Pərvanə Vəliyeva: Qlobal Bakı Forumu Azərbaycanın mövqeyini dünyaya çatdırır

Bakıda keçirilən Qlobal Bakı Forumu müasir dünyanın mürəkkəb geosiyasi vəziyyətinin müzakirə olunduğu mühüm beynəlxalq platformaya çevrilib.

Bunu Milli Məclisin deputatı Pərvanə Vəliyeva forumla bağlı Citypost.az-a açıqlamasında bildirib.

Deputat qeyd edib ki, forumun açılışında çıxış edən Prezident İlham Əliyev müasir dünyada təhlükəsizlik və sabitliyin hər bir dövlət üçün əsas prioritetə çevrildiyini vurğulayıb. Onun sözlərinə görə, təhlükəsizlik olmadan iqtisadi inkişaf, sosial rifah və beynəlxalq əməkdaşlıq mümkün deyil və sülh bütün inkişaf proseslərinin əsasını təşkil edir.

Pərvanə Vəliyeva bildirib ki, dövlət başçısı çıxışında təxminən 30 il ərzində Azərbaycan ərazilərinin Ermənistanın işğalı altında qalmasını və bu müddətdə beynəlxalq təşkilatların qərarlarının icra olunmamasını beynəlxalq sistemdə mövcud olan ədalətsizliklərin nümunəsi kimi qeyd edib. Prezident Azərbaycanın öz suverenliyini bərpa etməsinin beynəlxalq hüquqa əsaslanan legitim addım olduğunu vurğulayıb.

Deputatın sözlərinə görə, Azərbaycanın öz gücü hesabına ərazi bütövlüyünü və suverenliyini bərpa etməsi region üçün dönüş nöqtəsi yaradıb. Bununla yanaşı, müharibədən sonrakı mərhələdə sülhün təmin olunmasının daha mürəkkəb proses olduğunu qeyd edən Prezident Ermənistanla münasibətlərin normallaşdırılması və regionda sabitliyin bərqərar olması üçün siyasi iradənin vacibliyini diqqətə çatdırıb.

Açıqlamada Azərbaycanın qlobal enerji təhlükəsizliyində oynadığı rola da toxunulub. Pərvanə Vəliyeva bildirib ki, müasir dünyada enerji resursları artıq təkcə iqtisadi məsələ deyil, həm də siyasi və təhlükəsizlik amili kimi qəbul olunur. Azərbaycan etibarlı enerji tərəfdaşı kimi neft və qaz ixrac edən ölkə olaraq müxtəlif regionların enerji təhlükəsizliyinə töhfə verir və bu istiqamətdə əməkdaşlığı genişləndirir.

Həmçinin oxuyun

Vüqar Qurbanovun gizli göstərişlərini Şahin Qurbanov icra edirmiş   

Həmid Herişçinin iç üzü açıldı

Aydınlığa aydınlıq gətirən... Unudulmaz Aydın Səlimzadə - ŞƏMSİ VƏFADAR YAZIR

SSRİ dövründə İrana verilən Azərbaycan torpaqları  

Deputat həmçinin qeyd edib ki, münaqişələr və geosiyasi gərginliklər beynəlxalq ticarət marşrutlarının fəaliyyətinə də təsir göstərir. Bu baxımdan alternativ logistika yollarının əhəmiyyəti artır. Azərbaycanın Şərq-Qərb və Şimal-Cənub nəqliyyat dəhlizlərinin mühüm hissəsi kimi qlobal ticarət və tranzit sistemində mühüm rol oynadığı vurğulanıb.

Pərvanə Vəliyeva əlavə edib ki, Prezident İlham Əliyev çıxışının sonunda beynəlxalq əməkdaşlıq və dialoqun vacibliyini bir daha diqqətə çatdıraraq müasir dünyada mövcud münaqişələrin yalnız dialoq və əməkdaşlıq yolu ilə həll edilə biləcəyini bildirib.

Deputatın sözlərinə görə, digər beynəlxalq platformalardan fərqli olaraq Qlobal Bakı Forumunda siyasi, ictimai, sosial və mədəni məsələlər kompleks şəkildə müzakirə olunur. Bu baxımdan forum yalnız iqtisadi məsələlərin müzakirə olunduğu Davos Forumu və ya əsasən təhlükəsizlik mövzularına həsr olunan Münxen Təhlükəsizlik Konfransından fərqlənir.

“Qlobal Bakı Forumu yüksək səviyyəli iştirakçı tərkibi ilə də seçilir. Burada prezidentlər, baş nazirlər, nazirlər, sabiq dövlət və hökumət başçıları, eləcə də digər nüfuzlu şəxslər iştirak edərək öz siyasi baxışlarını bölüşürlər”, – deyə deputat vurğulayıb.

Pərvanə Vəliyeva bildirib ki, bu platforma dünya mediasının da diqqət mərkəzindədir və Azərbaycanın qlobal geosiyasi proseslərə dair mövqeyini beynəlxalq ictimaiyyətə çatdırmaq baxımından mühüm imkan yaradır. Onun sözlərinə görə, forum çərçivəsində Cənubi Qafqaz regionunda normallaşma prosesi, Azərbaycanın xarici siyasət prioritetləri və regionda baş verən hadisələr geniş müzakirə olunur.