Əmir Pəhləvan -   SÖZ KARVANI SƏNİ SARVAN SEÇMİŞDİ!

Türk dünyasının görkəmli türkoloqu, dilçisi və böyük tənqidçisi Aydın Məmmədov 1944-cü ildə Şəkidə anadan olmuşdur. Bütün ömrünü doğma Azərbaycanın tərəqqisinə, xalqının elmi, mədəni və siyasi dirçəlişinə həsr etmişdir. Orta məktəbdə müəllim fəaliyyətinə qoşulan A.Məmmədov elmi işçi kimi böyüdü, ictimai xadim kimi ərsəyə çatdı, görkəmli siyasət adamı kimi həyatdan getdi. Azərbaycan türklərinin bu torpaqda eramızdan çox öncə yaşaması fikrini elmi gerçəkliyə çevirməyi bacaran alim Aydın bəy istər "Sovetskaya turkologiya" jurnalının redaktor müavini, istərsə də Bədii Tərcümə Mərkəzinin rəhbəri kimi SSRİ-nin və bütövlükdə bütün dünya türklərinin bir-birini daha yaxından tanıması, onların doğmalaşması üçün ölçüyəgəlməz işlər görmüşdür.

Ömrünün təxminən son onilliyini bütünlüklə ictimai-siyasi hadisələrə həsr edən A.Məmmədov 1988-ci ilin fevralından başlayan Azərbaycan Xalq hərəkatının ön sıralarında ilk günlərdən dayanmışdır. Onu həmişə tətil edən fəhlələrin, yerli ağalara etiraz edən kəndlilərin, tələbələrin, ziyalıların içərisində, özü də ən narahat, ən ağrılı anlarda görmək mümkün idi. Ayıq siyasətçi və ardıcıl demokrat olan Aydın bəyin hadisələrə öz şəxsi münasibəti və onları öz şəxsi yozum üslubu vardı.

Güclü məntiqə malik, alovlu natiq Aydın Məmmədov on minlərcə insanı arxasınca aparmağı bacarırdı. Xalqın sevgisini qazanmış A.Məmmədov millət vəkili seçilmişdi. Bu vəzifədə o, milli birlik yaratmaq, azadlıq və demokratiya uğrunda hərəkatımızı düz yolla aparmaq üçün ciddi işlər görürdü.

Respublika Ali Sovetinin millətlərarası münasibətlər üzrə daimi komissiyasının sədri idi.

Qarabağa Xalq Yardımı Komitəsinin sədr müavini olmuşdur.

Azərbaycan Yazıçılar Birliyi katibliyi heyətinə seçilmişdir.

1991-ci il aprel ayının 19-da avtomobil qəzasında faciəli şəkildə həlak olmuşdur (Dilarə Əliyeva ilə).

Öz doğma Kiş kəndində dəfn olunmuşdur.

Aydınlıq göylərdə Günəşdi, Aydı,

Tanrıdan verilən əbədi paydı,

Haqqa, ədalətə çağrışdı, haydı,

Söz karvanı səni sarvan seçmişdi!

Aydınlıq işıqdı, sevən ürəkdi,

Bu günümə, sabahıma gərəkdi,

Haqqı deyənlərlə Allah şərikdi,

Söz karvanı səni sarvan seçmişdi!

Tanrıdan almışdın söz kirəsini,

Yuxusun qatmışdın yer kürəsinin,

Aləmlə bir tutdun haqqın səsini,

Söz karvanı səni sarvan seçmişdi!

Qəzov-qədər vaxtı ölçüb-biçmişdi,

Qismətinə matəm günü seçmişdi,

Ölüm badəsini çoxdan içmişdi,

Söz karvanı səni sarvan seçmişdi!

Düşmən tələ qurdu, günah eylədi,

Ölüm yatağına urcah eylədi,

Tanrı qucaq açdı, dərgah eylədi,

Söz karvanı səni sarvan seçmişdi!

İzləyə-izləyə satdılar səni,

Maşın qəzasına saldılar səni,

Qaranlıq dünyaya atdılar səni,

Söz karvanı səni sarvan seçmişdi!

Biz səni dostluğun şahı bilərdik,

Alimi, hocası, dahı bilərdik,

Saray divlərinin ahı bilərdik,

Söz karvanı səni sarvan seçmişdi!

Yalanla, əyriylə öyüyənmədin,

Yaltaqliq içində böyüyənmədin,

Dəyirman gözündə üyüyənmədin,

Söz karvanı səni sarvan seçmişdi!

Əbədi dünyanın fikir Aydını,

Düşmənlər bu gün də güdür Aydını,

Ədəbi oğrular sökür Aydını,

Söz karvanı səni sarvan seçmişdi!

Əmir Pəhləvan

Həmçinin oxuyun

SEVGİ VƏ HƏYATIN MÜQƏDDƏSLİYİ  

Məcburi Sevginin Qurbanları…

MEYXANAYA “YOX!” DEMƏYİN VAXTIDIR!  

Şahin Qurbanovdan xəbər var...