"Çıxarış alacağam” deyib pul alanlardan necə şikayət etmək olar?  

Son dövrlər vətəndaşların ən çox qarşılaşdığı hüquqi problemlərdən biri də müxtəlif vədlərlə aldadılaraq pullarının ələ keçirilməsidir. Bəzən şəxslər “səni işə düzəldəcəyəm”, “çıxarış alacağam”, “dövlət qurumunda məsələni həll edəcəyəm”, “kredit çıxardacağam”, “torpağı sənə sənədləşdirəcəyəm” kimi vədlərlə insanları inandırır və onlardan müəyyən məbləğdə pul alırlar. Daha sonra isə ya telefon zənglərinə cavab vermirlər, ya da müxtəlif bəhanələrlə prosesi uzadırlar.

Citypost.az-ın məlumatına əsasən, hüquqşünasların sözlərinə görə, əgər bir şəxs əvvəlcədən yalan vədlərlə qarşı tərəfin etibarından sui-istifadə edərək onun pulunu ələ keçiribsə, bu hal artıq dələduzluq cinayətinin əlaməti hesab oluna bilər. Xüsusilə vəd edilən xidmət yerinə yetirilmirsə, pul geri qaytarılmırsa və şəxs gizlənməyə başlayırsa, vətəndaş hüquqi addımlar atmalıdır.

Belə hallarda ilk növbədə emosional davranmaq yox, bütün sübutları toplamaq vacibdir. Pulun verilməsini təsdiqləyən bank köçürmələri, qəbzlər, kart əməliyyatları, səs yazıları, telefon danışıqları, sosial şəbəkə mesajları, WhatsApp yazışmaları və digər elektron sübutlar mühafizə edilməlidir. Hətta şahid ifadələri də sonradan mühüm əhəmiyyət daşıya bilər.

Mütəxəssislər bildirirlər ki, bir çox vətəndaş pulu nağd şəkildə verdiyi üçün sonradan bunu sübut etməkdə çətinlik çəkir. Buna görə də hər hansı ödəniş zamanı yazılı təsdiq, bank əməliyyatı və ya mesajlaşma formasında iz saxlanılması vacib hesab olunur.

Əgər qarşı tərəf nə pulu qaytarır, nə də üzərinə götürdüyü öhdəliyi yerinə yetirirsə, bu halda vətəndaş dərhal hüquq-mühafizə orqanlarına müraciət etməlidir. Polisə və ya prokurorluq orqanlarına təqdim olunan ərizədə hadisənin necə baş verdiyi, pulun hansı məqsədlə verildiyi, nə qədər məbləğ olduğu və şəxsin hansı vədlərlə insanı aldatdığı ətraflı şəkildə göstərilməlidir.

Hüquqşünaslar qeyd edirlər ki, bəzi hallarda insanlar “utanaram”, “tanışdır”, “bəlkə qaytardı” düşüncəsi ilə uzun müddət gözləyirlər.

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı  

Bu isə sübutların itməsinə və prosesin çətinləşməsinə səbəb ola bilər. Ona görə də aldadıldığını düşünən şəxs vaxt itirmədən hüquqi addım atmalıdır.

Qanunvericiliyə əsasən, özgənin əmlakını aldatma və ya etibardan sui-istifadə yolu ilə ələ keçirmə dələduzluq hesab olunur və bu əmələ görə cinayət məsuliyyəti nəzərdə tutulur. Əgər əməl külli miqdarda ziyanla və ya bir neçə şəxsə qarşı törədilibsə, məsuliyyət daha da ağırlaşa bilər.

Mütəxəssislər vətəndaşlara bir daha xəbərdarlıq edir ki, xüsusilə “iş düzəltmək”, “dövlət qurumunda məsələ həll etmək”, “çıxarış almaq”, “cəriməni sildirmək” kimi qeyri-rəsmi vədlərə inanaraq tanımadıqları şəxslərə pul vermək ciddi risk yaradır. Belə məsələlərdə yalnız rəsmi prosedurlara və qanuni yollara üstünlük verilməlidir.

Yusif