalq ictimaiyyət üçün ‘sülhü əldə etmək üçün daha qətiyyətli olmaq lazımdır’ mesajı verdi”.

Bunu Citypost.az-a “Orta Asiya və Güney Qafqaz Söz Azadlığı Şəbəkəsi” İctimai Birliyinin (CASCFEN) sədri Nadir Azəri deyib.

Onun sözlərinə görə, ən önəmli məqam ondan ibarətdir ki, tərəflər bu dəfə heç bir vasitəçinin iştirakı olmadan görüşərək birbaşa dialoq aparıblar və dünyaya sülhə dair açıq mesaj veriblər: “İkinci mühüm məqam tərəflərin ötən ilin avqust ayında Birləşmiş Ştatlarda əldə olunmuş razılaşmalara sadiq qaldıqlarını bir daha nümayiş etdirmələri oldu. Görüş barədə rəsmi məlumatda da qeyd edildiyi kimi, tərəflər ABŞ Prezidenti Donald Trampın ev sahibliyi və şahidliyi ilə baş tutan Vaşinqton Sülh Sammitinin nəticələrinin həyata keçirilməsi istiqamətində əldə olunan irəliləyişi alqışlayıblar. Onlar Ermənistan və Azərbaycan arasında normallaşma prosesinin ikitərəfli əsasda irəlilədilməsində müsbət dinamikanın qorunub saxlanılmasının vacibliyini vurğulayıblar. Yəni göründüyü kimi, tərəflər iki ölkə arasında sülhün və sabitliyin daha da möhkəmləndirilməsi istiqamətində səyləri davam etdirməyə hazırdırlar və ən əsası, bunun üçün qətiyyətli mövqe ortaya qoyulub”.

Həmçinin oxuyun

İcra başçısının köməkçisi işdən çıxarıldı - Sərxoş halda... 

Deputat ixtisarlardan narahatdır - VİDEO

Vəkil Salman Qasımovun adı pul qalmaqalında hallanır  

40 villa alan Ümid Abuzərlinin kriminal aləmlə əlaqələri üzə çıxdı    -   O,kriminal avtoritet "Fırtına Həsən"in yaxın qohumu imiş  

Nadir Azəri bildirib ki, görüşdə diqqətçəkən digər bir məqam Zəngəzur dəhlizi, başqa adı ilə TRIPP layihəsi ilə bağlı olub: “Yenə də rəsmi məlumatlara istinad edərək vurğulayaq ki, Prezident İlham Əliyev və Baş nazir Nikol Paşinyan TRIPP və digər bağlantı layihələrinin həyata keçirilməsini müzakirə ediblər. Hesab edirəm ki, bu məsələ, yəni Zəngəzur dəhlizinin açılması bu gün təkcə Cənubi Qafqaz üçün deyil, dünyanın bir çox ölkələri üçün xüsusi önəm kəsb edir. Çünki Zəngəzur dəhlizinin açılması beynəlxalq ticarət və logistika baxımından böyük iqtisadi və maliyyə dividendləri vəd edir. Bu baxımdan qeyd edə bilərik ki, Azərbaycanla Ermənistan arasında əldə ediləcək razılaşma həm də qlobal əhəmiyyət kəsb edir. Başqa sözlə desək, söhbət yalnız siyasi sülhdən deyil, eyni zamanda hərtərəfli ‘bərəkətli sülh’dən gedir. Belə bir saziş Cənubi Qafqazda uzunmüddətli sabitliyi təmin etməklə yanaşı, regionun iqtisadi inkişafına güclü təkan verəcək, həmçinin Zəngəzur dəhlizinin fəaliyyəti bir qitədən digərinə yükdaşımaları həyata keçirən ölkələr üçün məsafəni və xərcləri azaltmaqla qlobal iqtisadiyyata real fayda gətirəcək”.

Turan Etibaroğlu