Eldəniz Əmirov: Dövlət idarəçiliyində təşəbbüs yalnız son imzanı atan şəxsdən gəlmir  

Dövlət idarəçiliyində qərarların təşəbbüsü və məsuliyyət mexanizmi ilə bağlı son günlər aparılan müzakirələrə münasibət bildirən iqtisadçı ekspert Eldəniz Əmirov qeyd edib ki, dövlət qərarlarının hazırlanması və qəbul edilməsi çoxşaxəli institusional prosesdir.

Citypost.az xəbər verir ki, ekspert sosial şəbəkə hesabında paylaşdığı fikirlərdə vurğulayıb ki, ölkə prezidenti il ərzində yüzlərlə fərman və sərəncam imzalayır. Onun sözlərinə görə, açıqlanan statistikaya əsasən, 2003–2023-cü illər ərzində Azərbaycan Prezidenti tərəfindən 6 mindən çox fərman və 14 mindən artıq sərəncam imzalanıb.

“Bu sənədlərin hər birinin ideyası, məzmunu və texniki əsaslandırılması birbaşa prezident tərəfindən hazırlanıb təqdim edilmir. Dövlət idarəetməsinin mahiyyəti də məhz bundan ibarətdir. Bəzi məsələlər üzrə siyasi iradə və birbaşa göstəriş ölkə başçısından gəlir, lakin qərarların böyük hissəsi aidiyyəti qurumlar tərəfindən hazırlanır, əsaslandırılır, razılaşdırılır və təqdim edilir”, – deyə o bildirib.

Eldəniz Əmirovun sözlərinə görə, dövlət idarəçiliyində “son imza kimindirsə, təşəbbüs də ondan gəlməlidir” yanaşması düzgün deyil.

İqtisadçı qeyd edib ki, Milli Məclis, Nazirlər Kabineti, mərkəzi və yerli icra hakimiyyəti orqanları, dövlət agentlikləri, komitələr, xidmətlər və digər dövlət qurumları yalnız qərarların icraçısı funksiyasını daşımır. Bu qurumlar eyni zamanda problemləri müəyyənləşdirən, təşəbbüslər hazırlayan, əsaslandırmalar təqdim edən və təkliflərlə çıxış edən institusional mexanizmlərdir.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

“Dövlət idarəçiliyinin keyfiyyəti də məhz bununla ölçülür. Problemlər yalnız sosial narazılıq yarandıqdan və ya ictimai müzakirə predmetinə çevrildikdən sonra gündəmə gətirilməməlidir. Dövlət institutları cəmiyyətin ehtiyaclarını əvvəlcədən müəyyən etməli, onları təhlil etməli və müvafiq təşəbbüslərlə çıxış etməlidir”, – deyə ekspert vurğulayıb.

E.Əmirov hesab edir ki, belə təşəbbüslərin mütləq şəkildə ictimailəşdirilməsi də vacib deyil. Onun fikrincə, bir çox məsələlər peşəkar əsaslandırmalarla aidiyyəti dövlət qurumlarına təqdim oluna bilər və bu, institusional məsuliyyətin tərkib hissəsidir.

İqtisadçı ekspert sonda bildirib ki, dövlət idarəçiliyində “bu məsələ bizlik deyil” yanaşması passiv müdafiə mövqeyindən başqa bir şey deyil:

“Effektiv idarəetmə sistemi məsuliyyəti bir-birinin üzərinə atan deyil, təşəbbüs göstərən və problemlərin həllinə yönələn institutlar üzərində qurulur”.