Nadir Azəri: “Xocalı faciəsini unutmamaq gəncliyin üzərinə düşən mühüm vəzifələrdən biridir”

“Ermənilərin uzun illər ərzində Azərbaycan xalqının başına gətirdiyi müsibətlər tariximizin ən ağrılı səhifələrini təşkil edir. Bu faciələrdən ən dəhşətlisi isə 1992-ci ilin fevralın 26-da törədilmiş Xocalı soyqırımıdır ki, bu hadisə təkcə Azərbaycan xalqına qarşı deyil, bütövlükdə insanlıq və bəşəriyyət əleyhinə törədilmiş ağır cinayətdir. Aradan illər keçsə də, bu qanlı faciənin ağrısı xalqımızın yaddaşından silinməyib və silinməyəcək”.

Bunu Citypost.az-a “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, siyasi şərhçi Nadir Azəri deyib.

Nadir Azəri bildirib ki, bu gün Xocalı şəhidlərinin ruhu şaddır: “Çünki Vətən müharibəsində Azərbaycan Ordusu 30 il işğal altında qalan torpaqlarımızı azad etməklə yeni reallıq yaratdı. 44 günlük müharibədə misilsiz igidlik nümunələri göstərən qəhrəman Ordumuz Müzəffər Ali Baş Komandan İlham Əliyevin rəhbərliyi altında Xocalı faciəsi qurbanlarının da qisasını aldı. Bəllidir ki, hazırda Ermənistanla sülh sazişi üzərində iş aparılır və bölgədə davamlı sabitliyin təmin olunması istiqamətində mühüm addımlar atılır. Bunu alqışlamaqla yanaşı qeyd etməliyik ki, xalqımız, tarixi həqiqətləri və yaşadığımız faciələri unutmamalıdır. Xüsusilə gənc nəsil Xocalı həqiqətlərini dərindən bilməli, bu soyqırımın mahiyyətini düzgün dərk etməlidir”.

Nadir Azərinin sözlərinə görə, məhz bu kontekstdə Prezident İlham Əliyevin çağırışı xüsusi əhəmiyyət daşıyır: “Prezidenti İlham Əliyevin dekabrın 24-də Ağdamda 2-ci yaşayış kompleksinin açılışında buraya köçən sakinlərlə görüşündəki çıxışında digər məqamlarla yanaşı bu məqama da xüsusi toxunuldu. Dövlət başçısı Ermənistanla Azərbaycan arasında sülh priosesininin getdiyini deməklə yanaşı, xüsusi bir çağırış da etdi. Cənab Prezident dedi ki, biz işğal faktını, şəhidlərimizi, Xocalı qurbanlarını, digər günahsız insanların həlak olmasını heç vaxt unuda bilmərik və unutmamalıyıq. Dövlət başçısı bu istiqamətdə gənclərə xüsusilə xitab etdi. Məhz buradan çıxş edərək bildirək ki, bu gün gəncliyin üzərinə xüsusi missiya düşür. Gənclər tarixi yaddaşı qorumağı özlərinin vətəndaşlıq borcu kimi qəbul etməli, milli maraqları hər şeydən üstün tutmalıdırlar. Onlar həm informasiya müstəvisində, həm də ictimai fəaliyyətlərində Xocalı həqiqətlərinin davamlı olaraq dünyaya çatdırılmasına töhfə verməlidirlər. Bir sözlə, əgər biz Vətən müharibəsinə qədər “gün o gün olsun ki, işğal altındakı torpaqlar, Xocalı, Şuşa azad olunsun” deyirdiksə və bunun üçün mübarizə aparırdıqsa, postmüharibə dövründə də əsas işimiz bu faciələri unutmamaq, xalqımızın başına gətirilən faciələrin günahkarları və birbaşa iştirakçılarının cəzalarını almasına nail olmalıyıq. Bu baxımdan bir daha deyirəm, gəncliyin üzərinə mühüm vəzifə düşür”.

Həmçinin oxuyun

Xoşqədəm və digərləri nəzarətə götürüldü

Ərazisinə görə ən böyük türk diyarı...  

İlk Azərbaycanlı kontr-admiral kim olub?   

Akademiya nədir?