Eldəniz Əmirov: Azərbaycan insanı çox yemir, bahalı yeyir

İqtisadçı Eldəniz Əmirov əhalinin ərzaq xərcləri ilə bağlı açıqlama verib.

Citypost.az xəbər verir ki, ekspert  bildirib ki, əhali bu ilin ilk 3 ayında pərakəndə ticarət şəbəkəsində 15,9 milyard manatdan çox vəsait xərcləyib. Bunun 8 milyard 774,9 milyon manatı, yəni 50,4 faizi ərzaq məhsullarının payına düşür.

İqtisadçının sözlərinə görə, bu rəqəmi 10 milyon əhali üzrə adambaşına bir aylıq hesabladıqda bir nəfər üçün təxminən 290–300 manat edir. Bu göstəriciyə əsasən ilk baxışda əhalinin çox istehlak etdiyi qənaəti yaransa da, məsələ bundan ibarət deyil.

E.Əmirov qeyd edib ki, iqtisadiyyatda Engel qanununa görə, gəlir səviyyəsi aşağı və ya orta olduqda ərzağın xərclərdə payı yüksək olur, gəlir artdıqca isə bu pay azalır. Bu baxımdan təxminən 50 faiz göstərici orta və aşağı gəlirli ölkələr üçün xarakterik struktur göstəricisidir.

O vurğulayıb ki, statistikanın daha incə tərəfi də var: “Azərbaycan insanı çox yemir, Azərbaycan insanı bahalı yeyir. Yəni aylıq 300 manatlıq ərzaq xərci beynəlxalq müqayisədə yüksək məbləğ deyil. Amma həmin məbləğin ümumi xərclərdə payı yüksəkdir”.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

İqtisadçı əlavə edib ki, bunun səbəbi yalnız istehlak deyil, eyni zamanda ərzaq məhsullarının qiymətləri, idxaldan asılılıq və bazarın xüsusiyyətləri nəticəsində eyni gəlirlə daha çox vəsait xərclənməsidir. Onun fikrincə, ərzaq xərcləri alternativsiz xərclərdir və insanlar bu xərcləri azaltmaq imkanına malik deyil, digər xərclər isə daha elastikdir.Nəticədə məbləğ baxımından orta səviyyə, pay baxımından isə yüksək göstərici yaranır.Bu mənzərəni anlamaq üçün sosial və mədəni faktorlar da nəzərə alınmalıdır. Azərbaycanda insanlar daha çox evdə qidalanır, gündəlik yeməklər əsasən ailə daxilində hazırlanır ki, bu da ərzaq xərclərinin payını artırır.Bununla yanaşı, qonaqpərvərlik ənənəsinin də rol oynadığını deyən iqtisadçı qeyd edib ki, qonaq qəbul etmək və süfrə mədəniyyəti ümumi xərclərə təsir göstərir. Lakin onun sözlərinə görə, bu amillər göstəriciyə yalnız bir neçə faiz bəndi səviyyəsində təsir edir.

Sonda E.Əmirov vurğulayıb ki, əhalinin xərclərində ərzaq məhsullarının payının azalmasının əsas şərti gəlirlərin artmasıdır. Bundan əlavə, idxaldan asılılığın azalması və bazarda qiymətlərin daha səmərəli formalaşması da mühüm amillər sırasındadır.

Yusif