İlham Əliyev Davosda ABŞ-la bir platformada – politoloqdan TƏHLİL

Davos İqtisadi Forumu çərçivəsində “Sülh Şurasının Nizamnaməsi”nin imzalanması və Prezident İlham Əliyevin tədbirdə iştirakı Azərbaycanın beynəlxalq siyasi mövqeyinin möhkəmlənməsi baxımından mühüm hadisə kimi qiymətləndirilir. Forum çərçivəsində dövlət başçısının ABŞ Prezidenti Donald Trampla görüşü də diqqət mərkəzində olub. Mövzu ilə bağlı politoloq Turan Rzayev Citypost.az-a açıqlama verib.

Politoloqun sözlərinə görə, Azərbaycanın Davos Forumunda iştirakı və ABŞ-ın təşəbbüsü ilə yaradılan Sülh Şurasının təsisçi üzvü qismində çıxış etməsi tarixi hadisədir. Onun fikrincə, bu təşəbbüsün məhz ABŞ tərəfindən Azərbaycana təklif olunması və Prezident İlham Əliyev tərəfindən məmnuniyyətlə qəbul edilməsi ölkəmizin beynəlxalq nüfuzunun göstəricisidir.

Turan Rzayev qeyd edib ki, Azərbaycan Sülh Şurasının təsisçi üzvlərindən biridir və bu, adətən yalnız böyük dövlətlərə edilən təkliflər sırasına daxildir. Azərbaycanın ABŞ-ın təsis etdiyi bir təşkilatın qurucu üzvü olması Vaşinqtonun Bakıya verdiyi strateji önəmi bir daha təsdiqləyir.

Politoloqun fikrincə, xüsusilə Donald Trampın hakimiyyətə gəlişindən sonra Azərbaycan–ABŞ münasibətlərində ciddi irəliləyişlər müşahidə olunub və dövlət başçıları səviyyəsində əlaqələr yüksək səviyyədə formalaşıb. ABŞ Prezidenti ilə görüş və eyni platformalarda iştirak Azərbaycan Prezidentinin beynəlxalq prestijinin və siyasi çəkisinin bariz nümunəsidir.

Rzayev vurğulayıb ki, Azərbaycan münaqişə təcrübəsi olan ölkə kimi Sülh Şurasında mühüm rol oynaya bilər. 44 günlük Vətən müharibəsindən və sonrakı antiterror tədbirlərindən sonra rəsmi Bakının qalib mövqedən çıxış etməsinə baxmayaraq, Ermənistana qarşı təzyiq siyasəti yürütmədiyini, əksinə, konstruktiv və praqmatik danışıqlar xəttini seçdiyini xatırladıb. Onun sözlərinə görə, bu yanaşma nəticəsində sülh danışıqları uğurla davam edir və Vaşinqtonda sülh sazişi paraflanıb.

Politoloq əlavə edib ki, Azərbaycan münaqişələri gərginləşdirmədən həll edən ölkə kimi tanınır və Yaxın Şərq məsələsində də balanslı mövqeyə malikdir. Rəsmi Bakının həm Fələstin, həm də İsraillə uzunmüddətli siyasi, iqtisadi və hərbi əlaqələrinin olması ölkəmizi regional və qlobal miqyasda etibarlı tərəfdaşa çevirir.

Turan Rzayev hesab edir ki, Azərbaycanın Sülh Şurasında iştirakı təhlükəsizlik baxımından da böyük əhəmiyyət daşıyır. Bu üzvlük regionda, xüsusilə Türkiyə və İran kontekstində Azərbaycanın mövqelərini daha da gücləndirir və müxtəlif dairələrdən səslənən tənqidlərin qarşısını almağa imkan verir.

Politoloqun fikrincə, Azərbaycanın beynəlxalq prestiji artıq elə bir səviyyəyə çatıb ki, ölkə nüfuzlu beynəlxalq təşkilatlara təsisçi üzv kimi dəvət olunur və ABŞ-la eyni platformada təmsil edilir. O, bu hadisənin Azərbaycanın gələcək siyasi və diplomatik mövqeləri üçün müsbət nəticələr verəcəyini bildirib.

Həmçinin oxuyun

Həmid Herişçinin iç üzü açıldı

Aydınlığa aydınlıq gətirən... Unudulmaz Aydın Səlimzadə - ŞƏMSİ VƏFADAR YAZIR

SSRİ dövründə İrana verilən Azərbaycan torpaqları  

Bir sıra birinci instansiya məhkəmələrinə hakimlər təyin edilib - SİYAHI 

Söhbətləşdi - Turan Etibaroğlu