Nadir Azəri: Yeni qlobal düzəndə Azərbaycan faktoru

“Bu gün dünya düzənində baş verən proseslər bir həqiqəti açıq şəkildə ortaya qoyur: yeni dünya nizamı formalaşır, köhnə dünya nizamının son dayaqları isə artıq bir-bir sıradan çıxır. Formalaşmaqda olan bu yeni dünya düzənində daha uzaqgörən siyasət yürüdənlər, milli və dövlət maraqlarını daha qətiyyətlə qorumağı bacaranlar, beynəlxalq prosesləri düzgün təhlil edərək operativ və çevik qərarlar qəbul edə bilənlər öz layiqli yerini tuta biləcək. Bunu həm ayrı-ayrı dövlət liderlərinə, həm də dövlətlərin birləşdiyi birlik və ittifaqlara şamil edə bilərik”.

Bunu Citypost.az-a “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, siyasi şərhçi Nadir Azəri deyib.

Nadir Azərinin sözlərinə görə, bu baxımdan Azərbaycanın bəxti gətirib: “Çünki ölkəmiz İlham Əliyev kimi qətiyyətli dövlət başçısının, Müzəffər Ali Baş Komandanın rəhbərliyi ilə qlobal məkanda öz sözünü deyir. Prezident İlham Əliyev qlobal prosesləri dərindən təhlil etmək, düzgün zamanda düzgün və çevik qərarlar qəbul etmək qabiliyyətinə malik lider kimi dünyada tanınır. Çünki dövlət başçısının bəyan etdiyi kimi biz nəyi, nə zaman, necə etməyi yaxşı bilirik”. 

Siyasi şərhçi onu da qeyd edib ki, cənab Prezidentin istər ölkə daxilində keçirilən yerli və beynəlxalq tədbirlərdə, istərsə də xarici ölkələrdə təşkil olunan forum və konfranslardakı çıxışları, suallara verdiyi cavablar və bəyanatları beynəlxalq ictimaiyyətin diqqət mərkəzində olur. Bu baxımdan Münxen Təhlükəsizlik Konfransı da tarixə düşdü: “Həmin konfrans çərçivəsində keçirilən “Açıq dəhliz siyasəti? Trans-Xəzər əməkdaşlığının dərinləşdirilməsi” mövzusunda paneldə Prezident İlham Əliyev bir daha Azərbaycanın qətiyyətli və prinsipial mövqeyini ortaya qoydu. Eyni zamanda bu tədbir göstərdi ki, Prezident İlham Əliyev təkcə Azərbaycanın və Cənubi Qafqazın lideri deyil, bütövlükdə Türk dünyasının aparıcı liderlərindən biri kimi mövqe sərgiləyir. Söhbət ondan gedir ki, Prezident Münxendə keçirdiyi görüşlərdə və konfrans çərçivəsindəki çıxışlarında istər Azərbaycanın təşəbbüs göstərdiyi nəqliyyat və tranzit layihələri, istər Ermənistan–Azərbaycan münasibətləri, istərsə də Mərkəzi Asiya ilə əməkdaşlıq kontekstində qlobal iqtisadi inkişafın regionlararası əlaqələrsiz mümkün olmadığını vurğuladı. Dövlət başçısı, açıq şəkildə bəyan etdi ki, Çindən Avropaya yükdaşımalar Mərkəzi Asiya ölkələri olmadan mümkün deyil və bu marşrut Çin–Mərkəzi Asiya–Xəzər dənizi–Azərbaycan–Gürcüstan–Türkiyə–Avropa xətti üzrə formalaşır. Hesab edirəm ki, bu zaman dünyaya verilən mesaj ondan ibarət idi ki, yeni qlobal nizam Mərkəzi Asiya və Azərbaycan kimi strateji aktorlar nəzərə alınmadan formalaşa bilməz”.

Nadir Azəri deyib ki, bütün bunları ümumiləşdirsək, belə bir nəticəyə gəlmək olar: Münxen Təhlükəsizllik Konfransı eyni zamanda, Prezident İlham Əliyevin timsalında Azərbaycanın dünyaya yeni inkişaf istiqaməti təqdim etməsi kimi də tarixə düşdü: “Söhbət, təbii ki, milli maraqlara əsaslanan, həmçinin, region və qlobal məkan üçün yeni inkişaf proqramı xarakteri daşıyan strateji baxışdan gedir. Həmin proqramın mərkəzində isə dəqiq hesablanmış, zamanında və məqsədyönlü şəkildə atılan addımlar dayanır”.

Turan

Həmçinin oxuyun

Qulu Məhərrəmlidən Ramiz Mehdiyevlə bağlı PAYLAŞIM

Heydərovun yeni müavini odur -FOTO

Yüksək postunu itirən general Mirzəyev kimlərlə qudadır? - FAKTLAR  

Zirzəmidə ömrü keçən, unudulmaz şair...