Təhsil eksperti: Valideynlər övladlarının imtahan nəticələrini mütləq yoxlasınlar  

Bəzi abituriyentlərin texnologiyadan istifadə edərək imtahan nəticələrini saxtalaşdırıb valideynlərini aldatdıqlarını bildirən təhsil eksperti Elçin Əfəndiyev valideynləri diqqətli olmağa çağırıb.

Citypost.az-a açıqlamasında ekspert bildirib ki, son üç gündə ardıcıl olaraq valideynlərini aldadan, ələ salan və yalan danışan uşaqlarla rastlaşıb.

Ekspertin sözlərinə görə, bəzi abituriyentlər xüsusi texnoloji vasitələrlə imtahan nəticələrini dəyişdirərək onu eynilə Dövlət İmtahan Mərkəzinin rəsmi nəticəsinə bənzər formada valideynlərinə təqdim edir və yüksək bal topladıqlarını bildirirlər. Lakin araşdırma zamanı məlum olur ki, həmin şəxslər yüksək bal toplamaq bir yana, hətta müsabiqə şərtini belə ödəməyiblər.

Elçin Əfəndiyev xatırladıb ki, oxşar hadisə 2019-cu ildə də yaşanıb. Onun sözlərinə görə, həmin vaxt bir abituriyent 596 bal topladığını iddia edib, valideynləri isə Dövlət İmtahan Mərkəzini günahlandırmağa çalışıblar. Sonradan aparılan araşdırma nəticəsində məlum olub ki, İbrahim adlı abituriyent əslində 420 bal toplayıb.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Təhsil eksperti əlavə edib ki, ötən il bölgələrdən birində də analoji hadisə baş verib. Valideyn ona müraciət etdikdən sonra aparılan araşdırma zamanı müəyyən olunub ki, qızın dediyi kimi 645 deyil, 445 bal topladığı üzə çıxıb. O, valideynlərinə Azərbaycan Tibb Universitetinə qəbul olunduğunu bildirib, atası isə bu münasibətlə qəbul məclisi təşkil edərək xeyli xərc çəkib. Portal qeydiyyatı zamanı isə məlum olub ki, abituriyent heç bir ali məktəbə qəbul olmayıb.

Elçin Əfəndiyev hesab edir ki, bu cür hallar övladların valideynlərdən çəkinməsi və qorxması ilə bağlıdır. O, valideynlərə müraciət edərək bildirib ki, texnologiyanın sürətlə inkişaf etdiyi və saxta məlumatların asanlıqla hazırlana bildiyi bir dövrdə övladlarının dediyi nəticələrlə kifayətlənməsinlər, imtahan ballarını mütləq rəsmi qaydada yoxlasınlar ki, sonradan xoşagəlməz hallarla üzləşməsinlər.