Ana uşaqla görüşə icazə vermir: Ata nə etməlidir?

Boşanma və ya ayrı yaşama valideynlik hüquqlarını ləğv etmir. Uşaqla ünsiyyət həm ana, həm də atanın qanunla qorunan əsas hüquqlarından biridir. Təəssüf ki, praktikada bu hüquq tez-tez pozulur, uşaqlar valideynlər arasında mübahisənin alətinə çevrilir. Qanunvericilik isə bu cür hallara kifayət qədər sərt yanaşma ortaya qoyur. Valideynlər uşaqla görüş və ünsiyyət qaydaları ilə bağlı razılığa gələ bilmədikdə, qanuna əsasən ilk mərhələ mediasiyadır. Mediasiya prosesində razılıq əldə olunmazsa, uşaqla ünsiyyət hüququnu tələb edən tərəf məhkəməyə iddia ərizəsi ilə müraciət edə bilər. Məhkəmə uşağın mənafeyini əsas götürərək görüş günlərini, saatlarını, müddətini və şərtlərini müəyyən edir. Qərar qəbul edilərkən uşağın yaşı, psixoloji vəziyyəti, valideynlərə bağlılığı və yaşayış şəraiti nəzərə alınır. Xüsusilə 10 yaşına çatmış uşağın fikri mütləq qiymətləndirilir.

Citypost.az-ın məlumatına görə, qanun açıq şəkildə bildirir ki, uşağın yanında yaşayan valideyn digər valideynin uşaqla ünsiyyətinə əsassız mane ola bilməz. Məhkəmənin müəyyən etdiyi görüş qaydalarının formal, simvolik və ya real ünsiyyəti mümkünsüz edən şəkildə icrası yolverilməzdir.

Ən vacib məqam isə məsuliyyətdir. Məhkəmə qətnaməsini icra etməyən valideyni ciddi hüquqi nəticələr gözləyir. Belə ki:

Məhkəmə qərarını qəsdən icra etməyən şəxs barəsində inzibati məsuliyyət tətbiq oluna bilər və cərimə ilə cəzalandırıla bilər;

Qərarın sistemli şəkildə icra edilməməsi, valideynlik hüququndan sui-istifadə halları təkrar və qərəzli xarakter aldıqda, şəxs barəsində cinayət məsuliyyəti yarana bilər;

Həmçinin oxuyun

Ard arda zəlzələ oldu 

“Fırtına öncəsi səssizlik” - Siyasi şərhçidən İRAN AÇIQLAMASI

Bu şəxsləri işdən çıxaranlar cərimələnəcək - QANUN 

İranda etiraz dalğası: ABŞ və İsrailin rolu nədir? – Konfliktoloq Elman Vəliyev danışır  

Cinayət məsuliyyəti çərçivəsində cərimə, islah işləri və hətta azadlıqdan məhrumetmə (həbs) cəzası tətbiq edilməsi qanunla istisna edilmir.

Başqa sözlə, uşağı qəsdən digər valideyndən uzaqlaşdırmaq təkcə mənəvi yox, həm də ağır hüquqi məsuliyyət yaradır. Qanun bu məsələdə açıq mövqe sərgiləyir: uşaq hər iki valideynin qayğısına və ünsiyyətinə ehtiyac duyur və bu hüququ pozan tərəf cavabsız qalmır.

Mütəxəssislər valideynlərə tövsiyə edirlər ki, şəxsi inciklikləri kənara qoyaraq uşağın psixoloji sağlamlığını ön planda tutsunlar. Çünki sonda uşaqla ünsiyyətə mane olan valideyn həm məhkəmə qarşısında, həm də qanun qarşısında cavab verməli olur.