Zaqrebdə 28 May - Müstəqillik Günü qeyd olunub 

Azərbaycanın Xorvatiyadakı səfirliyi tərəfindən Zaqrebdə 28 May - Müstəqillik Günü münasibətilə tədbir keçirilib.

AZƏRTAC xəbər verir ki, tədbirdə, Xorvatiyanın dövlət qurumlarının rəsmiləri, Xorvatiya Parlamentinin üzviləri, bu ölkədə akkreditə olunan diplomatik korpusun rəhbərləri və beynəlxalq təşkilatların nümayəndələri, ictimai təşkilatların rəhbərləri, elm, mədəniyyət və incəsənət xadimləri, Xorvatiyada yaşayan azərbaycanlılar, həmçinin media nümayəndələri iştirak ediblər.

Tədbirdə əvvəlcə Azərbaycan və Xorvatiyanın Dövlət himnləri səsləndirilib.

Tədbirdə çıxış edən Azərbaycanın Xorvatiyadakı səfiri Anar İmanov müsəlman Şərqində ilk demokratik və dünyəvi dövlətin məhz 1918-ci il mayın 28-də Azərbaycanda yaradıldığını, Azərbaycan Xalq Cümhuriyyətinin qısa müddət ərzində mövcud olmasına baxmayaraq, çox mühüm və tarixi addımların atıldığını, həmin dövrdə milli parlamentin yaradıldığını, dövlət atributlarının təsis edildiyini, demokratik idarəçilik prinsiplərinin müəyyən olunduğunu, vətəndaşların hüquq və azadlıqlarının qorunması istiqamətində mühüm qərarların qəbul edildiyini diqqətə çatdırıb. Səfir ümumilikdə bu hadisənin Azərbaycan xalqının siyasi yetkinliyinin, milli özünüdərkinin və müasir dövlət quruculuğu iradəsinin parlaq təzahürü olduğunu vurğulayıb. 1920-ci ilin aprelində Azərbaycan xalqının əlindən alınan dövlət müstəqilliyinin, milli azadlıq mübarizəsinin məntiqi nəticəsi olaraq 1991-ci il oktyabrın 18-də yenidən bərpa edildiyini vurğulayan səfir tariximizin mürəkkəb və çətin dövrlərinə baxmayaraq, Azərbaycan xalqının müstəqillik ideyalarına daim sadiq qaldığını bildirib.

Ölkəmizin müasir inkişafından söz açan səfir 1993-cü ildə dünyaşöhrətli siyasətçi, Ulu Öndər Heydər Əliyevin xalqın tələbi ilə siyasi hakimiyyətə qayıtdığını, apardığı uğurlu siyasət nəticəsində demokratik, dünyəvi və hüquqi dövlət quruculuğu sahələrində böyük uğurlar əldə edildiyini diqqətə çatdırıb. Bu gün Azərbaycanın beynəlxalq münasibətlər sistemində etibarlı tərəfdaşa, regional əməkdaşlığın fəal iştirakçısına və qlobal təşəbbüslərə töhfə verən məsuliyyətli dövlətə çevrildiyini bildirən diplomat müasir Azərbaycanın öz inkişaf modelini siyasi sabitlik, iqtisadi tərəqqi və milli həmrəylik üzərində qurduğunu vurğulayıb. Səfir, həmçinin son illərdə ölkəmizin iqtisadiyyatının şaxələndirilməsi, enerji təhlükəsizliyi, rəqəmsal transformasiya, nəqliyyat-logistika imkanlarının genişləndirilməsi və insan kapitalının inkişafı istiqamətində mühüm uğurlar əldə etdiyini, Azərbaycanın Şərqlə Qərb arasında etibarlı körpü rolunu oynadığını, beynəlxalq ticarət və enerji layihələrinin əsas iştirakçılarından birinə çevrildiyini diqqətə çatdırıb.

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı  

Anar İmanov Azərbaycanın müasir tarixində əsas hadisə olaraq, 2020-ci ildə 44 günlük Vətən müharibəsi zamanı Ali Baş Komandanın rəhbərliyi altında müzəffər Azərbaycan Ordusunun öz əzəli torpaqlarını erməni işğalından azad etdiyini, 2023-cü ilin sentyabrında isə 23 saat davam edən antiterror tədbirləri nəticəsində ərazi bütövlüyünü tamamilə bərpa etdiyini qeyd edib.

Daha sonra səfir Azərbaycan-Xorvatiya münasibətlərinə toxunub, ölkələrimiz arasında dostluq və strateji tərəfdaşlıq əlaqələrinin uğurla inkişaf etdiyini bildirib.

Tədbirdə çıxış edən Xorvatiyanın müdafiə nazirinin müavini Tomislav Qalic Azərbaycan xalq Cumhuriyyətinin yaradılmasını Azərbaycan xalqı üçün tarixi hadisə adlandıraraq onun Şərqdə demokratik, dünyəvi dəyərlərə əsaslanan ilk müstəqil respublika olduğunu vurğulayıb. O, hər iki ölkənin müstəqillik əldə etdikdən sonra oxşar tale yaşadığını, aparılan uzunmüddətli mücadilədən sonra ərazi bütövlüyünü və suverenliyini bərpa etdiyini bildirib. Tomislav Qalic çıxışında Azərbaycanı ölkəsinin Cənubi Qafqazda əsas strateji tərəfdaşı adlandıraraq, son illər ölkələrimiz arasında ənənəvi dostluq və əməkdaşlıq münasibətlərinin hərtərəfli və sürətlə inkişaf etdiyini məmnunluqla vurğulayıb, bu əlaqələrin bundan sonra da inkişaf edəcəyinə əminliyini ifadə edib. O, bu gün Azərbaycanın nəinki regionda, o cümlədən dünyada söz sahibinə çevrildiyini, beynəlxalq nüfuzunu gücləndirərək hərtərəfli inkişaf yolunda inamla addımladığını bildirərək, dost Azərbaycan xalqına və dövlətinə daima firavanlıq və tərəqqi diləyib.

Tədbirdə Azərbaycan haqqında videoçarx nümayiş etdirilib və rəsmi ziyafət təşkil olunub.