Nadir Azəri: Avropa Parlamentinin “qətnaməsi” bütövlükdə Cənubi Qafqazda sabitliyə qarşı atılmış addımıdr  

“Bu, danılmaz bir həqiqətdir ki, bəzi Qərb dairələri, o cümlədən Avropa Parlamenti zaman-zaman Azərbaycana qarşı məkrli və iyrənc addımlar atıb. Bu çirkin siyasət bu gün də davam edir”. 

Bunu Citypost.az-a “Orta Asiya və Güney Qafqaz Söz Azadlığı Şəbəkəsi” (CASCFEN) İctimai Birliyinin sədri, siyasi şərhçi Nadir Azəri bildirib. 

Onun sözlərinə görə, Avropa Parlamentinin 30 aprel tarixində qəbul etdiyi “qətnamə” də məhz bu xəttin növbəti təzahürü, növbəti iyrənc siyasi gedişdir: “Həmin sənəddə əks olunan iddiaların heç birinin əsası yoxdur və bu, tamamilə açıq-aydın görünür. Azərbaycan torpaqları 30 il işğal altında olarkən bu işğala qarşı kar, kor və lal olan Avropa Parlamentinin həmin ünsürləri nə Xocalı faciəsi, nə də xalqımıza qarşı törədilən digər qətliamlarla bağlı bir kəlmə belə demədi. Bu gün isə utanmazcasına saxta qətnamələr qəbul edir, ölkəmizin ərazisinə qanunsuz daxil olmuş terrorçuları “siyasi məhbus” kimi dünyaya sırımağa çalışırlar. Bu, tamamilə qəbuledilməzdir”.

Nadir Azərinin fikrincə, bu “qətnamə” əslində təkcə Azərbaycana qarşı deyil: “Bu, birinci növbədə Avropanın özünə, ikinci növbədə Ermənistana, üçüncü növbədə isə bütövlükdə Cənubi Qafqaza qarşı yönəlmiş bir kağız parçasıdır. Ötən il Ağ Evdə Donald Trampın vasitəçiliyi ilə Ermənistan–Azərbaycan sülh sazişinin paraflanmasından sonra regionda mühüm irəliləyişlər əldə olunub və hazırda Ermənistan rəhbərliyi də sülh müqaviləsinin imzalanmasında maraqlı görünür. Belə bir məqamda Avropa Parlamentinin bu addımı açıq şəkildə Cənubi Qafqaza daimi sülhün gəlməsinə mane olmaq cəhdidir”.

Nadir Azəri bildirib ki, bu cür addımlar eyni zamanda Ermənistanda yenidən işğalçılıq meyillərini alovlandırmağa, regionda təsir imkanlarını itirən bəzi qlobal aktorların yenidən səhnəyə qayıtmasına və bölgəyə nəzarəti ələ keçirməsinə xidmət edir. “Görünən odur ki, Avropa Parlamentində bu cür qərarlara səs verənlər Avropanın deyil, məhz həmin bəlli güclərin maraqlarına işləyirlər”, – deyə o vurğulayıb.

N.Azəri xatırladıb ki, mayın 4-də Ermənistanın paytaxtı İrəvan şəhərində keçirilən “Avropa Siyasi Birliyi”nin 8-ci Zirvə toplantısında videobağlantı formatında çıxış edən Azərbaycan Respublikasının Prezidenti İlham Əliyev də Avropa Parlamentinin sülh əleyhinə mövqeyini açıq şəkildə ifşa edib və bu cür addımların əsl mahiyyətini detalları ilə ortaya qoyub: “Prezident vurğulayıb ki, Avropa Parlamenti sülh prosesinə dəstək vermək əvəzinə, açıq şəkildə sabotajla məşğul olur və son beş ildə Azərbaycan əleyhinə yalan və təhqirlərlə dolu 14 qətnamə qəbul edib. Dövlət başçısı bildirib ki, Azərbaycan öz torpaqlarını işğaldan azad edərək beynəlxalq hüququ özü təmin etdiyi halda, bəzi Avropa qurumlarının ikili standartlara əsaslanan bu mövqeyi tamamilə qəbuledilməzdir və siyasi riyakarlığın bariz nümunəsidir. O, eyni zamanda Azərbaycanın bütün təzyiqlərə baxmayaraq sülh gündəliyinə sadiq qaldığını və regionda sabitliyin təmininə xidmət etdiyini xüsusi olaraq vurğulayıb”.

N.Azəri sonda bildirib ki, bütün bu xarici təsir və sifarişlərə baxmayaraq, Azərbaycan öz yolundan dönən deyil: “Azərbaycanın yaratdığı reallıqlar Cənubi Qafqazın sabahına xidmət edir. Ölkəmiz sülh siyasətinə sadiq qalmaqla yanaşı, ona qarşı yönəlmiş bütün xəyanətləri dəf etməyə qadirdir və bunu qətiyyətlə edəcək.”

Turan

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı