Tamam Cəfərova:“Azərbaycan gəncliyi dövlətin güc mənbəyidir”

Azərbaycan xalqının Ümummilli Lideri Heydər Əliyevin zəngin nəzəri irsində və möhtəşəm fəaliyyətində Azərbaycan gəncliyi və gənclər siyasəti xüsusi yer tutur.  Ulu Öndərin bu sahələrin inkişafında xidmətləri misilsizdir. Heydər Əliyev Azərbaycana rəhbərliyinin bütün dövrlərində bu sahəyə diqqət və qayğısını əsirgəməmiş, daima gənclərin qüdrətli hamisi kimi çıxış etmişdir.  Bu baxımdan da Azərbaycanda Gənclər Gününün təsis edilməsi, eləcə də gənclərin hərtərəfli inkişafı üçün yaradılan geniş imkanlar dövlətimizin gənc nəslə göstərdiyi diqqət və qayğının bariz nümunəsidir. Ulu Öndər Heydər Əliyevin 1 fevral 1997-ci il tarixli Sərəncamı ilə 2 fevralın Gənclər Günü elan edilməsi ölkəmizdə gənclər siyasətinin sistemli şəkildə formalaşmasının mühüm mərhələsi olmuşdur. Məhz bu qərardan sonra Azərbaycan MDB məkanında və Şərqi Avropa ölkələri arasında Gənclər Gününü rəsmi və təntənəli şəkildə qeyd edən ilk dövlət kimi tarixə düşmüşdür.

Bu fikirləri Citypost.az saytına  açıqlamasında Milli Məclisin üzvü Tamam Cəfərova bildirib. 

Deputat bildirib ki, Ulu Öndər Heydər Əliyev Azərbaycan gəncliyini ölkənin gələcəyi adlandıraraq, gənc nəslin intellektual, mənəvi və vətənpərvərlik ruhunda yetişməsini daim dövlət siyasətinin mərkəzində saxlamışdır. 1994-cü il 26 iyul tarixində Gənclər və İdman Nazirliyinin yaradılması, gənclərlə bağlı qəbul edilən çoxsaylı fərman və sərəncamlar gənclərin ictimai-siyasi həyatda fəal iştirakına, onların təşəbbüskarlığının və potensialının reallaşdırılmasına geniş imkanlar açmışdır. Ulu Öndərin müəyyən etdiyi bu strateji xətt bu gün Prezident İlham Əliyev tərəfindən uğurla və ardıcıl şəkildə davam etdirilir. Dövlət başçısının rəhbərliyi ilə gənclər siyasəti yeni, müasir və sistemli mərhələyə qədəm qoymuşdur. 

Bu ardıcıl dövlət siyasəti gənclərin yalnız sosial müdafiəsini deyil, eyni zamanda onların dövlət idarəçiliyində və ictimai həyatda fəal rol almasını da təmin etmişdir. Müasir dövrdə dövlətlərin dayanıqlı inkişafı və milli təhlükəsizliyinin qorunması gənclərin bilik, bacarıq və vətənpərvərlik potensialı ilə birbaşa bağlıdır. Azərbaycan gəncliyi Prezident İlham Əliyevin həyata keçirdiyi müstəqil, praqmatik və milli maraqlara əsaslanan siyasəti dəstəkləyərək ölkənin sosial-iqtisadi, siyasi və mədəni həyatında fəal iştirak edir. Bu dəstək təsadüfi deyil, uzunmüddətli və məqsədyönlü dövlət siyasətinin məntiqi nəticəsidir. Təsadüfi deyil ki, 2007-ci ilin “Gənclər ili” elan olunması, ölkənin müxtəlif bölgələrində Gənclər evlərinin inşa edilməsi, 2011-ci ildə Gənclər Fondunun yaradılması, “Gənclər üçün Prezident Mükafatı”nın təsis edilməsi, eləcə də gənc kadrların irəli çəkilməsinə xidmət edən “Yüksəliş” müsabiqəsi gənclərin dövlət idarəçiliyində və ictimai həyatda rolunun gücləndirilməsinə xidmət edən mühüm təşəbbüslərdir.

Azərbaycan gəncliyi  dövlət Başçısının həyata keçirdiyi siyasi kursa olan  inam və etimadı ən parlaq şəkildə  44 günlük Vətən müharibəsində Prezident İlham Əliyevin ətrafında sıx birləşərək bütün dünyaya nümayiş etdirdi. Gənclər həm döyüş meydanında, həm də arxa cəbhədə yüksək vətənpərvərlik nümunəsi göstərərək Ali Baş Komandanın çağırışlarını böyük ruh yüksəkliyi ilə yerinə yetirdilər. Qələbədən sonrakı dövrdə işğaldan azad olunmuş ərazilərdə aparılan bərpa və quruculuq işlərində gənclərin fəal iştirakı isə milli birlik və həmrəyliyin möhkəmləndiyini bir daha təsdiqləmişdir.

Əldə olunan bu təcrübə göstərir ki, gənclərin inkişafı yalnız hərbi və siyasi sahələrlə məhdudlaşmır. Prezident İlham Əliyevin siyasətində təhsil, innovasiya, rəqəmsallaşma və insan kapitalının inkişafı xüsusi yer tutur. Yeni təhsil müəssisələrinin yaradılması, mövcud infrastrukturun yenilənməsi, xaricdə təhsil proqramları, startap və innovasiya ekosisteminin formalaşdırılması gənclərin bilik və bacarıqlarının artırılmasına, onların qlobal rəqabət mühitinə hazırlanmasına xidmət edir.

Bununla yanaşı, dövlət başçısının gənclərlə bağlı siyasətində milli-mənəvi dəyərlərin qorunması və təbliği də mühüm istiqamət kimi önə çıxır.Gənclərimizin tariximizi, mədəniyyətimizi, dilimizi və dövlətçilik ənənələrimizi dərindən mənimsəməsinin vacibliyi daim vurğulanır və bu çağırışlar onların milli kimliyinin möhkəmlənməsinə, vətəndaşlıq məsuliyyətinin artmasına səbəb olur. Məhz bu kompleks və balanslaşdırılmış yanaşmanın nəticəsidir ki, bu gün Azərbaycan gənci özünü dövlətin etibarlı tərəfdaşı və aparıcı qüvvəsi kimi hiss edir. Onların inkişafı, sosiallaşması və cəmiyyətə inteqrasiyası üçün yaradılan imkanlar gənclərə xoşbəxt və məzmunlu gənclik yaşamaq imkanı verir. Prezident İlham Əliyevin həyata keçirdiyi məqsədyönlü və uzaqgörən siyasət gənclərin dövlətə və liderə olan inamını daha da gücləndirmişdir.

Beləliklə, Azərbaycan gəncliyi bundan sonra da Prezident İlham Əliyevin ətrafında sıx birləşərək, müstəqil, güclü və suveren dövlətimizin inkişafına öz töhfəsini vermək əzmindədir. Bu həmrəylik və qarşılıqlı etimad ölkənin sabitliyinin, davamlı inkişafının və parlaq gələcəyinin əsas təminatlarından biri kimi çıxış edir. Bir daha Gənclər günü münasibətilə gənclərimizi təbrik edir, fəaliyyətlərində uğurlar, xoşbəxtlik və firavanlıq arzulayıram.

Həmçinin oxuyun

Anar AYB-nin sədrliyindən gedir – Tarixi açıqladı 

Rüşvət, qanunsuz məscid, şişən ayaqlar - İcra başçısının işdən çıxarılmasının SENSASİON SƏBƏBLƏRİ 

Şəmsi Vəfadar Sara Safuraya Kanadaya getməyin yolunu göstərdi  

Layiq Mehdiyevdən  şəhid ailəsinə SAYĞISIZLIQ -FOTO