Təzyiq dərmanlarını nizamsız qəbul etmək hansı təhlükələrə səbəb olur?

Arterial hipertoniyadan əziyyət çəkən insanların ən çox yol verdiyi səhvlərdən biri təzyiq dərmanlarını yalnız təzyiq yüksələndə qəbul etmək, özlərini yaxşı hiss etdikdə isə müalicəni dayandırmaqdır. Halbuki mütəxəssislər xəbərdarlıq edirlər ki, bu yanaşma ciddi və həyati təhlükə yaradan fəsadlara səbəb ola bilər.

Citypost.az xəbər verir ki, bir çox insanlar “təzyiqim normaldırsa, dərmana ehtiyac yoxdur” düşüncəsi ilə hərəkət edirlər. Əslində isə təzyiqin normal səviyyədə qalmasının əsas səbəbi məhz qəbul edilən dərmanların təsiridir. Dərmanların özbaşına dayandırılması və ya qeyri-müntəzəm qəbulu qan təzyiqinin qəfil dəyişməsinə gətirib çıxara bilər.

Mütəxəssislərin sözlərinə görə, təzyiq dərmanlarının nizamsız istifadəsi hipertonik krizlərin yaranmasına səbəb olan əsas amillərdən biridir. Belə hallarda arterial təzyiq 220 mm civə sütununa, bəzən isə daha yüksək göstəricilərə qədər yüksələ bilir. Bu isə insan həyatı üçün son dərəcə təhlükəli vəziyyət hesab olunur.

Hipertonik kriz zamanı güclü baş ağrıları, başgicəllənmə, ürəkbulanma, görmə pozğunluğu, nəfəs darlığı, sinə ağrıları və ümumi halsızlıq müşahidə edilə bilər. Bəzi hallarda isə insult, infarkt və digər ağır fəsadların yaranma riski əhəmiyyətli dərəcədə artır.

Həkimlər vurğulayırlar ki, arterial hipertenziya xroniki xəstəlikdir və onun müalicəsi davamlı olmalıdır. Dərmanlar yalnız təzyiq qalxdıqda deyil, həkimin müəyyən etdiyi sxem üzrə hər gün qəbul edilməlidir.

Çünki təzyiqin bir gün yüksək, bir gün isə aşağı olması damar sisteminə əlavə yük yaradır. Qan damarları bu dəyişikliklərə uyğunlaşa bilmədikdə onların elastikliyi azalır, ürək daha çox işləməyə məcbur olur və nəticədə ürək-damar xəstəliklərinin inkişaf ehtimalı artır.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Mütəxəssislər bildirirlər ki, bəzi pasiyentlər “bu gün təzyiqim yoxdur, dərman içməyim”, “sabah qəbul edərəm” prinsipi ilə hərəkət edirlər. Bu cür qeyri-müntəzəm yanaşma isə müalicənin effektivliyini tamamilə pozur.Daha təhlükəli məqamlardan biri də odur ki, təzyiq qəfil yüksəldikdə adi şəraitdə istifadə olunan dərmanlar bəzən lazımi effekti göstərmir. Çünki orqanizm davamlı və stabil müalicəyə uyğunlaşdığı halda, kəskin dəyişikliklər zamanı vəziyyətin idarə olunması çətinləşir.

Buna görə də həkimlər hər bir pasiyentə öz orqanizminə uyğun seçilmiş preparatları gündəlik və eyni saatlarda qəbul etməyi tövsiyə edirlər.Dərmanların dozasını azaltmaq, dəyişdirmək və ya dayandırmaq yalnız müalicə həkiminin qərarı ilə həyata keçirilməlidir.

Bundan əlavə, sağlam qidalanma, duz qəbulunun azaldılması, müntəzəm fiziki aktivlik, siqaret və alkoqoldan uzaq durmaq da arterial təzyiqin nəzarətdə saxlanılmasında mühüm rol oynayır.

Nəticə etibarilə, hipertoniya xəstələri təzyiq dərmanlarını yalnız özlərini pis hiss etdikdə deyil, daimi müalicə vasitəsi kimi qəbul etməlidirlər. Müntəzəm müalicə həm hipertonik krizlərin, həm də infarkt, insult və digər ağır ürək-damar fəsadlarının qarşısını almağın ən etibarlı yoludur.

Yeganə