Bünyamin Qənbərli: "Zəngəzur dəhlizində ABŞ-Rusiya mübarizəsi gedir”  

Azərbaycan və Ermənistan arasında bölgədə nəqliyyat və iqtisadi əlaqələrin gücləndirilməsi məqsədilə nəzərdə tutulan dəmir yolu layihəsi ilə bağlı proseslər regionda maraqlı tərəflərin diqqət mərkəzindədir. Son dövrlərdə layihənin reallaşması ilə bağlı ABŞ və Rusiya amillərinin rolu xüsusilə aktuallaşıb.

Siyasətçi Bünyamin Qəmbərli Citypost.az-a açıqlamasında bildirdi ki, bir vaxtlar Ermənistan Rusiyanın bölgəyə gəlişini istəmirdi, Azərbaycan isə bunu qəbul edirdi. Lakin ABŞ-ın təşəbbüsü ilə Azərbaycan və Ermənistanın layihə üzrə razılığa gəlməsi Rusiyanı narahat edib. Onun sözlərinə görə, Amerikanın bölgəyə daxil olması Rusiyanın təsir dairəsinin azalması deməkdir və Moskva bunu həzm edə bilmir.

B. Qəmbərli vurğulayıb ki, əvvəllər Rusiya layihənin ABŞ iştirakı olmadan səmərəli görünməyəcəyini bildirərək ehtiyatlı mövqe sərgiləyirdi. İndi isə açıq şəkildə qeyd edir ki, Ermənistanın dəmir yolları Rusiyanın nəzarətindədir və onun iştirakı olmadan layihənin həyata keçirilməsi mümkün deyil. Eyni zamanda, Ermənistan sərhədlərinin qorunması da Rusiyanın təsiri altında olduğundan, Ermənistan bəzi məsələləri Rusiyanın vasitəçiliyi ilə həll etmək məcburiyyətində qalır.

Siyasətçi qeyd edib ki, Rusiya dəfələrlə dəmir yolunun seçimi və tikintinin sürətləndirilməsi ilə bağlı müraciət etsə də, əsas məqsəd prosesləri ləngitmək və öz maraqlarını təmin etməkdir. O bildirib ki, Rusiyanın təsir imkanları aşağıdakı formada özünü göstərə bilər: tikintini maksimum dərəcədə yubatmaq, nəzarətində olan dəmir yolları üzərində əlavə problemlər yaratmaq və Ermənistanın Rusiyanın təsirindən çıxmasının qarşısını almaq üçün daxili çaxnaşmalar yaratmaq.

Bünyamin Qəmbərli eyni zamanda vurğulayıb ki, Ermənistan daxilində Rusiyaya meyilli qüvvələr zəif deyil, lakin baş nazir Nikol Paşinyan və qərb tərəfdən dəstəklənən qüvvələr Rusiyanın planlarını pozmaq gücünə malikdir. O əminliyini ifadə edib ki, Azərbaycan və Ermənistan siyasi iradə göstərsə, Rusiya bu layihəyə ciddi təsir göstərə bilməyəcək.

Siyasətçinin fikrincə, ABŞ-ın viz-prezidentinin regiona səfəri və İlham Əliyev ilə Paşinyanın qarşılıqlı görüşləri layihənin sürətləndirilməsinə təkan verəcək. O proqnozlaşdırıb ki, 2026-cı ildə Ermənistan hissəsində dəmir yolunun tikintisinə başlanacaq, 2027-ci ildə işlər yekunlaşacaq və 2028-ci ildə marşrut tam gücü ilə fəaliyyətə başlayacaq.

Həmçinin oxuyun

Xoşqədəm və digərləri nəzarətə götürüldü

Ərazisinə görə ən böyük türk diyarı...  

İlk Azərbaycanlı kontr-admiral kim olub?   

Akademiya nədir?  

Turan