Təhqir ve böhtan zarafat deyil – Qanun nə deyir?

Məni təhqir edən şəxsdən təzminat ala bilərəm?

Sosial şəbəkələrin və rəqəmsal medianın həyatımızın ayrılmaz hissəsinə çevrildiyi bir dövrdə söz azadlığı ilə məsuliyyət arasındakı sərhəd getdikcə daha çox pozulur. Bir çox hallarda şəxsi münasibətlər, emosional çıxışlar və ya qərəzli yanaşmalar ictimai məkana daşınaraq insanların şərəf və ləyaqətinə zərbə vurur. Halbuki, ifadə azadlığı heç vaxt başqasının nüfuzunu ləkələmək, şəxsiyyətini alçaltmaq və ya cəmiyyətdə hörmətdən salmaq hüququ anlamına gəlmir. Məhz bu nöqtədə qanun işə düşür və şərəf, ləyaqət və nüfuzun müdafiəsini təmin edir.

Citypost.az-ın məlumatına görə, şərəf, ləyaqət və nüfuz insanın cəmiyyətdəki mənəvi dəyərini müəyyən edən əsas anlayışlardır və Azərbaycan Respublikasında bu dəyərlər dövlət tərəfindən qorunur. Konstitusiyanın 46-cı maddəsinə əsasən hər kəs öz şərəf və ləyaqətini müdafiə etmək hüququna malikdir və insan ləyaqətinin alçaldılmasına, təhqirə və qeyri-insani rəftara yol verilə bilməz.

Qanunvericiliyə görə şərəf və ləyaqətə qarşı yönəlmiş əməllər cinayət məsuliyyəti yaradır. Cinayət Məcəlləsinin 148-ci maddəsinə əsasən təhqir — kütləvi çıxışlarda, mediada və ya sosial şəbəkələrdə şəxsin şərəf və ləyaqətinin nalayiq formada qəsdən alçaldılmasıdır. Bu əmələ görə 500 manatdan 1 000 manatadək cərimə, 240 saata qədər ictimai işlər, 1 ilədək islah işləri və ya 1 ilədək azadlıqdan məhrumetmə cəzası nəzərdə tutulur. Təhqir kütləvi informasiya vasitələri və internet resursları vasitəsilə törədildikdə isə azadlıqdan məhrumetmə müddəti 3 ilədək arta bilər.

Cinayət Məcəlləsinin 147-ci maddəsinə görə böhtan — yalan olduğunu bilə-bilə şəxsin şərəf və ləyaqətini ləkələyən və ya nüfuzdan salan məlumatların yayılmasıdır və bu daha ağır cinayət hesab olunur. Böhtana görə 1 000 manatdan 1 500 manatadək cərimə, 2 ilədək islah işləri və ya 3 ilədək azadlıqdan məhrumetmə nəzərdə tutulur. Əgər böhtan media və sosial şəbəkələr vasitəsilə kütləvi şəkildə yayılarsa, təqsirli şəxs 5 ilədək həbs cəzası ilə üzləşə bilər.

Həmçinin oxuyun

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Bu cinayətlərə görə məsuliyyət 16 yaşdan başlayır. Sosial şəbəkələrdə saxta profillərdən istifadə etməklə təhqir və böhtan yayılması istintaq zamanı ağırlaşdırıcı hal kimi qiymətləndirilir. Şərəfi, ləyaqəti və nüfuzu zədələnən şəxs xüsusi ittiham qaydasında məhkəməyə müraciət edə, eyni zamanda ona vurulmuş maddi və mənəvi zərərin ödənilməsini tələb edə bilər.

Nəticə etibarilə, şərəf və ləyaqət toxunulmaz hüquqlardandır və bu dəyərlərə qarşı yönəlmiş istənilən təhqir və böhtan xarakterli əməllər qanunla qadağandır. Media və sosial şəbəkələrdə edilən bu cür hərəkətlər ciddi cinayət məsuliyyəti yaradır və ağır hüquqi nəticələrə səbəb olur.