Azərbaycan qadınının idealı: Mehriban Əliyeva ənənə ilə müasirlik arasında  

Mehriban xanımın harmonik obrazı həm müdrikliyi, həm gözəlliyi, həm yüksək insani keyfiyyətləri, həm də real fəaliyyəti özündə əks etdirir. Bu nadir şəxsiyyətin simasında milli ənənələr müasir dövrün tələbləri ilə ahəngdar şəkildə vəhdət təşkil edir. Burada müdriklik abstrakt anlayış deyil, düşünülmüş və balanslı qərarlar qəbul etmək bacarığıdır; gözəllik yalnız zahiri deyil, həm də əməllərdə təzahür edən daxili zənginlikdir; real fəaliyyət isə ictimai etimadın və rəğbətin əsas meyarına çevrilir. Mehriban xanımın obrazı milli və mədəni kimliyin ayrılmaz hissəsi kimi qəbul olunur. Xüsusilə gənclər üçün bu cür örnəklər mühüm əhəmiyyət daşıyır, çünki onlar şəxsi məqsədləri cəmiyyətin maraqları ilə uzlaşdırmağa kömək edir.

Müasir siyasətçidə bu keyfiyyətlər haradan qaynaqlanır? Bu barədə öz düşüncələrimi bölüşmək istərdim. İlk növbədə adından başlamaq istəyirəm. Hesab olunur ki, insanın adı müəyyən məna daşıyır, onun taleyini və xarakterini əks etdirir. "Mehriban" adı şəfqətli, mərhəmətli, başqalarına qayğı göstərməyi bacaran insanı xarakterizə edir. Mehriban xanım da həqiqətən səmimiyyəti, insanlara kömək etməyə daim hazır olması ilə seçilir. O, öz adına layiq insandır – yaxınlarını sevən, hər bir insanın taleyinə həssaslıqla yanaşan, mənəvi dayaq göstərməyi bacaran, xoş münasibətlər yaradan, insanlarda etibar və məhəbbət hissi oyadan bir şəxsiyyətdir.

Müasir genetikanın yanaşmaları ilə səsləşən belə bir Azərbaycan atalar sözü var: "Ot kökü üstə bitər." Mehriban xanımın ata babası görkəmli Azərbaycan yazıçısı və ədəbiyyatşünası Mir Cəlal Paşayevdir. Atası Arif Paşayev fizika-riyaziyyat elmləri doktoru, professor və akademikdir. Ana babası tanınmış jurnalist, "Bakı" qəzetinin təsisçisi və baş redaktoru Nəsir İmanquliyev olmuşdur. Anası Aida İmanquliyeva isə görkəmli şərqşünas alim, elmlər doktorudur. Mehriban xanım məhz belə zəngin intellektual köklərə malik bir ailədə formalaşıb.

Mehriban xanım Azərbaycanın vətənpərvər övladıdır. O, ölkəsinin tarixini dərindən bilir və onunla qürur duyur. Bununla yanaşı, digər ölkələrə və xalqlara da hörmət və anlayışla yanaşır, dünya tarixinin mürəkkəb və rəngarəng mənzərəsini düzgün dəyərləndirməyi bacarır.

Azərbaycan xalqının şüurunda müdrik, gözəl və cəsarətli qadın obrazı həmişə Koroğlunun sədaqətli silahdaşı Nigarın və Qaçaq Nəbinin ömür-gün yoldaşı Həcərin simasında təcəssüm olunub. Bu obrazlar Azərbaycan ailəsində və cəmiyyətində qadının rolunun mənasını ifadə edən bir növ ideal nümunəyə çevrilmişdir. Dini stereotiplərin və ya sosial çətinliklərin təsiri ilə bu ənənədən uzaqlaşmalar cəmiyyət tərəfindən hər zaman tənqidi qiymətləndirilib və bu yanaşma klassik Azərbaycan ədəbiyyatında da öz əksini tapıb. Bu baxımdan Cəfər Cabbarlının, Səməd Vurğunun və İlyas Əfəndiyevin əsərlərini xatırlamaq kifayətdir. Həmin əsərlərdə Şərq ədəbiyyatının bəzi ənənələrindən fərqli olaraq qadın yalnız sevgi obyekti deyil, fəal, iradəli və müstəqil şəxsiyyət kimi təqdim edilir. Məgər bu xüsusiyyətlərdə Mehriban xanımın obrazını görmürükmü?

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Ümumilikdə hesab edirəm ki, Mehriban xanımın şəxsiyyətinin və insani keyfiyyətlərinin formalaşmasında ailə-mənəvi dəyərlərlə xalqımızın sosial-mədəni arxetipləri uğurla qovuşaraq bir-birini tamamlayıb.

Xidməti fəaliyyətimlə əlaqədar müxtəlif ölkələrin ictimai və siyasi xadimləri ilə görüşürəm. Onların hamısı yekdilliklə bildirirlər ki, belə mürəkkəb geosiyasi şəraitdə Azərbaycanın güclü rəhbərliyə malik olması ölkənin böyük üstünlüyüdür. Biz də əminik ki, харizmatik Prezident İlham Əliyev və onun etibarlı həyat yoldaşı, Birinci vitse-prezident Mehriban xanım Əliyeva Azərbaycanı inamla firavan və xoşbəxt gələcəyə aparırlar.

Cəlil Xəlilov

Polkovnik, Azərbaycan Respublikasının Müharibə, Əmək və Silahlı Qüvvələr Veteranları Təşkilatının sədri