Ülviyyə Həmzəyeva: WUF13 Azərbaycanın qlobal nüfuzunu artıracaq

WUF13 - Azərbaycanın qlobal tədbirlərə uğurla ev sahibliyi etməsi artıq təsadüfi hadisə deyil, düşünülmüş dövlət strategiyasının nəticəsidir.

Müasir dövrdə beynəlxalq tədbirlərə uğurlu ev sahibliyi etmək dövlətlərin həm siyasi nüfuzunu, həm iqtisadi imkanlarını, həm də idarəçilik potensialını nümayiş etdirən əsas göstəricilərdən birinə çevrilib. Azərbaycan isə son illərdə bu istiqamətdə əldə etdiyi uğurlarla regionun deyil, dünyanın diqqət mərkəzində yer alan ölkələrdən biri kimi çıxış edir. BMT-nin ən nüfuzlu platformalarından hesab olunan Ümumdünya Şəhərsalma Forumunun 13-cü sessiyasının — WUF13-ün məhz Bakıda keçirilməsi də bunun parlaq nümunəsidir.

Mayın 12-də Azərbaycan Prezidenti İlham Əliyev tərəfindən Bakı Olimpiya Stadionu ərazisində forumla bağlı hazırlıq işlərinə baxış keçirilməsi Azərbaycanın bu mühüm tədbirə xüsusi önəm verdiyini və təşkilati proseslərin ən yüksək standartlar əsasında aparıldığını göstərir. Bu forum təkcə şəhərsalma mövzularının müzakirəsi üçün platforma deyil, eyni zamanda Azərbaycanın beynəlxalq mövqeyinin, strateji baxışının və gələcək inkişaf modelinin təqdimatı baxımından mühüm hadisədir.

WUF13-ün Bakıda təşkil olunması ilk növbədə Azərbaycanın son illərdə həyata keçirdiyi uğurlu şəhərsalma siyasətinin beynəlxalq səviyyədə qəbul edildiyini göstərir. İşğaldan azad edilmiş Qarabağ və Şərqi Zəngəzurda aparılan yenidənqurma işləri artıq dünyada müasir urbanizasiya nümunəsi kimi qiymətləndirilir. “Ağıllı şəhər” və “ağıllı kənd” konsepsiyalarının tətbiqi, yaşıl enerji həlləri, rəqəmsal idarəetmə sistemləri və ekoloji yanaşmalar Azərbaycanın gələcəyə hesablanmış inkişaf modelini ortaya qoyur.

Xüsusilə Qarabağda həyata keçirilən layihələr təkcə bərpa prosesi deyil, yeni həyat modelinin qurulması kimi diqqət çəkir. Müasir texnologiyalarla formalaşdırılan yaşayış məntəqələri, dayanıqlı enerji infrastrukturu və innovativ idarəetmə sistemləri forum iştirakçılarına Azərbaycanın necə sürətlə dəyişdiyini və inkişaf etdiyini nümayiş etdirəcək.

Forumun təşkilati miqyası da diqqətəlayiqdir. Bakı Olimpiya Stadionu ətrafında yaradılan geniş tədbir zonası, yüzlərlə paralel sessiyanın keçirilməsi üçün qurulan müasir infrastruktur, minlərlə iştirakçının rahat şəkildə qəbul olunması üçün hazırlanan logistika sistemi Azərbaycanın böyük beynəlxalq tədbirləri yüksək peşəkarlıqla idarə etdiyini sübut edir. Bu gün Bakı artıq beynəlxalq forumlar, sammitlər və qlobal tədbirlər üçün etibarlı platformaya çevrilib.

WUF13 həm də Azərbaycanın diplomatik imkanlarının göstəricisidir. Dünyanın müxtəlif ölkələrindən dövlət nümayəndələrinin, ekspertlərin, investorların və beynəlxalq təşkilatların bir araya gəlməsi ölkəmizin beynəlxalq dialoq mərkəzi rolunu daha da gücləndirəcək. Xüsusilə WUF tarixində ilk dəfə Liderlər Sammitinin proqram çərçivəsinə daxil edilməsi Bakıya göstərilən yüksək etimadın açıq ifadəsidir.

Forumun digər mühüm tərəfi isə iqtisadi və turizm baxımından yaradacağı imkanlardır. On minlərlə xarici qonağın Azərbaycana səfəri hotellər, restoranlar, nəqliyyat, xidmət və ticarət sahələrində ciddi canlanma yaradacaq. Bu tədbir ölkəmizin MICE turizmi istiqamətində mövqelərini daha da gücləndirəcək və Bakının beynəlxalq konqres şəhəri kimi nüfuzunu artıracaq.

Bundan əlavə, forum çərçivəsində təşkil olunacaq sərgilər, “Urban Expo” məkanları və milli memarlıq elementlərini əks etdirən xüsusi dizayn konsepsiyası xarici qonaqlara Azərbaycanın mədəni irsini və müasir inkişafını bir arada görmək imkanı yaradacaq. Bu isə ölkəmizin beynəlxalq turizm brendinin daha da güclənməsinə xidmət edəcək.

Azərbaycanın qlobal tədbirlərə uğurla ev sahibliyi etməsi artıq təsadüfi hadisə deyil, düşünülmüş dövlət strategiyasının nəticəsidir. WUF13 də həmin strategiyanın mühüm hissəsi olmaqla Azərbaycanın beynəlxalq nüfuzunu daha da artıracaq, ölkəmizin müasir şəhərsalma, innovasiya və dayanıqlı inkişaf sahəsində qabaqcıl dövlətlər sırasında yer aldığını bir daha nümayiş etdirəcək.

Ülviyyə Həmzəyeva

Millət vəkili

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı