Tural İrfan: Məzhəbçilik cəmiyyətin milli birliyi üçün ciddi təhlükəyə çevrilə bilər  

Milli Cəbhə Partiyası sədrinin müavini, siyasi şərhçi və dinşünas Tural İrfan Azərbaycanda məzhəbçilik meyllərinin ictimai-siyasi müstəvidə daha qabarıq şəkildə özünü göstərdiyini bildirib.

Citypost.az xəbər veriri ki, o, sosial şəbəkə hesabında paylaşdığı fikirlərdə qeyd edib ki, dini fəaliyyətlə məşğul olan şəxslərin və ilahiyyatçıların bir qismi obyektiv və qərəzsiz mövqe nümayiş etdirmək əvəzinə, məzhəb təəssübkeşliyi ilə çıxış edir.

T.İrfanın sözlərinə görə, tarixən mövcud olan məzhəb ayrılıqları müsəlman cəmiyyətlərində parçalanmalara və qarşıdurmalara səbəb olsa da, bu ənənənin davam etdirilməsi yolverilməzdir. O vurğulayıb ki, hər kəs öz inancına uyğun məzhəbə əməl etmək hüququna malikdir, lakin yalnız öz mövqeyini haqq hesab edib başqalarını inkar etmək təhlükəli yanaşmadır və tolerantlıq prinsiplərinə ziddir.

Dinşünas bildirib ki, məzhəbçilik artıq yalnız dini müstəvi ilə məhdudlaşmır, siyasi proseslərin və tarixi hadisələrin qiymətləndirilməsində də özünü göstərir. Onun fikrincə, bəzi ictimai fəallar, ekspertlər və media nümayəndələri tarixə, siyasətə və ictimai proseslərə məzhəb prizmasından yanaşaraq cəmiyyətdə parçalanma meyllərini gücləndirirlər.

T.İrfan qeyd edib ki, sosial şəbəkələrdə və televiziya efirlərində çıxış edən bəzi şəxslər tarixçi, politoloq, sosioloq və ya jurnalist kimi təqdim olunsalar da, fəaliyyətlərində məzhəb təbliğatı aparır, fərqli düşüncəyə malik insanlara qarşı ayrı-seçkilik nümayiş etdirirlər.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

O hesab edir ki, bu cür yanaşmaların genişlənməsi gələcəkdə dövlət idarəçiliyində də məzhəb amilinin rol oynaması riskini yarada bilər. Dinşünasın fikrincə, vətəndaşlara münasibətdə dini mənsubiyyət əsasında fərq qoyulması dövlətçilik prinsipləri və milli həmrəylik üçün ciddi təhlükədir.

T.İrfan həmçinin bildirib ki, məzhəbçilik və dini zəmində nifaqı tənqid edən şəxslərə qarşı müəyyən qruplar tərəfindən təşkilatlanmış təzyiq kampaniyaları aparılması halları da müşahidə olunur. O vurğulayıb ki, belə tendensiyalar cəmiyyətin vəhdətinə zərbə vurur və milli maraqlara uyğun deyil.

Siyasi şərhçi hazırkı vəziyyətin davam edəcəyi təqdirdə, məzhəbçilik təbliğatı aparan şəxslərin fəaliyyətini daha ətraflı ictimaiyyətin diqqətinə çatdıracağını da bildirib.

Yeganə