Rauf Rəcəbov: “İctimai Televiziya strateji kommunikasiya dayağıdır”  

İTV-nin sabiq əməkdaşı, müxtəlif dövrlərdə kanalın bir neçə mühüm vəzifəsində çalışmış tanınmış jurnalist Rauf Rəcəbov İctimai Televiziyanın baş direktoru vəzifəsinə keçirilən seçkilərlə bağlı fikirlərini bölüşüb.

Citypost.az xəbər verir ki, Rauf Rəcəbov bildirib ki, İctimai Televiziyanın baş direktoru vəzifəsinə seçkilərin ölkədə ilk dəfə bu qədər geniş ictimai rezonans doğurması mühüm və müsbət hadisədir. Onun sözlərinə görə, burada söhbət yalnız bir televiziya rəhbərinin müəyyən olunmasından deyil, ictimai yayımın gələcək taleyindən, cəmiyyətlə münasibətlərinin hansı istiqamətdə qurulacağından və dövlətlə vətəndaş arasında etimad körpüsünün hansı səviyyədə inkişaf etdiriləcəyindən gedir.

Jurnalist qeyd edib ki, İctimai Televiziya və Radio kanalının fəaliyyəti ilə bağlı müzakirələrin genişlənməsi dövlətin və cəmiyyətin bu prosesə həssas yanaşdığını göstərir. O vurğulayıb ki, artıq şəxsi ambisiyalar deyil, ictimai məsuliyyət müzakirə olunur.

Rauf Rəcəbov xüsusilə diqqətə çatdırıb ki, müzakirələrin istiqaməti fərdi iddialardan uzaqlaşaraq ictimai maraqlar müstəvisinə keçir və bu, sağlam tendensiyadır. O bildirib ki, uzun illər İTV rəhbərliyində təmsil olunmuş jurnalist və dövlətçilik mövqeyinə malik vətəndaş kimi prosesləri diqqətlə izləyir.Taleh Şahsuvarlı kimi tanınmış bir həmkarın səsləndirdiyi fikirlərin üzərindən sükutla keçmək olmaz. Rauf Rəcəbov qeyd edib ki, üç diplom sahibi olan və geniş ictimai düşüncə imkanlarına malik intellektualın ortaya qoyduğu tezislər ciddi ictimai müzakirə predmetinə çevrilməlidir.Məsələ təkcə hansısa şəxsin namizədliyi ilə məhdudlaşmır. Burada əsas məsələ ictimai yayımın hansı ideoloji və peşəkar platforma üzərində inkişaf etdirilməsidir.

Rauf Rəcəbov vurğulayıb ki, o, hər hansı namizədin tərəfdarı kimi çıxış etmir və əsas qərarın Yayım Şurası tərəfindən veriləcəyini hesab edir. Bununla belə, ictimai yayımın gələcəyi ilə bağlı müəyyən məqamların diqqətə çatdırılmasının vacibliyini qeyd edib.

Onun fikrincə, hazırda əsas məsələ İTV-nin kim tərəfindən idarə olunmasından daha çox, hansı idarəçilik fəlsəfəsi və innovativ model əsasında fəaliyyət göstərəcəyidir. O bildirib ki, müasir dövrdə ictimai televiziya sadəcə xəbər və proqram yayımlayan platforma deyil, cəmiyyətdə müzakirə mədəniyyətini formalaşdıran və ictimai etimadı qoruyan strateji institutdur.Bugünkü informasiya mühiti klassik televiziya anlayışını dəyişib. Sosial şəbəkələr, rəqəmsal platformalar, süni intellekt əsaslı informasiya axınları və qlobal media rəqabəti şəraitində ictimai televiziya daha çevik, daha intellektual və daha açıq düşüncəli olmalıdır.

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı  

Jurnalist bildirib ki, artıq tamaşaçı yalnız məlumat almaq istəmir, eyni zamanda müzakirələrin iştirakçısına çevrilmək istəyir. Onun sözlərinə görə, ictimai televiziya bu iştirakçılıq mühitini yarada bilməlidir. Əks halda cəmiyyət alternativ informasiya məkanlarına yönələcək və milli informasiya təhlükəsizliyi baxımından boşluqlar yaranacaq.

Rauf Rəcəbov əlavə edib ki, dövlətin əldə etdiyi tarixi nailiyyətlər yalnız rəsmi qərarlarla deyil, ictimai həmrəylik və cəmiyyətdən gələn təşəbbüslərlə daha da möhkəmlənə bilər. O hesab edir ki, düşünülmüş vətəndaş mövqeyi xarici informasiya təzyiqlərinə qarşı cəmiyyətin dayanıqlığını formalaşdıran əsas amillərdən biridir.Azərbaycanın təyyarəsinin Qroznu səmasında vurulması ilə bağlı yaranmış vəziyyətə də toxunaraq qeyd edib ki, həmin hadisə zamanı ictimai həmrəyliyin və milli maraqlar naminə nümayiş etdirilən vətəndaş mövqeyinin nə qədər vacib olduğu bir daha aydın göründü.Belə məqamlarda ictimai televiziya yalnız xəbər ötürən kanal deyil, milli düşüncənin və ictimai həmrəyliyin platformasına çevrilməlidir.

Sonda jurnalist vurğulayıb ki, hazırkı müzakirələr cəmiyyətin savadlı, dövlətçilik məsuliyyətini anlayan və milli maraqları müasir çağırışlarla paralel şəkildə düşünə bilən şəxslərə ehtiyacını ortaya qoyur.

“Bu gün əsas məsələ konkret şəxslərin qalib gəlməsi yox, İctimai Televiziyanın doğrudan da “ictimai” məzmunda yenidən düşünülməsidir. Çünki güclü ictimai yayım yalnız televiziya deyil — o, dövlətin strateji kommunikasiya dayağı, cəmiyyətin fikir platforması və milli informasiya təhlükəsizliyinin mühüm sütunudur”, – deyə Rauf Rəcəbov bildirib.

Əli