Turan Rzayev: “Müasir münaqişələr qeyri-müəyyənlik mərhələsindədir”

Politoloq Turan Rzayev regionda və dünyada davam edən hərbi-siyasi proseslərlə bağlı geniş açıqlama verib.

Citypost.az xəbər verir ki, politoloq bildirib ki, Azərbaycan hazırda hər iki istiqamətdə – həm şimalda, həm də cənubda davam edən ciddi münaqişələrin təsir zonasında yerləşir:“Bir tərəfdə Rusiya–Ukrayna müharibəsi, digər tərəfdə isə İranla ABŞ-İsrail xəttində davam edən qarşıdurma regionda sabitliyi sarsıdır.”

Politoloqun sözlərinə görə, xüsusilə İran ətrafında baş verən hadisələr ilkin gözləntilərdən fərqli olaraq uzanır və qeyri-müəyyənlik yaradır:“Qısa müddətdə bitəcəyi ehtimal olunan qarşıdurma artıq uzunmüddətli xarakter almaqdadır. Atəşkəs təşəbbüsləri olsa da, nəticələr qeyri-müəyyən olaraq qalır və bu, həm tərəf ölkələr, həm də qlobal iqtisadiyyat üçün risklər yaradır.”

Turan Rzayev qeyd edib ki, müasir münaqişələr artıq lokal çərçivədən çıxaraq daha geniş təsir radiusuna malikdir:“Əgər əvvəllər böyük güclər qısa hərbi müdaxilələrlə nəticə əldə etməyə çalışırdısa, indi münaqişələr daha çox ‘idarə olunan qeyri-müəyyənlik’ fazasında davam edir.”

Onun fikrincə, bunun ən bariz nümunələrindən biri də Rusiya–Ukrayna müharibəsidir:“Bu qarşıdurma uzunmüddətli tükəndirmə strategiyasına keçib. Tərəflərdən heç biri sürətli qələbə əldə edə bilmədiyi üçün müharibə uzanır və ciddi humanitar, iqtisadi nəticələr doğurur.”

Politoloq əlavə edib ki, İran–ABŞ–İsrail xəttində də oxşar dinamika müşahidə olunur:“Bu qarşıdurmada hərbi əməliyyatlar diplomatik proseslərlə sinxron deyil, əksinə, onları təzyiq alətinə çevirir. Atəşkəs təşəbbüslərinin nəticəsiz qalmasının əsas səbəblərindən biri də budur.Tərəflər danışıqlara daha çox taktiki üstünlüklərini rəsmiləşdirmək məqsədilə gedirlər və bu da sülhün əldə olunmasını çətinləşdirir.” 

Həmçinin oxuyun

Xalq yazıçısı Anar: “Bunu ilk dəfədir açıqlayıram...”

Şükranlıq içində və ya şükranlığa bələnmiş ADAM...  

Prezident ailəsini şantaj edən Fərid Salmanov KİMDİR?

TƏBİB Səhiyyə Nazirliyinə birləşdirilir - İslahatlar DAVAM EDƏCƏK 

Turan Rzayev Azərbaycanın yanaşmasını fərqli model kimi qiymətləndirib:“44 günlük Vətən müharibəsi zamanı rəsmi Bakı müharibəni uzatmaq yox, qısa müddətdə nəticə əldə etmək strategiyasını seçdi. Konkret məqsəd müəyyən edilmişdi və əməliyyatlar yalnız həmin hədəflər çərçivəsində aparıldı.bu yanaşma resursların effektiv istifadəsinə və hərbi uğurun siyasi nəticəyə çevrilməsinə imkan verdi.” 

Politoloq qərarvermə mexanizminin roluna da diqqət çəkib:“Müasir müharibələrdə siyasi və hərbi rəhbərlik arasında koordinasiya problemləri tez-tez müşahidə olunur. Azərbaycan nümunəsində isə vahid qərarvermə mərkəzi və sinxronluq əməliyyatların effektivliyini artırdı.”

Sonda Turan Rzayev qeyd edib ki, 2023-cü ildə keçirilən lokal xarakterli antiterror tədbirləri bu modelin daha çevik formada tətbiq oluna bildiyini göstərdi:“Bu yanaşma həm hərbi hədəflərin qısa müddətdə neytrallaşdırılmasını təmin etdi, həm də genişmiqyaslı eskalasiyanın qarşısını aldı.”

Yeganə