Gözəl dişlər həmişə sağlam dişlər demək deyil - Həkim DANIŞDI

İnsanlar arasında ünsiyyət zamanı ən çox narahatlıq yaradan məqamlardan biri də ağız qoxusudur. İlk təəssüratı dəyişdirən, sosial münasibətlərə mənfi təsir göstərən bu problem bir çox hallarda ciddi sağlamlıq göstəricisi ola bilər. 

Citypost.az xəbər verir ki, mütəxəssislər bildirirlər ki, ağız qoxusunun yaranma səbəblərinin böyük əksəriyyəti məhz diş və ağız boşluğu ilə bağlı problemlərdən qaynaqlanır.

Stomatoloqların sözlərinə görə, halların təxminən 70 faizi diş çürükləri, diş daşı, diş əti iltihabı, düzgün aparılmayan ağız gigiyenası və digər stomatoloji problemlərlə əlaqəlidir. Buna görə də ağız qoxusunu yalnız kosmetik narahatlıq kimi deyil, tibbi problem kimi qiymətləndirmək lazımdır.

Mütəxəssislər qeyd edirlər ki, insanın xarici görünüşü, geyimi və ümumi baxımı nə qədər mükəmməl olsa belə, ağızdan gələn xoşagəlməz qoxu ətrafdakılarda tamamilə fərqli təəssürat yarada bilər. Bir çox insanlar qarşı tərəflə ünsiyyət zamanı məhz bu səbəbdən özlərini geri çəkir və münasibətlərdə müəyyən məsafə yaranır.

Bununla yanaşı, stomatoloqlar diş həkimi qorxusunun da cəmiyyətdə geniş yayıldığını bildirirlər. Onların fikrincə, bu qorxunun kökündə illərlə formalaşmış psixoloji amillər dayanır. Keçmiş dövrlərdə keyləşdirici vasitələrin zəif olması, müalicə üsullarının indiki qədər inkişaf etməməsi və uşaqların həkimlə qorxudulması insanların şüuraltında mənfi təsəvvürlər formalaşdırıb.

Mütəxəssislər vurğulayırlar ki, bir çox valideynlər uzun illər uşaqlara “özünü yaxşı aparmasan, səni həkimə apararıq”, “dişlərini çəkərlər” kimi ifadələr işlədiblər. Bu isə zaman keçdikcə stomatoloqa qarşı səbəbsiz qorxu və narahatlıq yaradıb. Nəticədə insanlar heç bir ağrı hiss etmədikləri halda belə, diş həkiminə müraciət etməkdən çəkinirlər.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Lakin müasir stomatologiyada vəziyyət tamamilə dəyişib. Yeni texnologiyalar, güclü keyləşdirici vasitələr və pasiyentlə düzgün psixoloji yanaşma müalicə prosesini daha rahat və ağrısız edib. Artıq diş həkiminə müraciət etmək qorxu deyil, sağlamlığın qorunması üçün vacib addım hesab olunur.

Stomatoloqlar bildirirlər ki, dişlərin zahirən sağlam və estetik görünməsi onların tam sağlam olması anlamına gəlmir. Bəzən dişlərin altında gizli çürüklər, diş əti problemləri, infeksiyalar və ya ağız boşluğunda digər patologiyalar mövcud olur. Bu səbəbdən yalnız vizual baxışla hər hansı problemin olub-olmadığını müəyyən etmək mümkün deyil.

Mütəxəssislər hər bir şəxsin ildə ən azı iki dəfə profilaktik stomatoloji müayinədən keçməsini tövsiyə edirlər. Erkən aşkarlanan problemlər daha asan və daha az xərc tələb edən üsullarla aradan qaldırılır, həmçinin ağız qoxusu kimi sosial narahatlıqlara da son qoyulur.

Həkimlər hesab edirlər ki, sağlam və xoş qoxulu ağız boşluğu yalnız estetik görünüş deyil, eyni zamanda ümumi sağlamlığın ayrılmaz hissəsidir. Buna görə də dişlərdə ağrı olmasa belə, mütəmadi müayinələr və düzgün gigiyena qaydalarına əməl etmək hər bir insan üçün vacibdir.

Yeganə