Millət vəkili: Uşaqların rəqəmsal təhlükəsizliyi artıq zərurətə çevrilib  

Milli Məclisin deputatı Ceyhun Məmmədov sosial şəbəkə hesabında uşaqların rəqəmsal mühitdə qorunması ilə bağlı açıqlama verib. Deputat bildirib ki, son dövrlər rəqəmsal mühit həyatımızın ayrılmaz hissəsinə çevrilib və sosial şəbəkələr artıq təkcə ünsiyyət vasitəsi deyil, həm də düşüncələrin, təsirlərin və dəyərlərin formalaşdığı platformadır.

Citypost.az xəbər verir ki, deputatın sözlərinə görə, uşaqların və yeniyetmələrin erkən yaşda internet mühitinə daxil olması məsələyə daha ciddi yanaşmanı tələb edir. Deputat vurğulayıb: “Uşaqların rəqəmsal təhlükəsizliyi artıq seçim deyil, zərurətdir. İnternet həm imkanlar yaradır, həm də risklər daşıyır. Bir tərəfdən uşaqlar informasiya əldə edir, bacarıqlarını inkişaf etdirir, digər tərəfdən isə zərərli məzmun, psixoloji təzyiq və manipulyativ təsirlərlə qarşılaşa bilirlər. Bu reallığı görməzdən gəlmək olmaz.”

C. Məmmədov qeyd edib ki, dünyanın bir çox ölkəsi bu istiqamətdə artıq konkret addımlar atıb: yaş məhdudiyyətləri tətbiq olunur, məlumatların qorunması gücləndirilir, valideyn nəzarət alətləri və platformaların məsuliyyəti artırılır. Deputatın sözlərinə görə, Azərbaycanın da bu prosesə qoşulması və sistemli yanaşma sərgiləməsi təqdirəlayiqdir.

Deputat əsas məqsədin uşaqları rəqəmsal mühitdən uzaqlaşdırmaq yox, onları təhlükəsiz və məsuliyyətli davranışa hazırlamaq olduğunu bildirib. Bu baxımdan təhsil proqramlarında rəqəmsal savadlılıq və kibertəhlükəsizlik mövzularının yer almasının vacibliyi vurğulanıb. Məktəblərdə mobil telefon istifadəsi ilə bağlı qaydaların müəyyənləşdirilməsi balans tələb edən məsələ kimi qiymətləndirilib.

Həmçinin oxuyun

MÜRGÜLƏYƏNLƏRİN GÜNAHI  - Fazil Mustafa yazır

Tələbələrin fotolarını yayan şəxsi KMBİ saxladı 

Xalq artistinin həyat yoldaşı vəfat etdi

Güney Azərbaycanın taleyini düsünərkən  - Sayman Aruz YAZIR

Valideynlərin roluna da diqqət çəkən deputat bildirib ki, uşağın əlindən telefonu almaq asandır, amma onunla danışmaq, izah etmək və doğru istiqamət göstərmək daha vacibdir. Rəqəmsal mühitdə sağlam davranışın ailədən başladığı vurğulanıb.

Sonda C. Məmmədov “Uşaqların rəqəmsal mühitdə zərərli məzmun və təsirlərdən qorunması ilə bağlı tədbirlər haqqında” İlham Əliyev tərəfindən imzalanmış Sərəncamın xüsusi əhəmiyyət daşıdığını qeyd edib. Deputatın sözlərinə görə, bu sahədə atılan addımlar gələcək nəsillərin daha sağlam, düşüncəli və məsuliyyətli formalaşmasına xidmət edəcək.

Turan