Politoloq:Kreml beynəlxalq nizama açıq mesaj verir  

Rusiya xarici işlər naziri Sergey Lavrovun “kim güclüdürsə, o da haqlıdır” açıqlaması beynəlxalq ictimaiyyətdə ciddi müzakirələrə səbəb olub. Bu bəyanatın beynəlxalq hüququn faktiki olaraq arxa plana keçdiyini göstərib-göstərmədiyi və Kremlin yeni mərhələli geosiyasi strategiyasının açıq mesajı olub-olmadığı sual doğurur.

Mövzu ilə bağlı Milli Cəbhə Partiyasının başqan müavini, politoloq  Məhəmməd Əsədullazadə Citypost.az - saytına açıqlama verib.

Politoloqun sözlərinə görə, Sergey Lavrovun bu açıqlaması təsadüfi deyil və ABŞ-ın keçmiş prezidenti Donald Trampın analoji ritorikası ilə üst-üstə düşür:“Sergey Lavrov ‘kim güclüdür, o da haqlıdır’ prinsipi ilə, əslində, Donald Trampın beynəlxalq siyasətdə sərgilədiyi ritorikaya uyğun mövqe ortaya qoyur. Təbii ki, hazırda beynəlxalq siyasi nizamın deqradasiyasında əsas rol oynayan aktorlar Rusiya və ABŞ prezidentləridir. Bununla belə, Çin və Avropa ölkələri beynəlxalq siyasi nizamın qorunub saxlanılmasını xüsusi olaraq önə çəkirlər,” – deyə Məhəmməd Əsədullazadə bildirib.

Politoloq qeyd edib ki, Rusiyanın Ukraynaya hücumundan sonra beynəlxalq siyasi nizam ciddi şəkildə pozulub və qlobal təhlükəsizlik mühiti zəifləyib:“Rusiya tərəfi Ukraynaya hücumdan sonra beynəlxalq siyasi nizamın artıq işləmədiyini iddia edir. Kreml mərhələli şəkildə öz siyasi strategiyasını həyata keçirir və bu strategiyanın əsas mesajı Mərkəzi Asiya, Cənubi Qafqaz və Şərqi Avropanı öz təsir dairəsinə almaq niyyətindən ibarətdir. Məhz bu səbəbdən güc amilini ön plana çıxarırlar,” – deyə o vurğulayıb.

Əsədullazadənin fikrincə, Lavrovun açıqlamalarından Rusiyanın özünü fövqəl-dövlət kimi təqdim etmək niyyəti açıq şəkildə hiss olunur:“Sergey Lavrovun mövqeyindən belə nəticə çıxarmaq olar ki, Rusiyanın əsas mesajı Avropanın onunla hesablaşmalı olduğu və keçmiş postsovet məkanının Rusiyanın təsir zonası kimi tanınmasıdır. Kreml hesab edir ki, beynəlxalq siyasi nizam artıq işləmir və Rusiya öz təsir zonasını formalaşdırmaqda haqlıdır,” – deyə politoloq bildirib.

Bununla yanaşı, Məhəmməd Əsədullazadə beynəlxalq hüququn alternativsiz olduğunu da vurğulayıb:

“Beynəlxalq hüququn deqradasiyası üçün böyük dövlətlər, xüsusilə Rusiya və ABŞ müəyyən addımlar atsa da, hazırkı beynəlxalq hüququn real alternativi yoxdur. Əgər beynəlxalq hüquq tamamilə arxa plana atılarsa, dünyada yeni münaqişələr və yeni imperiya iddiaları meydana çıxa bilər,” – deyə o qeyd edib.

Həmçinin oxuyun

Zirzəmidə ömrü keçən, unudulmaz şair...  

Sahil Babayev qərar verdi: Maliyyə Nazirliyinə tabe olan bu idarələr ləğv edilir 

Amaliya Pənahovanın 80 illik yubileyi qeyd olunub

Sağlam, Bütöv Azərbaycan cəmiyyətinin arzusu ilə  - Sayman Aruz yazır

Turan Etibaroğlu