Nadir Azəri: Rusiyanın imperiya siyasəti dəyişməyib

“Azərbaycan xalqı tarix boyu öz müstəqilliyi, azadlığı və torpaqlarının bütövlüyü uğrunda mübarizə aparıb. Müxtəlif imperiyalara qarşı gedən bu mübarizələr zamanı xalqımız qəhrəmanlığı və igid övladlarının fədakarlığı ilə seçilib. Tarixin ayrı-ayrı mərhələlərində fərqli imperiyaların nəzarəti altında qalsa da, Azərbaycan xalqı heç zaman azadlıq və müstəqillik ideallarından imtina etməyib”. 

Bunu Citypost.az-a “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, siyasi şərhçi Nadir Azəri deyib.

Onun sözlərinə görə, tarix boyu xalqımızın ən çox mübarizə apardığı imperiyalardan biri məhz Rusiya imperiyası olub: “Müxtəlif dövrlərdə fərqli adlar altında fəaliyyət göstərməsinə baxmayaraq, mahiyyət etibarilə imperiya siyasəti dəyişməyib. Bu siyasətin əsasını digər xalqları, xüsusilə də qonşu xalqları nəzarət altında saxlamaq, onların yeraltı və yürüstü sərvətlərini mənimsəmək xisləti təşkil edib. Təəssüf ki, bu yanaşmanın izlərini müasir dövrdə də görmək mümkündür. Çar Rusiyası dövrünü yaşamasaq da, sovet mərhələsində və müstəqillik illərində Rusiyanın imperiya və hegemonluq siyasətinin müxtəlif təzahürlərinin şahidi olmuşuq”.

Siyasi ekspert deyib ki, xüsusilə Ermənistanın Azərbaycana qarşı həyata keçirdiyi işğalçılıq siyasətinə Rusiyanın açıq və ya dolayı dəstək verməsi bu kontekstdə unudulmamalıdır: “1990-cı il 20 Yanvar faciəsinin mahiyyətində də imperiya düşüncəsinin və mərkəzdən idarə olunan zorakı siyasətin dayandığı aydın görünür. Həmin hadisə Azərbaycan xalqının azadlıq iradəsini qırmaq məqsədi daşıyırdı. Lakin əksinə, bu faciə xalqın müstəqillik əzmini daha da gücləndirdi və istiqlal yolunda dönüş nöqtəsinə çevrildi”.

Həmçinin oxuyun

Onlarla bağlı Prezidentə siyahı getdi - ADLAR 

Növbə Zaur Əliyevə çatdı  -    O, dəyəri 1 milyon manatdan baha olan villada yaşayır

Yaxın dostu Vüqar Qurbanova əyyaş dedi  

“Qorilla” Manaf Ağayevi rüsvay etdi  

Nadir Azəri qeyd edib ki, gələn həftə növbəti ildönümü olacaq Xocalı soyqırımı da, əslində elə  Rusiyanın imperiya siyasətinin qanlı nəticəsidir: “Fevralın 26-sı Xocalı soyqırımının ildönümüdür. Bu tarix təkcə erməni silahlı birləşmələrinin vəhşiliyini deyil, eyni zamanda onların arxasında dayanan xarici dövlət dəstəyini, yəni Rusiyanın imperya xislətinin növbəti formada təzühürünü də xatırladır. Tarixi faktlar açıq şəkildə göstərir ki, həmin gecə Xankəndidə yerləşən 366-cı motoatıcı alay ağır texnika və canlı qüvvə ilə hücumda birbaşa iştirak edib. Bu hərbi birləşmə formal olaraq sovet ordusuna məxsus olsa da, faktiki olaraq 1992-ci ildə artıq Rusiya Federasiyasının paytaxtı olan Moskvanın hərbi-siyasi maraqlarına xidmət edirdi. Elə 1990-cı illərin əvvəllərində Azərbaycan torpaqlarının işğalı da eyni siyasi xəttin davamı oldu. Ermənistanın hərbi potensialı və resursları təkbaşına belə genişmiqyaslı işğal aparmağa kifayət etmirdi. Silah, texnika, hərbi kadrlar və strateji koordinasiya olmadan Azərbaycan torpaqlarının ələ keçirilməsi mümkün deyildi. Yəni bu işğal birbaşa Kremlin maraqları ilə üst-üstə düşürdü”.

Nadir Azəri deyib ki, bu gün Azərbaycan xalqı həmin faciələri unutmur və unutmayacaq: “Tarixi yaddaş həm ədalətin bərpası, həm də gələcək nəsillərin həqiqəti bilməsi üçün vacibdir. Xocalı qurbanlarının ruhu qarşısında baş əyərkən bir həqiqəti də açıq şəkildə bəyan edirik: regionda sabitliyi pozan, münaqişələri qızışdıran və işğal siyasətini alətə çevirən güclər öz cinayətkar əməllərinə görə cavab verəcəklər. Buna kimsənin şübhəsi olmasın”.

Turan