Süni bud oynağı nə qədər xidmət edir? – Mütəxəssisdən vacib açıqlama  

Bud oynağında yaranan ciddi zədələnmələr, xüsusilə də artrit və osteoartrit kimi xəstəliklər insanın gündəlik həyat keyfiyyətini ciddi şəkildə aşağı sala bilir. Ağrı, hərəkət məhdudiyyəti və yerimədə çətinlik bir çox hallarda xəstələri süni bud oynağı əməliyyatına məcbur edir. Bəs bu protezlər nə qədər müddət xidmət edir və əməliyyatdan sonra hansı hallara diqqət edilməlidir?

Citypost.az-ın məlumatına görə,ortoped-travmatoloqlar bildirirlər ki, bud oynağı insan bədənində ən çox yüklənən oynaqlardan biridir.

Zaman keçdikcə oynaq qığırdağı aşınır və sümüklər bir-birinə sürtünməyə başlayır. Bu zaman xəstələrdə davamlı ağrı, axsama, hərəkətdə sərtlik və oturub-durmaqda çətinlik yaranır.

Mütəxəssislərin sözlərinə görə, dərman və fizioterapiya artıq effekt vermədikdə ən effektiv üsullardan biri bud oynağının protezlə əvəz olunmasıdır. Əməliyyat zamanı zədələnmiş oynaq çıxarılır və onun yerinə xüsusi süni implant yerləşdirilir. Müasir implantlar titan, keramika və yüksək davamlı tibbi materiallardan hazırlandığı üçün uzunömürlü olur.

Həkimlərin bildirdiyinə əsasən, bu gün istifadə olunan süni bud oynaqlarının böyük əksəriyyəti 15 ildən 30 ilə qədər problemsiz xidmət göstərə bilir.

Statistik olaraq protezlərin təxminən 90 faizi uzun illər normal fəaliyyətini qoruyur. Hətta tibbi ədəbiyyatda 50-70 ilə yaxın istifadə olunmuş protez nümunələri də mövcuddur.

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı  

Mütəxəssislər qeyd edir ki, protezin ömrü təkcə əməliyyatdan yox, həm də xəstənin sonrakı həyat tərzindən asılıdır. Artıq çəki, ağır fiziki iş, travmalar və düzgün olmayan hərəkətlər implantın daha tez aşınmasına səbəb ola bilər. Əksinə, düzgün reabilitasiya, fizioterapiya və həkim məsləhətlərinə əməl edən xəstələr uzun illər rahat şəkildə hərəkət edə bilir.

Əməliyyatdan sonra ilk həftələr xüsusi əhəmiyyət daşıyır. Bu dövrdə xəstəyə yerimə məşqləri, əzələ gücləndirici hərəkətlər və fizioterapiya proqramları tətbiq olunur. Bir çox insan əməliyyatdan qısa müddət sonra əvvəlki ağrılarından tamamilə xilas olur və gündəlik həyatına geri dönür.

Həkimlər onu da vurğulayırlar ki, süni bud oynağı əməliyyatı yalnız yaşlı insanlar üçün nəzərdə tutulmur. Son illərdə travma, anadangəlmə oynaq problemləri və degenerativ xəstəliklər səbəbilə daha gənc yaşlarda da bu əməliyyata ehtiyac yaranır.

Mütəxəssislərin fikrincə, bud oynağında uzunmüddətli ağrı, yerimədə çətinlik və hərəkət məhdudiyyəti olan şəxslər gecikmədən ortoped müayinəsindən keçməlidirlər. Çünki vaxtında aparılan müalicə həm əməliyyat ehtiyacını gecikdirə, həm də gələcək ağırlaşmaların qarşısını ala bilər.

Yusif