Eldəniz Əmirov: “Hörmüz boğazında ən real ssenari nəzarətli qeyri-normallıqdır”  

İqtisadçı-ekspert Eldəniz Əmirov Hörmüz boğazı ətrafında yaranmış vəziyyətlə bağlı proqnozlarını açıqlayıb.

Citypost.az xəbər verir ki, ekspertin sözlərinə görə, Hörmüz boğazının tam və uzunmüddətli bağlanması əsas ssenari deyil. Ekspert hesab edir ki, daha real ehtimal boğazın yaxın günlərdə və həftələrdə tam açıq marşrut kimi deyil, seçici və riskli “idarə olunan keçid zonası” kimi fəaliyyət göstərməsidir:“Yəni hüquqi baxımdan boğaz tam qapanmış görünməyə bilər, amma iqtisadi baxımdan normal keçid bərpa olunmayacaq”.

Eldəniz Əmirov bildirir ki, bu yanaşma BMT Təhlükəsizlik Şurası və Beynəlxalq Dəniz Nəqliyyatı Təşkilatı ünvanlanan son məktubların məzmunu ilə də uyğunluq təşkil edir.

Ekspertin baza ssenarisinə görə, martın sonu və ya aprelin ilk yarısında boğazda qismən hərəkət bərpa oluna bilər. Lakin bu proses qeyri-bərabər olacaq: bəzi gəmilər keçə biləcək, digərləri isə gözləməli olacaq. Bununla yanaşı, sığorta haqları və daşınma xərcləri yüksək səviyyədə qalacaq, hərbi-siyasi gərginlikdən asılı olaraq isə fasilələr də mümkündür. “‘Açıldı’ xəbəri gəlsə belə, bu, ‘normallaşdı’ demək olmayacaq”, – deyə o vurğulayıb.

Həmçinin oxuyun

Prezident ailəsini şantaj edən Fərid Salmanov KİMDİR?

TƏBİB Səhiyyə Nazirliyinə birləşdirilir - İslahatlar DAVAM EDƏCƏK 

"Bütövlük nəğməsi"  - Sayman Aruzun ŞEİRİ

DAHİ – Şəmsi Vəfadarın YAZISI  

Eldəniz Əmirov daha kəskin risk ssenarisinə də diqqət çəkərək qeyd edib ki, İran “qeyri-düşmən gəmi” formulunu sərtləşdirərsə, keçid faktiki olaraq siyasi filtrə bağlana bilər. Bu halda boğaz hüquqi olaraq açıq qalsa da, kommersiya baxımından yarıblokada rejimi formalaşacaq.

Ekspertə görə, ən aşağı ehtimallı, lakin ən ağır nəticəli ssenari isə apreldə daha geniş regional eskalasiyadır. Bu vəziyyətdə neft bazarında təkcə qiymət artımı deyil, həm də fiziki çatdırılma böhranı yarana bilər. O qeyd edib ki, bu ssenari əsas ehtimal olmasa da, bazar qiymətlərində artıq bu risk hiss olunur.

Yekunda Eldəniz Əmirov vurğulayıb ki, Hörmüz boğazının yaxın perspektivdə “tam açılma” ilə “tam bağlanma” arasında qalacağı gözlənilir:“Ən real ssenari odur ki, boğaz aprel boyunca qismən işləsin, lakin siyasi icazələr, sığorta xərcləri, təhlükəsizlik və hərbi risklər səbəbindən bazara tam rahatlıq verməsin. Başqa sözlə, bu, tam blokada deyil, uzanan nəzarətli qeyri-normallıqdır”.