ƏRƏFƏ: MİLLİ MƏSULİYYƏT VAXTI

Allah bilir neçənci dəfədir bu mövzuya qayıdıram: sosial şəbəkələrdə “prioritetlərin” quraşdırılması. Prosesin bir başqa adı əsl prioritetlərin populist mövzular, ani maraq oyadan, sonra da tez bir vaxtda unudulan, amma lazım olan an üçün öz işini görmüş olan, strateji mahiyyətdən verstlərlə uzaq məsələlərin arxasında ya gizlədilməsi, ya da itirilməsidir. Bunu edən ayrı-ayrı müəlliflər, ən fərqli zehniyyət düşərgələrini təmsil edən şəxslər ya qəsdən, ya bilməyərəkdən- dövlətin, xalqın tarixi taleyinə aid mövzuların sosial şəbəkələrdə uzun müddət və faydalı müzakirə edilməsinə mane olur, quraşdırılmış psevdovacib mövzulara maraq oyatmağa çalışırlar. Təəssüf ki, bəzən öz istədiklərinə nail olurlar da. Məsələn, sosial şəbəkələrdə Azərbaycanın 8 Avqust gündəliyi, Naxçıvan səfərini tarixi edən Böyük Ərəfə kimi mövzuların yox, ayrı-ayrı, indi üçün aktual oımayan məsələlərin müzakirəyə çıxarılması bu qəbildəndir. Baxmayaraq ki, yaşadığımız Tarix əslində hər birimizi, dünyanın harasında yaşamasından asılı olmayaraq hər bir azərbaycanlını tarixi edir. Dövlət, Xalq, Azərbaycan özünün növbəti ən mühüm Uğurunun bir neçə addımlığındadır; Zəngəzur Dəhlizinin reallaşması ərəfəsindəyik. Biz 600 il dünənə Şah Xətaiyə yox, 600 il sabaha aparan qatardayıq. Lap olsun metronun Xətai stansiyasında... Rəmzi yanaşsaq, hətta Bakı Metropoıiteninin 28 may stansiyasına da müstəqillik prosesi, qırmızı, yaşıl xətləri belə bizim Qırmızı Xətt anlayışımızın tərkib hissəsi, Zəngəzura aparan yol saya bilırik. Milli mənsubiyyətimiz qədər Milli məsuliyyətimiz də vacibdir. Hamımızı elə bu dəqiqədən etibarən Zəngəzur Dəhlizi Ərəfəsinə, Azərbaycanın Qalan Dünya ilə Naxçıvanda birləşmək mənasını dərk etməyə, regionun blokadadan çıxma prosesini soyuqqanlılıqla müşahidə və təhlil etməyə çağırıram. Məsələ Bakı-Naxçıvan təyyarəsinə bilet axtarmaq; tapanda sevinmək, tapmayanda məyus olmaq qədər sadə deyil. Söhbət Bir Başqa Biletdən gedir! Həlledici Tarixi Yola alınan biletdən! Bu bileti yalnız Azərbaycanda əldə etmək olacaq! Laçında kitabxana, Şah İsmayılda xəta axtarmaq vaxtı deyil bu gün! Dərin Beyin Mərkəzlərinin gündəliyində bu mövzular müzakirə  edilmir. Bir neçə il əvvəl bağrımızın başından “Laçın Dəhlizi” açmaq istəyənlərəbiz Zəngəzur Dəhlizi ilə cavab vermişik. Bizi blokadada saxladığını zənn edənlərə başa salırıq ki, bu yolla onlar illərdir özlərini blokadaya alıblarmış. Mübarizə davam edir: ABŞ Konqresində 907-ci düzəlişi ləğv etməməyə çağırışlar var.  Bir neçə gün əvvəl  rəsmən müraciət də edildi. Bunu edənlər həm də Zəngəzur dəhlizinə, onun Tramp yolu hissəsinə qarşı çıxırlar. Ya bilərəkdən, ya da kor-koranə! ƏRƏFƏDƏYİK! Diqqətli və Müdrik olaq!

Mirşahin Ağayev

Həmçinin oxuyun

MEYXANAYA “YOX!” DEMƏYİN VAXTIDIR!  

Şahin Qurbanovdan xəbər var...  

Hakim Mirlətif Seyidovdan şikayət var... 

“Çox gözəl oyunçudur, başqa qüvvələrə güvənir ” — Ayaz Salayevlə Kinematoqrafçılar İttifaqı ətrafında MÜSAHİBƏ