Nadir Azəri: Türk dünyası yeni dünya düzənində güclənə bilər 

Hazırda qlobal məkanda həm maraqlı, həm də mürəkkəb və təhlükəli proseslər baş verir. Bu proseslərin mərkəzində isə yeni dünya düzəninin formalaşması dayanır. Artıq köhnə dünya düzəninin qaydalarının işləmədiyini və yeni geosiyasi reallıqların yarandığını müşahidə edirik.

Bu fikirləri Citypost.az-a açıqlamasında “Orta Asiya və Güney Qafqaz Söz Azadlığı Şəbəkəsi” İctimai Birliyinin sədri, siyasi şərhçi Nadir Azəri deyib.

Onun sözlərinə görə, tarix boyu dünya düzənlərinin dəyişməsi adətən mürəkkəb proseslər, münaqişələr və müharibələrlə müşayiət olunub və bu ənənə bu gün də davam edir. Mövcud şəraitdə milli dövlətlərin, eləcə də onların təmsil olunduğu təşkilat və ittifaqların üzərinə düşən əsas vəzifə baş verən proseslərə soyuqqanlı, həssas və düşünülmüş şəkildə yanaşmaqdır.

Siyasi şərhçi hesab edir ki, yeni dünya düzənində qlobal aktorlardan biri olmaq iddiasını ortaya qoyan Türk Dövlətləri Təşkilatı da bu mərhələdə daha çevik və məqsədyönlü addımlar atmalıdır. Onun sözlərinə görə, təşkilat indiyədək bu istiqamətdə müəyyən uğurlu yol qət edib.

N.Azəri bildirib ki, hazırda türk dünyasının düşmənləri Türk Dövlətləri Təşkilatının fəaliyyətini zəiflətmək və onun inkişafına mane olmaq üçün müxtəlif addımlar atırlar. Onun fikrincə, bu cəhdlərin əsas hədəfi Türkiyə–Azərbaycan qardaşlığına zərbə vurmaqdır.

“Son günlər müxtəlif istiqamətlərdən tətiklənən dini, siyasi və ideoloji qrupların Türkiyə–Azərbaycan münasibətlərinə xələl gətirmək cəhdlərinin şahidi oluruq. Bu qüvvələr hər fürsətdən istifadə edərək iki qardaş ölkə arasında münasibətləri pozmağa çalışırlar”, – deyə o vurğulayıb.

Həmçinin oxuyun

Xalq yazıçısı Anar: “Bunu ilk dəfədir açıqlayıram...”

Şükranlıq içində və ya şükranlığa bələnmiş ADAM...  

Prezident ailəsini şantaj edən Fərid Salmanov KİMDİR?

TƏBİB Səhiyyə Nazirliyinə birləşdirilir - İslahatlar DAVAM EDƏCƏK 

Nadir Azəri hesab edir ki, belə şəraitdə hər iki ölkənin ictimaiyyəti daha ayıq-sayıq olmalı və təxribatlara uymamalıdır. Onun sözlərinə görə, bu cür addımların arxasında türk dünyasına qarşı olan bəlli xarici mərkəzlərin dayandığı açıq görünür.

Siyasi şərhçi qeyd edib ki, Türkiyə–Azərbaycan qardaşlığı əsrlərə söykənən birlik və həmrəyliyə əsaslanır və tarix boyu müxtəlif sınaqlardan uğurla çıxıb.

“Bu gün də həmin qardaşlıq növbəti sınaq qarşısındadır. Lakin heç kəsdə şübhə yoxdur ki, Türkiyə–Azərbaycan birliyi bu sınaqdan da uğurla çıxacaq. Formalaşan yeni dünya düzənində türk dünyası aparıcı güclərdən birinə çevrilə bilər və bu prosesin mərkəzində məhz Türkiyə–Azərbaycan qardaşlığı dayanır”, – deyə Nadir Azəri əlavə edib.

Turan