Xroniki ağrının formalaşmasına beyində “idarəedici mexanizm” cavabdehdir  

Alimlər qısamüddətli ağrının xroniki ağrıya çevrilməsini tənzimləyən mühüm bir beyin mexanizmini müəyyən ediblər. Mütəxəssislərin sözlərinə görə, beyində yerləşən xüsusi sinir dövrəsinin fəaliyyəti zəiflədildikdə xroniki ağrı ya ümumiyyətlə yaranmır, ya da artıq formalaşmış halda belə tədricən yox ola bilir.

Citypost.az-ın araşdırmasına  əsasən  diqqət mərkəzində kaudal qranulyar insulyar korteks adlanan beyin sahəsi dayanır. Mütəxəssislər bildirir ki, bu bölgə bədəndən gələn hissi siqnalların və emosional reaksiyaların emalı ilə bağlıdır. Aparılan təcrübələr göstərib ki, məhz bu sahə ağrının müvəqqəti qalması və ya xroniki xarakter alması arasında bir növ “keçid nöqtəsi” rolunu oynayır.

Nevroloqların sözlərinə görə, sözügedən sinir yolu aktiv olduqda, onurğa beyninə davamlı siqnallar ötürülür və bu da toxumalar artıq sağalsa belə, ağrı hissinin davam etməsinə səbəb olur. Yəni xroniki ağrı hər zaman fiziki zədənin nəticəsi olmur.

Tədqiqat zamanı alimlər xüsusi üsullarla həmin neyron dövrəsinin fəaliyyətini zəiflədiblər. Nəticədə məlum olub ki, bu mexanizm bloklandıqda təcrübə heyvanlarında xroniki ağrı ya ümumiyyətlə yaranmayıb, ya da artıq mövcud olan ağrılar qısa müddətdə zəifləyib. Bu fakt mütəxəssislərin fikrincə, xroniki ağrının bir çox hallarda beynin aktiv fəaliyyəti ilə saxlanıldığını göstərir.

Mütəxəssislər hesab edirlər ki, bu kəşf xroniki ağrıya baxışı köklü şəkildə dəyişir. Belə ki, ağrı yalnız zədə və ya iltihabın nəticəsi deyil, bəzən beynin ağrını “öyrənməsi” və onu davamlı şəkildə təkrarlaması ilə bağlı olur. Bu isə xüsusilə vacibdir, çünki hazırda tətbiq olunan müalicə üsullarının bir qismi ya yetərincə effektiv deyil, ya da ciddi yan təsirlərlə, o cümlədən asılılıq riski ilə müşayiət olunur.

Həmçinin oxuyun

Həmin general Baş idarə rəisi OLDU

Niyaməddin Musayevin qızı hər şeyi DANIŞDI

Bəzi rayonlarda qar yağacaq, yollar buz bağlayacaq - XƏBƏRDARLIQ 

Məcnun Məmmədova iki yeni müavin təyin edildi 

Araşdırma hələlik yalnız heyvanlar üzərində aparılsa da, alimlər gələcəkdə bu nəticələrin insanlarda da təsdiqlənəcəyi təqdirdə, xroniki ağrıların müalicəsində yeni yanaşmaların ortaya çıxacağını istisna etmirlər. Belə müalicə üsulları bütün sinir sisteminə təsir göstərmək əvəzinə, ağrını davam etdirən konkret beyin dövrələrini hədəf ala bilər ki, bu da müalicəni daha təhlükəsiz və effektli edə bilər.

Yeganə