Perinatal Mərkəzdə 7 körpənin öldüyü yanğınla bağlı məhkəmə davam etdirilib 

“Respublika Perinatal Mərkəzi”ində 7 körpənin öldüyü yanğınla bağlı ittiham olunan direktor və şöbə rəislərinin cinayət işi üzrə məhkəmənin növbəti iclası keçirilib.

CityPost.az  xəbər verir ki, bu gün Bakı Ağır Cinayətlər Məhkəməsində hakim Leyla Əsgərova-Məmmədovanın sədrliyi keçirilən prosesdə hakim heyətində dəyişiklik olduğu üçün məhkəmə istintaqının yenilənməsi və ya olduğu yerdən davam etdirilməsi ilə bağlı tərəflərin fikirləri öyrənilib. Müdafiə tərəfi məhkəmə istintaqının yenidən başlamasını, zərərçəkən tərəf işin qaldığı yerdən davam etməsini istəyib.

Hakim tərəflərin nəzərinə çatdırıb ki, tərkibə yeni daxil olan hər iki hakim cinayət işi ilə tanışdır. Ona görə də prosesin qaldığı yerdən davam etdirilməsi ilə bağlı qərar verilib.

Daha sonra prosesdə şahid qismində Perinatal Mərkəzdə biotexniki mühəndis vəzifəsində çalışan Təbriz Nəzirli ifadə verib, müdafiə tərəfinin suallarını cavablandırıb.

Şahid bildirib ki, Perinatal Mərkəzdə elektrik yuvalarının əksəriyyətinin üstü açıq olub, bu barədə elektrikə, eləcə də direktora məlumat verib: “İşdə problem olan zaman ya yazılı, ya da video şəklində vatsap tətbiqi üzərindən direktor Mehriban Abasquliyevaya məlumat verirdim. Həmçinin tibbi cihazların test yoxlanışını keçirib və tibbi personala izah etmişəm".

O, hadisə zamanı işdə olmadığını, mərkəzə isə yanğın tam sönəndən sonra gəldiyini bildirib.

İş üzrə təqsirləndirilən Mehriban Abasquliyevanın vəkili Muxtar Mustafayev şahidi yalan danışmaqda ittiham edib. Dövlət ittihamçısı vəkilə etiraz edib.

Hakim də M.Mustafayevə davranışına görə xəbərdarlıq edib.

Həmçinin oxuyun

Abdullayevlər sülaləsinin 4 generalı üzə çıxdı  -DOSYE

Xəstə uşaqlara yardım adı ilə 200 min pul ələ keçirdi - Kiberpolisdən əməliyyat 

Ədliyyə Nazirliyində mühüm postlar niyə boş saxlanılır?

Məşhur müğənnilərin müəllimi dünyasını dəyişdi

Proses yanvarın 7-də davam etdiriləcək.

Qeyd edək ki, 2024-cü il yanvarın 9-da “Respublika Perinatal Mərkəzi” PHŞ-nin inzibati binasında yanğın baş verib.

Yanğınla bağlı Baş Prokurorluqda Cinayət Məcəlləsinin 225.3 (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) və 314.3-cü (səhlənkarlıq iki və daha çox şəxsin ölümünə səbəb olduqda) maddələri ilə cinayət işi başlanaraq ibtidai istintaqın aparılması Baş Prokurorluğun İstintaq idarəsinə tapşırılıb.


İstintaqla müəyyən olunub ki, Mərkəzin Anesteziologiya, reanimasiya və intensiv terapiya şöbəsinin Yenidoğulmuşların intensiv terapiya bölməsinin yerləşdiyi dördüncü mərtəbədəki palatasında baş vermiş yanğın nəticəsində 7 yenidoğulmuş ölüb, 4 nəfər xəsarət alıb, müəssisəyə isə ümumilikdə 361 min manat məbləğində maddi ziyan vurulub.

Bundan başqa, Mehriban Abasquliyevanın 27 dekabr 2022-ci il tarixdə Mərkəzin direktoru təyin edilməsindən sonra müəssisənin tibbi təminat resursları və potensialını nəzərə almadan xəstə qəbulu sayını iki dəfəyədək artırması nəticəsində müəssisənin elektrik təsərrüfatının artıq yüklənərək sonda yanğına səbəb olmasına əsaslı şübhələr müəyyən edilib.

Eyni zamanda istintaqla, Fövqəladə Hallar Nazirliyi tərəfindən Mərkəzdə yoxlamalar aparılaraq yanğın təhlükəsizliyi qaydaları, xüsusən də, mövcud avtomatik yanğın xəbərverici siqnalizasiya qurğusunun nasazlığı, daxili yanğın su kranlarının işlək olmaması və elektrik təsərrüfatında nöqsanların olması Mərkəzin rəhbərliyinə bildirilsə də, direktor və Mərkəzin Anesteziologiya, reanimasiya və intensiv terapeya şöbəsinin müdiri Hamlet Mustafayev və Dəstək Xidmətləri şöbəsinin müdiri Elnur Əhmədlinin nöqsanları aradan qaldırmamalarına əsaslı şübhələr müəyyən edilib.

Mərkəzin direktoru vəzifəsində işləmiş Mehriban Abasquliyeva Cinayət Məcəlləsinin 308.2 (ağır nəticələrə səbəb olan vəzifə səlahiyyətlərindən sui-istifadə) və 225.3-cü (yanğın təhlükəsizliyi qaydalarını pozma ehtiyatsızlıqdan iki və daha çox şəxsin ölümünə səbəb olduqda) maddələri, həmin mərkəzin şöbə rəisləri vəzifəsində işləmiş Hamlet Mustafayev və Elnur Əhmədli isə Cinayət Məcəlləsinin 225.3-cü maddəsi ilə təqsirləndirilən şəxs qismində cəlb edilərək onlara həmin maddələrlə nəzərdə tutulan ittiham elan edilib.
Xatırladaq ki, cinayət işi üzrə zərərçəkmiş qismində "Respublika Perinatal Mərkəzi", Elçin Gülmalı oğlu Nəcəfov, Vaqif İntiqam Hacıyev, Aynurə Qalib qızı Əhmədova, Gülbahar Zülfüqarova zərərçəkmiş qismində tanınıb.