Xalq artisti:Tərbiyəsinə görə bəzi tələbələri sinifdən çıxarıram"

Azərbaycan Dövlət Akademik Opera və Balet Teatrının solisti, Xalq artisti, Azərbaycan Milli Konservatoriyasının professoru Nəzakət Teymurova ARB TV-nin “Günəbaxan” verilişinin canlı efirində tələbələrin davranışı, ədəb-ərkan və muğam sənətində ənənələrin rolu ilə bağlı fikirlərini bölüşüb.

Citypost.az xəbər verir ki, aparıcı İlqar Mikayıloğlunun tələbələrin özünü aparması barədə sualını cavablandıran Xalq artisti bildirib ki, bu dəyərlər ustadlardan görülən nümunə əsasında formalaşır. Onun sözlərinə görə, tələbəlik illərində müəllimlərinə göstərilən hörmət bu gün də onun üçün əsas meyardır:“Biz ustadlarımızı necə görmüşüksə, elə də davranmışıq. Arif Babayev gələndə ayağa qalxırdıq, Əlbaba müəllim, Canəli müəllim, Ağaxan müəllim gələndə də eyni hörmət göstərilirdi. Allah hamısına rəhmət eləsin, ruhları şad olsun. Yadıma gəlir Süleyman Ələsgərov akademiyaya gələndə, tələbə idik, bir tikə çörək yesək belə, çalışırdıq ki, görməsin. Bu, bizim gördüyümüz adət-ənənə idi”.

Nəzakət Teymurova vurğulayıb ki, bu ənənələri bu gün də tələbələrinə aşılamağa çalışır. Onun sözlərinə görə, bəzi tələbələr bu qaydalara riayət etmir və bu, artıq onların vicdanına buraxılır:“Sözə qulaq asmayan tələbə də olmalıdır, yoxsa sinfin nə ləzzəti olar? Amma elələrinin sayı çox olmur. Əgər tərbiyəsi nizamda olmayan tələbədirsə, birinci semestrdən sonra onu sinifdən uzaqlaşdırıram. Bu məsələdə qətiyyətliyəm”.

Professor qeyd edib ki, muğam təkcə səs və ifa tərzi deyil, eyni zamanda yüksək ədəb-ərkan tələb edən bir sənətdir:“Muğam elə bir istiqamətdir ki, orada təkcə səs yox, davranış da önəmlidir. Elə tələbə var ki, səsi zəifdir, keçid dövründədir, amma tərbiyəsi, böyüyə-kiçiyə hörməti var. Onu sona qədər aparıram. Amma eləsi də var ki, bu çərçivələrə sığmır. O zaman deyirəm ki, Allah canını sağ eləsin, mən səninlə bacara bilmərəm”.

Xalq artistinin bu fikirləri verilişdə geniş müzakirə olunaraq muğam sənətində ustad–şagird ənənəsinin və mənəvi dəyərlərin əhəmiyyətini bir daha gündəmə gətirib.

Turan

Həmçinin oxuyun

"Rauf Aslanovun idarə etdiyi yerdə qala bilməzdim"  - Zahid Sarıtorpaqdan AÇIQLAMA   

Kamil Şahverdi Rəşid Behbudovun kürəkəni kimi tanınır ...  

İsa Həbibbəyli çətirtutanı işdən qovub?  

Hamlet İsaxanlı qızına yüksək vəzifə verdi