Xarici diplom tələsi: 5 il həbs, minlərlə manat cərimə

Son illər xaricdə təhsil alıb diplomunu Azərbaycanda tanıtmaq istəyənlərin sayı artdıqca, bu sahədə həm hüquqi suallar, həm də sui-istifadə halları gündəmə gəlir. Xüsusilə qiyabi və distant təhsil əsasında əldə olunmuş diplomların tanınması cəmiyyət üçün həssas mövzuya çevrilib. Məhz bu səbəbdən Azərbaycan Respublikası Ali Məhkəməsi xarici diplomların tanınması ilə bağlı vahid məhkəmə təcrübəsini müəyyən edən mühüm hüquqi mövqe ortaya qoyub.

Citypost.az-ın məlumatına görə, Ali Məhkəmənin mövqeyinə əsasən, xaricdə əldə edilmiş bakalavriat və magistratura diplomlarının tanınması avtomatik xarakter daşımır. Həlledici amil təhsilin forması, tədris yükü, auditoriya dərslərində faktiki iştirak və bu göstəricilərin Azərbaycan Respublikasında qüvvədə olan təhsil standartlarına uyğunluğudur. Qiyabi təhsil üzrə əsas prinsiplərdən biri tələbənin müəyyən dövrlərdə əyani şəkildə tədris prosesinə cəlb olunmasıdır. Xaricdə distant texnologiyalardan istifadə oluna bilər, lakin bu, diplomun Azərbaycanda qiyabi təhsil kimi tanınması üçün kifayət etmir. Əsas meyar təhsilin məzmun və icra baxımından milli standartlara uyğunluğudur.

Xarici diplomun tanınması üçün müraciət yalnız elektron qaydada həyata keçirilir və diplom, transkript, apostil, şəxsiyyət vəsiqəsi, pasport, hərbi sənədlər və zəruri hallarda köçürülmə arayışları təqdim olunmalıdır. Sənədlər verildiyi ölkədə leqallaşdırılmalı, Azərbaycan dilinə notariat qaydasında tərcümə edilməli və elektron sistemə yüklənməlidir.

Lakin burada xüsusilə diqqət çəkən məqam odur ki, saxta diplomların təqdim edilməsi, həqiqətə uyğun olmayan sənədlərlə tanınma əldə etməyə cəhd edilməsi və ya bilərəkdən yalan məlumatların verilməsi ağır cinayət məsuliyyəti yaradır. Azərbaycan Respublikası Cinayət Məcəlləsinin 320-ci maddəsinə əsasən saxta rəsmi sənədlərin hazırlanması, istifadəsi və ya dövriyyəyə buraxılması 2 ildən 5 ilədək azadlıqdan məhrumetmə, 2 000 manata qədər cərimə və ya ictimai işlər ilə cəzalandırıla bilər. Bu əməllər vəzifə tutmaq məqsədi ilə və ya təkrar törədildikdə isə cəza daha da ağırlaşır və 5 ilədək həbs nəzərdə tutulur.

Bundan əlavə, bilərəkdən saxta diplomla işə düzəlmək, dövlət qurumlarını aldatmaq və ya qanunsuz üstünlük əldə etmək halları əlavə cinayət tərkibi yarada və məsuliyyəti ağırlaşdıra bilər. Belə şəxslər yalnız diplomdan məhrum edilmir, eyni zamanda işdən azad olunur və hüquqi məsuliyyətə cəlb edilirlər.

Həmçinin oxuyun

Ard arda zəlzələ oldu 

“Fırtına öncəsi səssizlik” - Siyasi şərhçidən İRAN AÇIQLAMASI

Bu şəxsləri işdən çıxaranlar cərimələnəcək - QANUN 

İranda etiraz dalğası: ABŞ və İsrailin rolu nədir? – Konfliktoloq Elman Vəliyev danışır  

Nəticə etibarilə, xarici diplomların tanınması hüquqi prosedurdur və bu prosesdə hər hansı saxtakarlıq cəhdi ciddi hüquqi nəticələr doğurur. Qanun açıq şəkildə göstərir ki, bu sahədə “asan yol” yoxdur və qaydalardan kənara çıxmaq illərlə həbs, cərimə və hüquqi problemlərlə nəticələnə bilər. Diplomun tanınması yalnız qanuni, şəffaf və standartlara uyğun təhsil əsasında mümkündür.

Yeganə