Nikah pozulduqda sənədsiz və ya bələdiyyə sənədli ev necə bölünür?

Azərbaycanda ailə mübahisələri zamanı ən çox verilən suallardan biri də sənədi olmayan və ya yalnız bələdiyyə sənədi ilə istifadə edilən evlərin boşanma zamanı necə bölünməsi ilə bağlıdır. Bir çox vətəndaş hesab edir ki, nikah dövründə tikilən və ya əldə olunan evin rəsmi çıxarışı yoxdursa, həmin əmlak avtomatik olaraq tərəflər arasında bölünəcək. Hüquqşünasların sözlərinə görə isə məsələ bu qədər sadə deyil və hər bir hal ayrıca qiymətləndirilir.

Citypost.az xəbər verir ki, mütəxəssisin sözlərinə görə, daşınmaz əmlak üzərində mülkiyyət hüququnun tanınması üçün ilk növbədə həmin əmlakın hüquqi statusu müəyyən edilməlidir. Əgər evin dövlət reyestrindən verilmiş çıxarışı və ya mülkiyyət hüququnu təsdiq edən sənədi yoxdursa, məhkəmə həmin ev üzərində birbaşa pay müəyyən edə bilmir. Çünki hüquqi baxımdan mülkiyyət hüququ rəsmiləşdirilməyən əmlakın bölünməsi mümkün olmur.Bununla belə, bu o demək deyil ki, nikah dövründə həmin evə sərf olunan vəsait tamamilə nəzərə alınmır. Əgər məhkəmədə sübut olunarsa ki, ev nikah müddətində ər-arvadın birgə vəsaiti hesabına tikilib və ya onun tikintisinə, təmirinə, genişləndirilməsinə ailə büdcəsindən ciddi maliyyə xərcləri çəkilib, bu halda məhkəmə həmin xərcləri qiymətləndirə bilər.

Hüquqşünas bildirir ki, belə hallarda bölgü evin özünə deyil, evə qoyulmuş maddi vəsaitə aid olur. Məsələn, məhkəmə müəyyən edə bilər ki, tikintiyə və ya əsaslı təmirə 20 min manat xərclənib. Əgər bu vəsaitin nikah dövründə ər-arvadın ümumi gəlirləri hesabına xərcləndiyi sübuta yetirilərsə, həmin məbləğin tərəflər arasında bölünməsi barədə qərar qəbul oluna bilər. Başqa sözlə, tərəflər evin mülkiyyətində deyil, ona çəkilmiş xərclərdə pay əldə edə bilərlər.

Mütəxəssis qeyd edir ki, yalnız bələdiyyə sənədi olan evlərlə bağlı da eyni yanaşma tətbiq olunur. Əgər həmin daşınmaz əmlak üzərində tam hüquqi mülkiyyət rəsmiləşdirilməyibsə, bölgü zamanı birbaşa mülkiyyət payı müəyyən olunmaya bilər. Lakin tərəflərin həmin əmlaka qoyduğu investisiya, tikinti xərcləri, material alınması, əmək haqqı ödənişləri və digər sübutlar məhkəmə tərəfindən araşdırılır.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Hüquqşünasın sözlərinə görə, belə mübahisələrdə ən vacib məsələ sübut bazasıdır. Tikinti materiallarının qəbzləri, bank köçürmələri, şahid ifadələri, podrat müqavilələri və digər sənədlər məhkəmənin qərarına ciddi təsir göstərir. Bu səbəbdən vətəndaşlara tövsiyə olunur ki, ailə büdcəsi hesabına aparılan iri tikinti və təmir işləri zamanı bütün maliyyə sənədlərini saxlasınlar.

Mütəxəssis vurğulayır ki, hər bir ailə mübahisəsinin özünəməxsus hüquqi xüsusiyyətləri var. Ona görə də sənədi olmayan və ya yalnız bələdiyyə sənədi ilə istifadə olunan evlə bağlı yaranan mübahisələrdə ümumi yanaşma ilə deyil, konkret faktlar və təqdim olunan sübutlar əsasında qərar verilir. Bu səbəbdən belə hallarla üzləşən şəxslərin məhkəməyə müraciət etməzdən əvvəl hüquqi məsləhət almaları daha məqsədəuyğundur.

Əli