Bunu fərq etsəniz, həyatınız dəyişəcək – “Artıq bağışlanacaq nəsə qalmır”  

Bir insanın bizə necə davranması və necə sevməsi əslində bizimlə yox, onun öz daxili dünyası və emosional imkanları ilə bağlıdır.

CityPost.az xəbər verir ki, bu sözləri Psixoterapevt Nuranə Bağırova deyib.

Psixoterapevt bildirib ki, çox vaxt insanlar kimdənsə yetərincə dəyər görməyəndə problemin özlərində olduğunu düşünür, özlərini günahlandırırlar:

“Nəticədə elə zənn edirik ki, ya özümüzə kifayət qədər dəyər verməmişik, ya da hansısa səhv etmişik. Halbuki bir insan yalnız bacardığı qədər sevə və davrana bilər. Onun sevgi tərzi və davranış forması emosional kapasitesinin göstəricisidir”.

Nuranə Bağırova vurğulayıb ki, bu fərqindəliyi dərk etdikdən sonra insanın həyata baxışı dəyişir. Onun fikrincə, həmin anda insan baş verənləri öz üzərindən götürməyə başlayır və hər şeyin qarşı tərəfin duyğuları, düşüncələri və daxili imkanları ilə əlaqəli olduğunu anlayır:

“Bu anlayış sadəcə bağışlamaqdan daha dərindir. Çünki bu mərhələdə insan içində daşıdığı yüklərdən azad olur. Artıq bağışlanacaq nəsə qalmır, sadəcə anlayış qalır. Məsələ insanın özü üçün həll olunur”.

N.Bağırova əlavə edib ki, bu proses insanın yavaş-yavaş sağalmasına, yaralarını sarımasına və özünə yaxınlaşmasına səbəb olur. Onun sözlərinə görə, nəticədə insan özünü bağışlamağı və daxili rahatlığa qovuşmağı bacarır.

Aytac Ali