Boşanmadan sonra keçmiş həyat yoldaşından aliment almaq mümkündürmü?  

Boşanma zamanı ən çox müzakirə olunan məsələlərdən biri uşaqlar üçün alimentin təyin edilməsidir. Lakin bir çox vətəndaş bilmir ki, müəyyən hallarda keçmiş ər və ya arvad da özü üçün maddi təminat tələb etmək hüququna malik ola bilər.

Citypost.az-ın məlumatına görə,Azərbaycan Respublikasının Ailə Məcəlləsinə əsasən, nikah pozulduqdan sonra maddi yardıma ehtiyacı olan və əmək qabiliyyəti olmayan tərəf keçmiş həyat yoldaşından saxlanılması üçün vəsait ödənilməsini tələb edə bilər.

Qanunvericilikdə nəzərdə tutulmuş bu hüquq sosial müdafiə xarakteri daşıyır və məqsəd əmək qabiliyyətini itirmiş, sağlamlıq vəziyyəti və ya digər obyektiv səbəblərdən özünü təmin etmək imkanında olmayan şəxsin maddi vəziyyətinin qorunmasıdır.

Belə hallarda keçmiş həyat yoldaşı könüllü şəkildə maddi yardım göstərmədikdə, ehtiyac içində olan tərəf məhkəməyə müraciət edə bilər. Məhkəmə müraciətə baxarkən tərəflərin maddi vəziyyətini, gəlirlərini, sağlamlıq durumunu, əmək qabiliyyətini və digər mühüm halları araşdırır.

Mütəxəssislər qeyd edirlər ki, məhkəmə yalnız şəxsin boşanmış olması faktına əsasən aliment təyin etmir. Bunun üçün müraciət edən şəxsin həqiqətən maddi yardıma ehtiyacının olması və əmək qabiliyyətinin olmaması sübuta yetirilməlidir.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Eyni zamanda qarşı tərəfin maddi imkanları da nəzərə alınır. Əgər aliment ödəməli olan şəxsin gəliri və maddi vəziyyəti buna imkan verirsə, məhkəmə müəyyən məbləğdə ödənişin həyata keçirilməsi barədə qərar qəbul edə bilər.

Hüquqşünaslar bildirirlər ki, bu növ tələblər ailə hüququndan irəli gələn xüsusi münasibətlərə aid olduğundan, hər bir iş üzrə fərdi yanaşma tətbiq edilir. Buna görə də belə bir vəziyyətlə üzləşən şəxslərin hüquqi yardım alması və məhkəməyə müraciət etməzdən əvvəl öz hüquqlarını ətraflı öyrənməsi tövsiyə olunur.

Qanunvericilik boşanmadan sonra da müəyyən hallarda keçmiş həyat yoldaşlarının bir-birinə qarşı sosial məsuliyyət daşıdığını nəzərdə tutur və maddi ehtiyacı olan, əmək qabiliyyətini itirmiş şəxslərin müdafiəsi üçün hüquqi mexanizmlər müəyyən edir.

Yeganə