Asif Nərimanlı: 5 günlük möhlətin məqsədi var 

Politoloq Asif Nərimanlı ABŞ Prezidenti Donald Trampın Tehranla bağlı son açıqlamalarını və İranın enerji infrastrukturu ilə bağlı mümkün hücumların “5 günlük təxirə salınması” məsələsini şərh edib.

Citypost.az xəbər verir ki, politoloq bildirib ki, Trampın Tehranın israrla təkzib etdiyi “münaqişəyə son qoymaqla bağlı məhsuldar danışıqlar aparılıb” açıqlaması, eləcə də İranın enerji resursları və elektrik stansiyalarına zərbələrin “5 günlük təxirə salınması” bir-biri ilə əlaqəli olan birdən çox məqsədə hesablanmış diplomatik manevr kimi qiymətləndirilə bilər.

Asif Nərimanlının sözlərinə görə, bu addım ilk növbədə enerji bazarındakı böhranlı vəziyyətə təsir etmək məqsədi daşıyır. Politoloq hesab edir ki, Trampın açıqlamasından sonra neft qiymətlərində müşahidə edilən enmə də bunu deməyə əsas verir. Onun fikrincə, Vaşinqton bazarın ən azı “5 gün nəfəs alması”nı və bu müddətdə Hörmüz boğazı problemini həll etməyin yollarını axtarmaq imkanı qazanmaq istəyir.

Politoloq ikinci məqsədin zaman qazanmaq olduğunu vurğulayıb. O qeyd edib ki, ABŞ-ın raket arsenalında itkilərin bərpasına ehtiyac var. Bununla yanaşı, müharibənin gedişatı ilə bağlı – yeni fazaya keçilməsi, yaxud ilkin hədəflərlə kifayətlənmək barədə qərarın verilməsi də bu müddətdə müəyyənləşdirilə bilər.

Asif Nərimanlı bildirib ki, üçüncü məqsəd həm ABŞ daxilində, həm də beynəlxalq müstəvidə müharibəyə qarşı olan mövqelər qarşısında Vaşinqtonun siyasi mövqeyini gücləndirməkdir. Onun fikrincə, ABŞ administrasiyası bir tərəfdən dialoq tərəfdarı kimi çıxış edir, digər tərəfdən isə İranın qəbul etməyəcəyi şərtləri, o cümlədən Hörmüz boğazının açılması ilə bağlı əvvəlki tələbləri gündəmə gətirməklə “müharibəni bitirməyə çalışdığı” görüntüsünü formalaşdırır. Politoloq hesab edir ki, Tehranın bu şərtləri qəbul etməməsi hücumların yeganə “çıxış yolu” olduğu arqumentini gücləndirə bilər.Burada maraq doğuran məqamlardan biri danışıqlarda İranı təmsil edən şəxs kimi parlamentin spikeri Məhəmməd Bağır Qalibafın adının hallandırılmasıdır. Onun sözlərinə görə, Qalibafın adının dövriyyəyə buraxılması onu birbaşa SEPAH-ın hədəfinə çevirə bilər.

Həmçinin oxuyun

Prezident ailəsini şantaj edən Fərid Salmanov KİMDİR?

TƏBİB Səhiyyə Nazirliyinə birləşdirilir - İslahatlar DAVAM EDƏCƏK 

"Bütövlük nəğməsi"  - Sayman Aruzun ŞEİRİ

DAHİ – Şəmsi Vəfadarın YAZISI  

Politoloq bunun iki mümkün səbəbinin ola biləcəyini qeyd edib. Birinci ehtimala görə, əgər Qalibafın adının hallanması Vaşinqtonun məlumatı çərçivəsində baş veribsə, ABŞ və İsrail bununla İran hakimiyyəti daxilində ziddiyyətləri dərinləşdirmək və qarşıdurma yaratmaq istəyir. İkinci ehtimala görə isə, mövcud şərtlərdə müharibənin bitməsini istəməyən İsrail Qalibafı SEPAH-ın hədəfinə çevirməklə ABŞ-ın danışıqlar planını pozmağa çalışır.

Asif Nərimanlı əlavə edib ki, İran rəhbərliyində növbəti “qurban” Məhəmməd Bağır Qalibaf ola bilər. Onun qənaətincə, Trampın qeyd etdiyi “5 günlük müddət” ərzində müharibənin sonrakı istiqaməti müəyyənləşəcək.

Yeganə