Yazıçılar Birliyindəki Rauf Aslanov kimdir?- Müşavir,yoxsa,sələmçi...

Son günlər Azərbaycan Yazıçılar Birliyində (AYB) baş verən kadr dəyişikliyi təkcə ədəbi cameədə deyil, ümumilikdə ictimai-siyasi müstəvidə ciddi suallar doğurub. Güney Azərbaycan ədəbiyyatı komissiyasının sədri, 48 yaşlı şair Sayman Aruzun vəzifədən kənarlaşdırılaraq onun yerinə 79 yaşlı Xalq şairi Sabir Rüstəmxanlının təyin edilməsi cəmiyyətdə haqlı təəccüb və narazılıqla qarşılanıb.

CityPost.az    xəbər verir ki, məsələ təkcə yaş fərqində və ya şəxslərin kimliyində deyil. Sual doğuran əsas məqam bu qərarın necə, hansı əsaslarla və hansı təsirlərlə qəbul edilməsidir. Aparılan araşdırmalar göstərir ki, son illər Sayman Aruz sistemli şəkildə müxtəlif hücumlara məruz qalıb. Onun dövlət maraqlarına uyğun fəaliyyəti, xüsusilə Güney Azərbaycan mövzusunda prinsipial mövqeyi bəzi daxili və xarici dairələri ciddi şəkildə narahat edib.

Məhz belə bir fiqurun Yazıçılar Birliyindən uzaqlaşdırılması nəinki məntiqsiz, hətta təhlükəli presedent kimi dəyərləndirilməlidir. Daha da maraqlısı odur ki, bu qərardan bir neçə gün əvvəl bəzi xəbər saytlarında adları və soyadları bilinməyən şəxslərin Azərbaycan Yazıçılar Birliyinə müraciət edərək “Sayman Aruz bizi təmsil edə bilməz” məzmunlu məktub ünvanladıqları barədə məlumatlar yayılıb. Suallar da məhz buradan başlayır.

İctimaiyyəti narahat edən əsas məqam budur: Azərbaycan Yazıçılar Birliyində verilən qərarlar hansı ölkənin və hansı mərkəzin maraqları ilə uzlaşır? Əgər İrandan yönləndirilən, kimliyi bəlli olmayan müraciətlər əsasında Azərbaycanda fəaliyyət göstərən bir qurumda kadr dəyişiklikləri edilirsə, bu artıq sıradan təşkilati məsələ deyil, milli təhlükəsizlik müstəvisində qiymətləndirilməli ciddi siqnaldır.

“Azərbaycan Reallığı” saytının yazdığına görə,bu prosesdə AYB sədri Anarın mövqeyi də ayrıca sual doğurur. Onun bu açıq-aşkar mübahisəli qərara göz yumması yazıçı cameəsi daxilində ciddi narazılıq yaradıb. Təsadüfi deyil ki, tanınmış şair-publisist Mübariz Məsimoğlu özünün “Facebook” hesabında kəskin mövqe sərgiləyərək yazıb:

“Deyəsən, Azərbaycan Yazıçılar Birliyini Həmid Herisçi İrandan idarə edir. Belə olmasaydı, Anar qurultayın seçdiyi Saymanı vəzifəsindən götürüb katibliyin qərarı ilə Həmidi onun yerinə təyin etməzdi”.

Bu fikir emosional çıxışdan daha çox, cəmiyyətdə formalaşan real narahatlığın ifadəsidir. Əgər qurultayın seçdiyi şəxs heç bir rəsmi izahat verilmədən, qeyri-şəffaf mexanizmlərlə vəzifədən uzaqlaşdırılırsa, bu, AYB daxilində institusional böhranın göstəricisidir.

Artıq bu məsələ nə ədəbi intriqa, nə də daxili narazılıq kimi təqdim edilə bilər. Bu qərar istər hüquq-mühafizə orqanları, istərsə də müvafiq dövlət qurumları tərəfindən ciddi şəkildə araşdırılmalıdır. Əgər Azərbaycan Yazıçılar Birliyində qəbul edilən addımlar xarici təsirlərlə, xüsusilə də İran mərkəzli maraqlarla uzlaşırsa, bu, artıq açıq təhlükə siqnalıdır və gecikdirilmədən adekvat reaksiya verilməlidir.

Oxu24.com -un araşdırması  zamanı məlum olub ki,Azərbaycan Yazıçılar Birliyinin Nizamnaməsinə uyğun olaraq AYB Sədrinin bir müşaviri ola bilər.Müşavir qurultayda səsvermə yolu ilə seçilir.AYB Sədrinin hazırda iki müşaviri var.Onlar  Sayman Aruz və  Rauf Aslanovdur.

Baş müşavir kimi təqdim olunan Rauf Aslanov barəsində  mətbuatda zaman-zaman qalmaqallı xəbərlər yer alıb. Rauf Aslanovuna adı  mediada tez-tez AYB üzvlərinin mənzil hüquqlarını tapdamaqda,AYB sədri Anarın hökümət telefonlarından şəxsi işləri üçün istifadə etməkdə və uzun illər sələmçilik fəaliyyəti ilə məşğul olmaqda hallanıb.O,həmçinin AYB-də Mənzil Komissiyasının sədridir.

Azərbaycan Yazıçılar Birliyinin üzvlüyündən çıxan şair İlham Qəhrəman Rauf Aslanov barəsində mediada sərt ittihamlar səsləndirib. O,”Kulis.az” saytına verdiyi müsahibəsində Aslanovu  “Anarın şəxsi makleri” adlandırıb.

Həmçinin oxuyun

Vüqar Qurbanovun gizli göstərişlərini Şahin Qurbanov icra edirmiş   

Həmid Herişçinin iç üzü açıldı

Aydınlığa aydınlıq gətirən... Unudulmaz Aydın Səlimzadə - ŞƏMSİ VƏFADAR YAZIR

SSRİ dövründə İrana verilən Azərbaycan torpaqları  

Fotoda İlham Qəhrəmandır

“Raufun mənə dediyini olduğu kimi yazıram: "Evin qiyməti 150 mindir, gör, neynirsən..."

Yazıçılar Birliyindən çıxmaq haqda ərizə verəndən 1 ay sonra Raufa zəng etdim, məni 27 il üzv olduğum qurumdan ona inanıb hər şeydən məhrum olduğumu deyəndə, həmin sözü bir də təkrar etdi: "Məndən incimə, evin qiyməti 150 mindir..."

Mənim 150 minim olsaydı, elə bazardan balalarıma ev alaram, daha Anarın insafına bel bağlamaram. Mən nadir hallarda AYB-nə gedərdim. Bununla belə, haçan Raufun kabinetində olurdumsa, ancaq gələn zənglərə cavab verirdi: "Yevro remontdur, dənizə panoramı var və s." deyə İlham Qəhrəman müsahibəsində qeyd edir.

Göründüyü kimi,Azərbaycan Yazıçılar Birliyində dərin böhran baş verir.

Oxu24.com baş verənlərlə bağlı yazıda adı hallanan Rauf Aslanovla əlaqə saxlayıb.O,suallara ətraflı cavab verə bilməyəcəyini qeyd edib.

“Bu gün son iş günüdür.İşlərimiz çoxdur.Nizamnamədə bir müşavir olduğu yazılıb.Digər məsələləri kadrlar şöbəsi ilə əlaqə saxlayın”,-deyə o bildirib.

AYB-nin mətbuat xidmətinin rəhbəri Xəyal Rzazadə də məsələyə münasibət  bildirib.O,sədrin iki müşaviri ola bilərmi sualına cavab olaraq bildirib ki,katibliyin qərarı ilə və daxili əmrlə bu  mümkündür

Mövzuya daha ətraflı araşdırma apardıqdan sonra qayıdacağıq.

Miri Məcidli