Ceyhun Məmmədov: “28 May Azərbaycan dövlətçiliyinin şanlı tarixidir”

Xalqımızın tarixində mühüm və qürurverici günlərdən biri olan 28 May – Müstəqillik Gününü böyük ehtiram hissi ilə qeyd edirik.

1918-ci il mayın 28-də Azərbaycan Xalq Cümhuriyyətinin yaradılması ilə xalqımızın çoxəsrlik dövlətçilik ənənələri yeni mərhələyə qədəm qoydu. Şərqdə ilk parlamentli demokratik respublika kimi tarixə düşən Azərbaycan Xalq Cümhuriyyəti milli iradənin, azadlıq ideallarının və müstəqil dövlətçilik düşüncəsinin parlaq nümunəsi idi. Bu mühüm tarixi hadisə Azərbaycan xalqının öz taleyini müstəqil şəkildə müəyyən etmək əzmini bütün dünyaya nümayiş etdirdi.

Bu sözləri Citypost.az-a açıqlamasında millət vəkili Ceyhun Məmmədov bildirib.

"Cəmi 23 ay fəaliyyət göstərməsinə baxmayaraq, Azərbaycan Xalq Cümhuriyyəti dövlət quruculuğu istiqamətində mühüm addımlar atdı. Parlamentin formalaşdırılması, milli ordunun yaradılması, dövlət atributlarının təsis olunması, təhsil sahəsində həyata keçirilən islahatlar və qadınlara seçmək və seçilmək hüququnun verilməsi həmin dövr üçün olduqca mühüm və tarixi qərarlar idi. Bütün bunlar Azərbaycan xalqının demokratik dəyərlərə və müasir dövlətçilik prinsiplərinə sadiqliyini açıq şəkildə göstərirdi.

Azərbaycan Xalq Cümhuriyyətinin qoyduğu siyasi və mənəvi irs sonrakı dövrlərdə də xalqımızın milli yaddaşında yaşadı və müstəqillik ideyasının qorunmasında mühüm rol oynadı. Məhz bu ideoloji əsaslar üzərində yenidən bərpa olunan müstəqil Azərbaycan dövləti bu gün daha da güclənərək inkişaf yolunda inamla irəliləyir.

Ümummilli Lider Heydər Əliyev Azərbaycan dövlətçiliyinin qorunması və möhkəmləndirilməsi istiqamətində misilsiz xidmətlər göstərərək müstəqilliyimizin əbədi və dönməz xarakter almasını təmin etdi. Ulu Öndər hər zaman vurğulayırdı ki, müstəqilliyi qoruyub saxlamaq onu qazanmaq qədər məsuliyyətli və vacib məsələdir. Onun müəyyən etdiyi strateji inkişaf kursu nəticəsində Azərbaycan sabitlik, tərəqqi və güclü dövlətçilik yoluna qədəm qoydu.

Bu gün Prezident, Müzəffər Ali Baş Komandan cənab İlham Əliyevin rəhbərliyi ilə həmin siyasi kurs uğurla davam etdirilir. Azərbaycanın beynəlxalq nüfuzu daha da artır, ölkəmiz regionun aparıcı dövlətlərindən biri kimi mövqeyini möhkəmləndirir. Xüsusilə işğaldan azad edilmiş torpaqlarımızda həyata keçirilən genişmiqyaslı quruculuq işləri, Qarabağ və Şərqi Zəngəzurda yenidən qurulan şəhər və kəndlər dövlətimizin gücünün, xalqımızın birliyinin və müstəqilliyimizin möhkəm təməllər üzərində qurulduğunun bariz nümunəsidir.

Bu gün 28 May tarixi yalnız keçmişimizin şanlı səhifəsi deyil, eyni zamanda gələcəyimizə olan inamın, milli birliyimizin və dövlətçilik ənənələrimizin rəmzidir. Müstəqilliyimizin qorunması, daha da möhkəmləndirilməsi və gələcək nəsillərə etibarlı şəkildə ötürülməsi hər birimizin qarşısında duran ən mühüm vəzifələrdən biridir.

28 May – Müstəqillik Günü münasibətilə xalqımızı səmimi qəlbdən təbrik edir, dövlətimizə daim inkişaf, qüdrət və firavanlıq arzulayıram." - deyə Ceyhun Məmmədov bildirib.

Həmçinin oxuyun

Buqələmun  - Şahin Qurbanovu da Vilyam Hacıyevin taleyi gözləyir?

Şahin Qurbanov yaxşı kabab bişirir... Xəstəxana direktoru ifşa olundu

Deputat Zaur Şükürov: "Azərbaycan cənub marşrutlarındakı riskləri balanslaşdıran əsas qovşaqdır"   

Ali Məhkəmə Rauf Aslanovun “bazar”ını bağladı  

Yusif