KÖHNƏQALALI NATİQİN DİPLOMATİYASI  

Yadınızdadırmı, bilə-bilə ki, Qarabağı erməniyə ruslar verib, yenə dərdimizi gedib Kremlə danışmaq istəyirdik. Sonra şikayətimizi bala-bala Avropa ölkələrinə elədik. Onlar da deyirdi ki, əşi, bir balaca torpaq üstündə bir-birinizi qırmayın, erməni əzabkeş millətdir, verin getsin. Neft daşımağa gələnlər dedi ki, ucuz versəniz, Qarabağı qaytarmaqda sizə yardım edərik. Dərhal razılaşdıq. Başladılar bizi ora-bura dəvət eləməyə. O sammit sənin, bu yığıncaq mənim... Dünyada nə qədər mənasız təşkilat var, hamısının yığıncağında ciddi çıxışlar elədik. Onlar da bizə guya çox ciddi qulaq asırdı. Nə qədər məruzəçilər, nə qədər monitorinq qrupları...

Hələ ATƏT-in Minsk Qrupu! Bizim torpaq problemimizi gör kimlər həll eləyir? Amerika - bir xristian ölkəsidir, erməniləri qürbətdə qalan qardaşı kimi sevir. Fransa - erməniyə qan qardaşım deyir. Rusiya - millətimizi qıraraq əlimizdən torpağı alıb erməniyə verib. Nə vaxtdır bu üçlük başımıza corab hörür. Bu illərdə bir dəfə də olsun yığılıb bir xalq şəklində “Qarabağ!” sözünü qışqırmamışıq. Ancaq lap təzə bir ümid yeri tapmışıq. Qazax Kanat Saudabayev ATƏT-in növbətçi sədridir. Hə, nolsun? Tutaq ki, Kanat əkə də növbəti dəfə təşkilatın üzv ölkələrinə məktub göndərdi ki, ermənilər Qarabağdan çıxmalıdır. Nə dəyişəcək?

Artıq Qarabağ yanğısını yaşayanların bir qismi dünyasını dəyişib, bir qismi qocalıb əldən düşüb, axırıncı qismi isə qocalır, özü də çox pis qocalır. Gələnlər isə dediyim o yeniyetmələrdir, onlar da Qarabağı tanımır. Əslən qarabağlı tələbə oğlan bir məclisdə bizə dedi ki, Qarabağ mənim nəyimə gərəkdir. Mən onu qınamıram. Bizdə İrəvanın, Zəngəzurun, Göyçənin itməsinə immunitet yaranıbsa, onlarda da Qarabağın itməyinə yaranacaq.

Qarabağ uğrunda aparılan mənasız diplomatik danışıqlar arasında yeganə bir söhbəti bəyənmişəm. O söhbəti də mənim köhnəqalalı dostum Natiq aparıb. Natiq deyir ki, Rusiyanın İrkutsk şəhərində bazarda alver eləyirdim. Yaxın bir binada Seryoja adlı rusun ikiotaqlı mənzilinin bir otağını kirayələmişdim. Axşamlar evə ərzağı həmişə mən alıb aparırdım. Sözsüz ki, araq almağı da unutmurdum. 90-cı illərin söhbətidir. İkimiz evdə yeyib-içirdik. Söhbət hərlənib-fırlanıb Qafqazdakı vəziyyətdən və Qarabağdan düşdü. Natiq deyir, Seryoja üzümə dirəndi ki, yox ey, oralar erməni torpağıdır, gərək siz Qarabağı çoxdan onlara verəydiniz. Mən də, deyir, bunu başa salıram ki, a kopayoğlu, erməni ora müharibədən sonra, sərhədlər bağlananda İrandan, Türkiyədən qaçqın kimi gəlib. Bizim də yazığımız gəlib, siz  rusların köməyi ilə onları öz evlərimizdə, torpaqlarımızda yerləşdirmişik. Zaman keçəndən sonra deyirlər ki, bura bizim babalarımızın olub, başımıza bu oyunu açıblar.

Nə isə, rusu uzun-uzadı başa salıram. Bu da dirənib ki, elə şey ola bilməz, necə sənin evinə girib, torpağını alıb. Natiq deyir, bildim ki, ermənilər nə vaxtsa bunun başını yeyib ayrı cür başa salıblar. Gördüm, ortada araq da qurtarıb. Pul verdim, dedim, get, bir araq al gətir, səni başa salacam. Seryoja sevincək çıxdı. Gecələr də, deyir, arağı yalnız alverçidən alırdıq. Qış vaxtıdır, çöldə şaxta adamı kəsir. Yarım saat keçməmiş, bir də gördüm Seryoja qapının zəngini basır. Mən qapını açmıram. Yalançılar sözü, Seryoja 5 dəqiqə zəngi çaldı, açmadım. Elə bilirdi ki, içəridə yatmışam. Başladı qapını təpiklə döyməyə: “Tolik, aç, Tolik!” Mənə də Tolik deyirdi. Yaxınlaşdım qapıya, “kimdi?” - dedim. Seryoja sevincək dedi ki, Tolik, a belə şələ, mənəm, Seryojadı, aç, dondum bayırda! Dedim, Seryoja kimdi. Bağırdı ki, Tolik, zarafat vaxtı deyil, qapını aç. Dedim, mən Seryoja adlı adam tanımıram. Qışqırdı ki, Tolik, mənəm, evin sahibi! Dedim, nə evin sahibi, bu evin sahibi mənəm! “Bəs milisə şikayət edəcəm” - dedi. Dedim, get, kimə istəyirsən şikayət elə.

Nə isə, onu yarım saat qapı ağzında ləlitdim. Axırda qapını açdım. Titrəyə-titrəyə özünü içəri saldı. Mənə cumdu ki, sən dəlimi olmusan. Dedim, otur, səbəbini deyəcəm. Yüz-yüz süzəndən sonra dedim ki, bax, ermənilər Qarabağa belə girib. İndi də deyirlər, bura bizimdir.

Natiq and içir ki, Seryoja hər badəni qaldırdıqca başını bulaya-bulaya erməniləri söyürdü...

Həmçinin oxuyun

SEVGİ VƏ HƏYATIN MÜQƏDDƏSLİYİ  

Məcburi Sevginin Qurbanları…

MEYXANAYA “YOX!” DEMƏYİN VAXTIDIR!  

Şahin Qurbanovdan xəbər var...