Tərləmə həmişə xəstəlik əlaməti deyil – endokrinoloqdan vacib açıqlama  

Bir çox insan gündəlik həyatda həddindən artıq tərlədiyi üçün narahat olur, bunu xəstəlik əlaməti hesab edir və müxtəlif vasitələrdən istifadə edərək tərləmənin qarşısını almağa çalışır. Halbuki mütəxəssislər bildirirlər ki, tərləmə insan orqanizminin tamamilə təbii və həyati əhəmiyyət daşıyan fizioloji proseslərindən biridir.

Citypost.az endokrinoloqların sözlərinə görə, tərləmə ilk növbədə bədənin temperatur balansını qorumağa xidmət edir. İsti hava şəraiti, fiziki aktivlik, emosional gərginlik və hormonal dəyişikliklər zamanı bədən istiliyi yüksəldikdə tərləmə mexanizmi işə düşür və orqanizm soyumağa başlayır. Məhz bu mexanizm sayəsində daxili orqanların normal fəaliyyəti qorunur.

Mütəxəssislər qeyd edirlər ki, tərləmə cəmiyyətdə düşünüldüyü kimi utanılacaq və ya gizlədiləcək bir hal deyil. Əksinə, bu, orqanizmin sağlam işlədiyini göstərən mühüm göstəricilərdən biridir. Tərləmə zamanı bədəndən müəyyən miqdarda su, duzlar və maddələr mübadiləsi nəticəsində yaranan bəzi tullantılar xaric edilir. Buna görə də tərləmə orqanizmin təbii müdafiə və tənzimləmə sisteminin ayrılmaz hissəsi hesab olunur.

Həkimlərin sözlərinə görə, hormonlar da tərləmənin intensivliyinə ciddi təsir göstərir. Xüsusilə estrogen və testosteron hormonlarının səviyyəsində baş verən dəyişikliklər tərləmənin artmasına səbəb ola bilər. Bu səbəbdən yeniyetməlik dövründə, hamiləlik zamanı, menopauza mərhələsində və ya bəzi hormonal pozğunluqlarda insanlar adi vaxtdan daha çox tərləyə bilirlər.

Həmçinin oxuyun

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ   

Buqələmun  - Şahin Qurbanovu da Vilyam Hacıyevin taleyi gözləyir?

Endokrinoloqlar bildirirlər ki, müntəzəm fiziki aktivlik də tərləmə sisteminin sağlam işləməsinə kömək edir. Gündə təxminən 20-30 dəqiqə hərəkət etmək, idmanla məşğul olmaq və ya sürətli gəzinti etmək orqanizmin istilik tənzimləmə mexanizmini aktiv saxlayır. Hətta isti duş və ya sauna kimi prosedurlar da müəyyən hallarda bədənin temperatur tənzimləmə sisteminin fəaliyyətini stimullaşdıra bilər. Lakin bu üsullar hər kəs üçün uyğun olmaya biləcəyindən, xüsusilə ürək-damar və digər xroniki xəstəlikləri olan şəxslər əvvəlcə həkimlə məsləhətləşməlidirlər.Bununla yanaşı, mütəxəssislər vurğulayırlar ki, hər tərləmə də normal hesab edilmir. Əgər insan heç bir fiziki aktivlik etmədən, sərin mühitdə olmasına baxmayaraq həddindən artıq tərləyirsə, gecələr paltarını isladacaq qədər gecə tərləmələri yaşayırsa və ya bu hal gündəlik həyat keyfiyyətini ciddi şəkildə pozursa, mütləq tibbi müayinədən keçməlidir.Belə halların arxasında qalxanabənzər vəzinin həddindən artıq aktiv işləməsi, şəkərli diabet, hormonal pozğunluqlar, bəzi infeksiyalar, sinir sistemi xəstəlikləri və digər sağlamlıq problemləri dayana bilər. Buna görə də səbəbi müəyyən etmədən yalnız tərləməni azaltmağa yönəlmiş vasitələrdən istifadə etmək düzgün yanaşma hesab olunmur.

Endokrinoloqların fikrincə, normal tərləmə sağlam maddələr mübadiləsinin, güclü immun sisteminin və bədənin temperatur balansının qorunmasının vacib hissəsidir. Əsas məsələ tərləmənin miqdarını deyil, onun səbəbini düzgün qiymətləndirməkdir. Əgər tərləmə həddindən artıqdır və sizi narahat edirsə, bunu adi hal kimi qəbul etmək əvəzinə endokrinoloqa müraciət edərək hormonal vəziyyətinizi və ümumi sağlamlığınızı yoxlatdırmağınız tövsiyə olunur. Bu, həm mümkün xəstəliklərin vaxtında aşkarlanmasına, həm də düzgün müalicənin seçilməsinə imkan verir.

Yeganə