Həkim xəbərdarlıq edir: Qarında köp sadə narahatlıq deyil, ciddi xəstəliklərin əlaməti ola bilər

Qarında köp və şişkinlik insanların ən çox rastlaşdığı həzm sistemi problemlərindən biridir. Bir çox insan bu vəziyyəti adi hal hesab etsə də, mütəxəssislər xəbərdarlıq edirlər ki, davamlı və təkrarlanan köp bəzən ciddi xəstəliklərin ilk əlaməti ola bilər və diqqətdən kənarda qalmamalıdır.

Citypost.az xəbər verir ki, mütəxəssislərin sözlərinə görə, köp adətən qarında gərginlik hissi, həddindən artıq qaz yığılması, tez-tez qəyirmə, qarın nahiyəsində ağrı və narahatlıqla müşayiət olunur. Bəzi xəstələrdə gün ərzində çoxlu qaz ifrazı, qarının həddindən artıq şişməsi və hətta gündəlik fəaliyyətə mane olan ağırlıq hissi də müşahidə edilir.

Həkimlər bildirirlər ki, qarında köpün yaranmasının səbəbləri olduqca müxtəlifdir. Ən sadə səbəblərdən biri gündəlik həyat tərzi və qidalanma vərdişləri ilə əlaqədardır. Məsələn, yemək yeyərkən danışmaq, qidanı kifayət qədər çeynəmədən udmaq, pipetlə su içmək və ya fərqinə varmadan çox hava udmaq bağırsaqlarda qazın artmasına səbəb ola bilər.Bununla yanaşı, stress və psixoloji gərginlik də həzm sisteminin fəaliyyətinə birbaşa təsir göstərir. Uzunmüddətli stress bağırsaq hərəkətlərini dəyişdirə, həzm prosesini ləngidə və nəticədə köp və şişkinlik yarada bilər. Elə buna görə də bir çox hallarda həkimlər qıcıqlanmış bağırsaq sindromunu və digər funksional həzm pozğunluqlarını psixoloji faktorlarla əlaqələndirirlər.

Mütəxəssislər qeyd edirlər ki, köp mədə və bağırsaq xəstəliklərinin də əlaməti ola bilər.

Xüsusilə qastroezofageal reflüks xəstəliyi, qastrit, mədə və onikibarmaq bağırsaq xorası, bağırsaq iltihabları, kolitlər və müxtəlif həzm sistemi infeksiyaları zamanı xəstələrdə davamlı köp müşahidə olunur.Bəzi hallarda isə problem daha ciddi xəstəliklərin göstəricisi ola bilər. Mədə xərçəngi, bağırsaq xərçəngi və bağırsaq keçməməzliyi kimi həyati təhlükə yaradan xəstəliklər də ilkin mərhələlərdə köp, qarında şişkinlik və həzm pozğunluqları ilə özünü göstərə bilir. Bu səbəbdən uzun müddət davam edən və ya getdikcə artan köp şikayətləri mütləq araşdırılmalıdır.Həkimlər bağırsaq parazitlərinin də bu problemin geniş yayılmış səbəblərindən biri olduğunu bildirirlər. Xüsusilə gigiyenik qaydalara tam əməl edilmədikdə və ya çirkli qida məhsulları qəbul edildikdə bağırsaq parazitləri yaranaraq köp, qarın ağrısı, iştahasızlıq və digər narahatlıqlara səbəb ola bilər.Mütəxəssislərin fikrincə, aşağıdakı hallarda həkimə müraciət etmək vacibdir:

Köp uzun müddət davam edirsə;

Qarın ağrısı ilə müşayiət olunursa;

İshal və qəbizlik növbələşirsə;

Səbəbsiz çəki itkisi müşahidə olunursa;

Nəcisdə qan və ya rəng dəyişikliyi varsa;

Gecələr yuxudan oyadan ağrılar yaranırsa;

Qida qəbulundan sonra vəziyyət daha da ağırlaşırsa.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Həkimlər vurğulayırlar ki, köp əlamətini sadəcə qaz problemi kimi qiymətləndirmək düzgün deyil. Vaxtında aparılan müayinələr və düzgün diaqnoz həm ciddi xəstəliklərin erkən aşkarlanmasına, həm də effektiv müalicəyə imkan yaradır.

Mütəxəssislər insanlara qidalanma vərdişlərinə diqqət etməyi, yeməkləri sakit şəraitdə və yaxşı çeynəyərək qəbul etməyi, qazlı içkilərdən və həddindən artıq yağlı qidalardan uzaq durmağı tövsiyə edirlər. Eyni zamanda, müntəzəm fiziki aktivlik və stressin idarə olunması da həzm sisteminin sağlam fəaliyyəti üçün böyük əhəmiyyət daşıyır.

Unutmaq olmaz ki, qarında köp bəzən sadə bir həzm pozğunluğu olsa da, bəzi hallarda orqanizmin verdiyi ciddi xəbərdarlıq siqnalına çevrilə bilər. Buna görə də bu əlaməti uzun müddət görməzlikdən gəlmək əvəzinə, vaxtında həkimə müraciət etmək ən doğru addım hesab olunur.

Yeganə