Qışın ortasında yay planı: Bağ evləri indidən tutulur

 Yay fəsilinin başlamasına hələ vaxt qalmasına baxmayaraq, indidən bağ evlərini rezerv edənlərin sayı artıb.

CityPost.az xəbər verir ki, əmlak məsələləri üzrə ekspert Eynur Fərzəliyev bu haqda danışıb.

Ekspert bildirib ki, buna əsas səbəb mövsüm dövründə qiymətlərin bahalaşması və münasib bağ evlərinin tapılmasında yaranan çətinliklərdir.

Ekspertin sözlərinə görə, mövsümi aylarda xüsusilə bağ evləri və mənzillərin gündəlik kirayə qiymətləri orta hesabla 50 manatdan başlayaraq 500–600 manatadək yüksələ bilər. Məhz bu səbəbdən vətəndaşların bir qismi mövsüm olmayan aylarda həmin evləri kirayəyə götürməyə üstünlük verir. Çünki bu dövrdə qiymətlər daha ucuz olur, mövsüm zamanı isə ciddi artım müşahidə edilir.

Digər tərəfdən, mövsümi aylarda elan saytlarında saxta və ya etibarsız elanların sayının artdığı da vurğulanır. Bu cür hallarda vətəndaşlar aldadılaraq ödəniş etdikdən sonra mənzilin mövcud olmaması və ya başqa şəxsə verilməsi kimi problemlərlə üzləşirlər. Ona görə də bağ evi kirayələyərkən mütləq şəkildə əmlakın sahibi ilə birbaşa əlaqə saxlanılmalı və rəsmi müqavilə bağlanmalıdır.

Qiymətlərə gəlincə, Bakı ətrafı ərazilərlə müqayisədə bölgələrdə bağ evlərinin kirayəsi daha baha ola bilər. Paytaxtın dənizə yaxın ərazilərində isə bağ evlərinin gündəlik kirayə qiymətləri əsasən 100 manatdan başlayır. Qiymətlər evin dənizə yaxınlığı, otaqların sayı, həyətdə hovuzun, xüsusilə də isti hovuzun olub-olmamasından asılı olaraq dəyişir. Eyni ərazidə yerləşən bağ evlərinin bir qismi gündəlik orta hesabla 100 manata, bəziləri isə daha yüksək qiymətə təklif olunur.

Qeyri-mövsüm aylarda bağ evlərini əsasən rieltorlar kirayəyə götürür. Onlar soyuq aylarda

bağ evlərini daha ucuz qiymətə uzunmüddətli icarəyə götürür, mövsüm vaxtı isə baha qiymətə verərək əlavə gəlir əldə edirlər. Məsələn, qış aylarında aylıq 1500 manata kirayəyə götürülən bağ evi yay mövsümündə günlük 200–300 manata icarəyə verilə bilər ki, bu da ay ərzində xeyli gəlir deməkdir.

Ekspert qeyd edib ki, hazırda əmlak və torpaq bazarında qiymətlər stabildir və yaxın aylarda ciddi bahalaşma gözlənilmir.

Yeganə Səmədli